ၶမ်ႈဝႃးဝၼ်းတီႈ 30/08/2024 ယၢမ်းၵၢင်ၶမ်ႈမွၵ်ႈ 8 မူင်း 45 မိၼိတ်ႉ သိုၵ်းမၢၼ်ႈဢဝ်ၶိူင်ႈမိၼ်မိူဝ်းပၼ်ႇလဵပ်ႈတီႈဝဵင်းလႃႈသဵဝ်ႈသေ ပွႆႇမၢၵ်ႇလူင်း တိူဝ်ႉသႂ်ႇႁိူၼ်းယေးၵူၼ်းမိူင်းလႄႈႁူင်းႁဵၼ်း။
ၵူၼ်းမိူင်းဝဵင်းလႃႈသဵဝ်ႈဢၼ်ပွၵ်ႈမိူဝ်းတူၺ်းႁိူၼ်းၶိုၼ်းၼၼ်ႉလၢတ်ႈဝႃႈ-“ၶဝ်မႃးပွႆႇမၢၵ်ႇမိူင်ႈၵၢင်ၶိုၼ်း၊ တူၵ်းတၢင်းပွၵ်ႉ 10 ပုၼ်ႉ။ တိူဝ်ႉၺႃးႁိူၼ်းၵူၼ်းမိူင်း၊ လုမ်းၵွၼ်းပွၵ်ႉ ၵူၼ်းမိူင်းတႄႉဢမ်ႇၺႃး ယွၼ်ႉပိူဝ်ႈ ဢမ်ႇပႆႇႁတ်းမႃးယူႇႁိူၼ်းၶိုၼ်း ။ ယွၼ်ႉၵူဝ်ၸိူင်ႉၼႆယဝ်ႉၶႃႈ ”- ဝႃႈၼႆ။
ဢိင်ၼိူဝ်ပၢင်တိုၵ်း ၽႅၼ်ယၼ်ႇသိုၵ်း 1027 ၵမ်းသွင်ၼႆႉသေ ၵူၼ်းမိူင်းလႃႈသဵဝ်ႈ တင်းမိူင်း လႆႈပၢႆႈၽေးသိုၵ်း ။ ၼႂ်းႁၢင်လိူၼ်ဢေႃႊၵတ်ႉသ်ၼႆႉ ပၢင်တိုၵ်းၵေႃႈယဵၼ်ယဝ်ႉသေ ၾၢႆႇတၢင်းသိုၵ်းၵဝ်ႈၵၢင်ႉၵေႃႈလၢတ်ႈဝႃႈၶိုၼ်းပွၵ်ႈမႃးယူႇလႆႈယဝ်ႉ ဝႃႈၼႆလႄႈ ၵူၼ်းမိူင်းၶိုၼ်းပွၵ်ႈမိူင်းတူၺ်းငဝ်းလၢႆး မွၵ်ႈ 10 ပုၼ်ႈၼႆႉ 1 ပုၼ်ႈ ၵူၺ်း။
ၵူၼ်းလႃႈသဵဝ်ႈလၢတ်ႈဝႃႈ-“ပၢင်တိုၵ်းၵေႃႈဢမ်ႇမီးယဝ်ႉ သိုၵ်းမၢၼ်ႈၼႆႉသမ်ႉယူႇယူႇဢဝ်ၶိူင်ႈမိၼ်မႃးပွႆႇမၢၵ်ႇၸိူင်ႉၼႆ။ လွင်ႈဝႃႈၶဝ်တေမႃးပွႆႇမၢၵ်ႇၼႆၼႂ်းၵႄႈၵူၼ်းမိူင်းတႄႉၶၢဝ်ႇမၼ်းလိုဝ်းဝႆႉယူႇ 2 ၶိုၼ်းယဝ်ႉ။ ၶမ်ႈဝႃးၼႆႉတႄႉၵေႃႈပတ်ႉယဝ်ႉၼႃႇ ။ ၵတ်ႉၵႃႈပွၵ်ႉၼၼ်ႉပႆႇမီးၽႂ်မိူဝ်းယူႇၶိုၼ်း ”- ဝႃႈၼႆ။
