သိုၵ်းၵဝ်ႈၵၢင်ႉ MNDAA ဢွၵ်ႇလိၵ်ႈပိုၼ်ၽၢဝ်ႇဝႃႈ ရူတ်ႉၵႃးၵူၼ်းမိူင်း ဝဵင်းလႃႈသဵဝ်ႈ ဢၼ်ၺႃးလၵ်ႉမိူဝ်ႈၽွင်း ပၢင်တိုၵ်း ပၢင်ယၼ်သိုၵ်း 1027 ၸုပ်ႈသွင်ၼၼ်ႉ လႆႈၵဵပ်းဝႆႉပၼ် ၵမ်ႈၽွင်ႈယူႇလႄႈ ရူတ်ႉၽႂ်ႁၢႆ ႁႂ်ႈဢဝ်လၵ်းထၢၼ်ရူတ်ႉ မႃးပႃးတဵမ်ထူၼ်ႈသေ မႃးလိူၵ်ႈတူၺ်းဢဝ်ၶိုၼ်းလႆႈ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ ဢၼ်သိုၵ်းၵဝ်ႈၵၢင်ႉ MNDAA လၢတ်ႈဝႆႉဝႃႈ – “ရူတ်ႉၵႃး ၶူဝ်းၶွင်ၵူၼ်းမိူင်း ဢၼ်ၺႃးလၵ်ႉ မိူဝ်ႈ ၽွင်း ပၢင်တိုၵ်းၼႂ်းၸႄႈဝဵင်းလႃႈသဵဝ်ႈၼၼ်ႉ ယူႇတီႈ သိုၵ်းၵဝ်ႈၵၢင်ႉ MNDAA ၼႃႈလိၼ်ၶိုၵ်ႉတွၼ်း မၢႆၼိုင်ႈ (ဝဵင်း လႃႈသဵဝ်ႈ) လႆႈႁႄႉႁၢမ်ႈသေ ၵဵပ်းဝႆႉပၼ်။ ရူတ်ႉၵႃးၽႂ်ႁၢႆၵေႃႈ ႁႂ်ႈဢဝ်လၵ်းထၢၼ် ရူတ်ႉမႃးၸွမ်းတဵမ်ထူၼ်ႈသေ မႃး ယိုၼ်ႈယွၼ်းထတ်းတူၺ်းယဝ်ႉ ၸင်ႇထုတ်ႇဢဝ်ၶိုၼ်း။ ယၢမ်းလဵဝ် ၵဵပ်းဝႆႉပၼ် တီႈပၢင်ႇပိတ်ႉမၢၵ်ႇၼင် ပွၵ်ႈ (12) ၼႂ်းဝဵင်းလႃႈသဵဝ်ႈဝႆႉ”- ဝႃႈၼႆ။

ၵဵဝ်ႇလူၺ်ႈ လွင်ႈလိၵ်ႈပိုၼ်ၽၢဝ်ႇၼႆႉသေ ႁဝ်းၶႃႈ ၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇ ၽူႈၶၢၼ်ပၢၵ်ႇ သိုၵ်းၵဝ်ႈၵၢင်ႉၶဝ်ယူႇသေတႃႉ ၵပ်းသိုပ်ႇဢမ်ႇလႆႈ။

ဝဵင်းလႃႈသဵဝ်ႈၼႆႉ သိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ ယိုတ်းၵုမ်းလႆႈယဝ်ႉၼႆသေ ၸႂ်ႉပိူင်ၽွင်းငၢမ်းႁင်းၶဝ်ဝႆႉ။ ၸွမ်းလုမ်းၵပ်းသၢၼ်ဝႃႉ ၸိူဝ်းၼၼ်ႉၵေႃႈ ၸုမ်းသိုၵ်းဝႃႉ UWSA ၶဝ်ႈဢဝ်လွင်ႈႁူမ်ႇလူမ်ႈဝႆႉ ဝႃႈၼႆ။ 

ပၢင်တိုၵ်း သိုၵ်းမၢၼ်ႈတင်း ၸုမ်းသိုၵ်းၵဝ်ႈၵၢင်ႉ MNDAA ၼႆႉ တႄႇပဵၼ်မႃး မိူဝ်ႈဝၼ်းတီႈ 3 လိူၼ်ၵျူႊလၢႆႊၼၼ်ႉသေ တေႃႇထိုင်ဝၼ်းတီႈ 3 လိူၼ်ဢေႃႊၵတ်ႊသ်ၼႆႉ ၾၢႆႇသိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇ ယိုတ်းလႆႈ တိူင်းသိုၵ်းမၢၼ်ႈ ၸဵင်ႇႁွင်ႇဝၼ်းဢွၵ်ႇ – ယမၶ ဝဵင်းလႃႈသဵဝ်ႈယဝ်ႉ ဝႃႈၼႆ။

ယၢမ်းလဵဝ် ၼႂ်းဝဵင်းလႃႈသဵဝ်ႈၼႆႉ ၾႆးၾႃႉၶၢတ်ႇဝႆႉသေတႃႉ ၸွမ်းႁိမ်းႁွမ်း ဢၼ်ၵႆဝဵင်းတႄႉ လႅင်းၾူၼ်း Mytel ၸႂ်ႉလႆႈယူႇ။ ၵူၼ်းပၢႆႈၽေးသိုၵ်း ၸိူဝ်းပၢႆႈၵႂႃႇသွၼ်ႈဝႆႉ တၢင်ႇတီႈတၢင်ႇဝဵင်းၵေႃႈ ဢွၼ်ၵၼ်ပွၵ်ႈမႃးၶိုၼ်း မွၵ်ႈ 4 ပုၼ်ႈ 2 ပုၼ်ႈယဝ်ႉ။