တႄႇၵၢင်လိူၼ်ဢေႃႊၵတ်ႊသ်မႃး ၾူၼ်တူၵ်းဢမ်ႇထၢတ်ႇလႄႈ တီႈယူႇတၼ်းသဝ်းၵူၼ်းပၢႆႈၽေးသိုၵ်း ဢၼ်မီးတီႈတႅမ်ႇတီႈပၢင်ႇပဵင်း တီႈဝၢၼ်ႈဝႃးလီး ၼႂ်းၸႄႈဝဵင်းပၢင်လွင်း ၺႃးၼမ်ႉထူမ်ႈၼမ်ႉယိုင်ႈ ၽႃႈယၢင်မုင်းၵင်ႈ သိၵ်ႇၶၢတ်ႇ ဢမ်ႇပဵင်းပေႃး လူဝ်ႇတၢင်းၸွႆႈထႅမ်။

ၵူၼ်းမိူင်းယၢင်းလႅင် ဢၼ်ပၢႆႈၽေးသိုၵ်း မႃးယူႇဝႆႉ တီႈဝၢၼ်ႈဝႃးလီးၼႆႉ မီးမွၵ်ႈ 200 ။

ၸုမ်းၸွႆႈထႅမ် ၵူၼ်းပၢႆႈၽႄးသိုၵ်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးသိုၵ်း တီႈဝၢၼ်ႈဝႃးလီးၼႆႉ လႆႈ ဢဝ်ၽႃႈယၢင် (မိုးကာ) မုင်းၵင်ႈသေ ယူႇသဝ်းဝႆႉ။ ယၢမ်းလဵဝ် ၾူၼ်တူၵ်းထပ်းၵၼ်လၢႆဝၼ်းလႄႈ ၼမ်ႉယမ်းတီႈယူႇ။ တႃႇတေသၢင်ႈတီႈယူႇ သုမ်ႉသွင်း ထဵင် ဢၼ်ၵႅၼ်ႇၶႅင်လီငၢမ်းၵေႃႈ – ၵႃႈၶၼ် ၶူဝ်းၶွင်သုင်ႁႅင်းၼႃႇ။ ၸဵမ်ၽႃႈၵင်ႈမႆႉပူၵ်ႇ၊ မႆႉမွင်ၵေႃႈ လႆႈသိုဝ်ႉဢဝ်။ ပႆႇဝႃႈတေႁဵတ်းသုမ်ႉ – တႃႇႁႃၵိၼ်လဵင်ႉတွင်ႉ ဝၼ်းလႂ်ဝၼ်းၼၼ်ႉၵူၺ်းၵေႃႈ ပဵၼ် ဢၼ်ယၢပ်ႇ”- ဝႃႈၼႆ။

ယွၼ်ႉၾူၼ်တူၵ်းလႄႈ တုမ်ႉယွၼ်ႈ ၵူၼ်းပၢႆႈၽႄးသိုၵ်း ပဵၼ်ၶႆႈပဵၼ်ၼၢဝ် ၸဵမ်သႅၼ်းၼုမ်ႇထဝ်ႈ လုၵ်ႈဢွၼ်ႇ၊ ဢမ်ႇမီးငိုၼ်း တႃႇၵႂႃႇယူတ်းယႃတူဝ် တီႈႁူင်းယႃ။ လႆႈပိုင်ႈဢိင်ယႃႈယႃတႆး၊ ႁၢၵ်ႈမႆႉႁၢၵ်ႈတွၵ်ႇသေယႃ။ လႆႈၸႂ်ယႂ်ႇလၢႆးယူတ်းယႃတႆး ဝႃႈၼႆ။

ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“တေႃႈလဵဝ်တႄႉ မႆႈၸႂ်တႃ ႁႃၵိၼ်လဵင်ႉတွင်ႉဢေႃႈ တေၸႂ်ယႂ်ႇဝတ်ႉဝႃးၽႃသိူဝ်ႇတိၵ်းတိၵ်းဢမ်ႇလႆႈ။ ၵူၼ်းပၢႆႈၽေးသိုၵ်းၼမ်မႃး ၵူႈဝၼ်း။ ၸုမ်းၸွႆႈထႅမ်သမ်ႉ လူတ်းယွမ်းၵႂႃႇ။ တႃႇ ၵိၼ်ဝၼ်းလႂ်ဝၼ်းၼၼ်ႉၵူၺ်းၵေႃႈ ယင်းယၢပ်ႇၽိုတ်ႇ။ တေလႆႈၵႄႈလိတ်ႈ ပၼ်ႁႃၸိူင်ႉႁိုဝ် ပေႃးဢမ်ႇႁူႉယဝ်ႉၶႃႈ”- ဝႃႈၼႆ။

ၵူၼ်းမိူင်းယၢင်းလႅင် ဢၼ်ပၢႆႈၽေးသိုၵ်း မႃးမီးတၢင်းဝဵင်းပၢင်လွင်းၼႆႉ မီး 3,000 ပၢႆ ပႆႇၸၢင်ႈပွၵ်ႈၶိုၼ်းႁိူၼ်းယေး။ ၸိူဝ်းၶဝ်ယူႇဝႆႉ တင်းဝၢၼ်ႈလူင်ပႅၼ်ႈ (လုံးပြင်)၊ ၵေႃမႆႉသၢၼ်း (တောင်မဲသင်း)၊ ပၢင်ပုမ်ႇ( ပင်ပုံ)၊ ၼမ်ႉၼဵင်ႈလႄႈ သွင်းပျွင်း ၸိူဝ်းၼႆႉ။ ၸိူဝ်းၶဝ်ယူႇသဝ်းဝႆႉ ၼွၵ်ႈဝဵင်း၊ ယၢၼ်ၵႆၵၼ်တင်း ဝဵင်းမွၵ်ႈ 2 လၵ်း ဝႃႈၼႆ။

ပီၼႆႉ ၸႄႈဝဵင်းပၢင်လွင်း ၾူၼ်တူၵ်းထပ်းၵၼ်လႄႈ ထူပ်းၽႄးၼမ်ႉထူမ်ႈၼမ်ႉၼွင်း၊ သဵၼ်ႈတႃႈသၢႆတၢင်းၵေႃႈ ၵွႆလႄႈ ၾၢႆႇတေႃႉသူင်ႇၶူဝ်းၶွင်ၵေႃႈ တိူဝ်းယၢပ်ႇ၊ ၼမ်ႉၼွင်းထူမ်ႈလႄႈ သူၼ်ႁႆႈၼႃးၵူၼ်းမိူင်းၵေႃႈ လူႉသုမ်းၼမ် ဝႃႈ ၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)