တီႈဝဵင်းလူင်ၵျွၵ်ႉမႄးၵေႃႈတေႃႈၼင်ႇၼၼ်။ ၶမ်ႈဝၼ်းတီႈ 29/08/2024 ၼၼ်ႉပၢင်တိုၵ်းသိုၵ်းသိူဝ်ၵေႃႈဢမ်ႇမီးသေသိုၵ်းမၢၼ်ႈ ဢဝ်ၶိူင်ႈမိၼ်မိူဝ်းပွႆႇမၢၵ်ႇယၢမ်းၵၢင်ၶိုၼ်းမွၵ်ႈ 11 မူင်း။တိူဝ်ႉသႂ်ႇတပ်ႉပလိၵ်ႈ လုမ်းၵွၼ်းၸႄႈဝဵင်းဢၼ်မီးၼႂ်းပွၵ်ႉ 1 ဝဵင်းၵျွၵ်ႉမႄး။ တိူဝ်ႉသႂ်ႇပႃးႁိူၼ်းယေးၵူၼ်းမိူင်း။
ဝၼ်းတီႈ 27/08/2024 ၼၼ်ႉသမ်ႉ ၶိူင်ႈမိၼ်မႃးပွႆႇမၢၵ်ႇသႂ်ႇတီႈ ပွၵ်ႉ 9 ၵျွၵ်ႉမႄး၊ တိူဝ်ႉသႂ်ႇႁူင်းႁဵၼ်း၊ ၵူၼ်းမိူင်းတၢႆ 2 ၵေႃႉမၢတ်ႇၸဵပ်းႁႅင်း 2 ၵေႃႉ။
တႄႇဢဝ်ႁၢင်လိူၼ်ၵျူႊလၢႆႊမႃးတေႃႇထိုင်လိူၼ်ဢေႃႊၵတ်ႉသ်သဵင်ႈ ၼႂ်းမိူင်းတႆးပွတ်းႁွင်ႇၼႂ်းၸႄႈဝဵင်း ၼမ်ႉသၼ်ႇ၊ ၵူတ်ႉၶၢႆ၊ သီႇပေႃႉ၊ ၵျွၵ်ႉမႄး၊ သႅၼ်ဝီ၊လၢဝ်ႇၵၢႆး ဢၼ်ပဵၼ် ၼႃႈတီႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵုမ်းၵမ် လႆႈဝႆႉၸိူဝ်းၼၼ်ႉ ပၢင်တိုၵ်းသိုၵ်းသိူဝ် ဢမ်ႇပဵၼ်သေတႃႉၵေႃႉ သိုၵ်းမၢၼ်ႈ ၵႆႉဢဝ်ၶိူင်ႈမိၼ်မိူဝ်းပွႆႇမၢၵ်ႇ ယၢမ်းၵၢင်ၶမ်ႈၵၢင်ၶိုၼ်း။တိူဝ်ႉသႂ်ႇ ႁူင်းႁဵၼ်း၊ ၵၢတ်ႇ၊ ႁိူၼ်းယေးၵူၼ်းမိူင်း။ ၵူၼ်းၸိူဝ်းဢမ်ႇတၼ်းပၢႆႈ ဢမ်ႇၸၢင်ႈပၢႆႈၼၼ်ႉ တၢႆၵႂႃႇ 20 ပၢႆ။ မၢတ်ႇၸဵပ်း 10 ပၢႆ ၸုမ်းၸွႆႈထႅမ်ၵူၼ်းမၢတ်ႇၸဵပ်းလူႉတၢႆ တီႈဝဵင်းလႃႈသဵဝ်ႈလၢတ်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