တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇၼၼ်ႉ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇလႄႈ တိူဝ်ႉၺႃးႁိူၼ်းယေး ၵူၼ်းမိူင်းလူႉၵွႆၼမ် ၵူၼ်းမိူင်းမၢတ်ႇၸဵပ်း လုၵ်ႈဢွၼ်ႇ ဢႃယု 10 ၶူပ်ႇ ၺႃးၸၢၵ်ႇမၢၵ်ႇ သဵၼ်ၶဝ်ႈႁိမ်းပဵမ်ႉ။
ဝၼ်းတီႈ 26/08/2024 ယၢမ်းၵၢင်ၼႂ် 4 မူင်းၶိုင်ႈ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ တီႈဝၢၼ်ႈၼႃးမၢၵ်ႇၶေႃ ဝဵင်းသီႇပေႃႉ။
ၵူၼ်းပိုၼ်ႉတီႈ ဝၢၼ်ႈၼႃးမၢၵ်ႇၶေႃ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၢၵ်ႇၶဝ်ႈၵႂႃႇၼႂ်းပဵမ်ႉ မၼ်းလႄႈ မၢတ်ႇၸဵပ်းႁၢဝ်ႈႁႅင်း တေႃႈလဵဝ် သူင်ႇၵႂႃႇယူတ်းယႃတူဝ် ဝႆႉတီႈၼမ်ႉလၼ်ႈ။ ႁိမ်းႁိူၼ်းလႄႈ တင်းႁူင်းႁဵၼ်းၵေႃႈၵွႆ”- ဝႃႈၼႆ။
မိူၼ်ၼႆၼင်ႇၵဝ်ႇ ဝၼ်းတီႈ 25/08/2024 ယၢမ်းၵၢင်ဝၼ်း 1 မူင်း သိုၵ်းမၢၼ်ႈ မႃးပွႆႇမၢၵ်ႇထႅင်ႈ တီႈပွၵ်ႉဝဵင်းတူၵ်း လူႉတၢႆထႅင်ႈ ၵေႃႉၼိုင်ႈ၊ မိူဝ်ႈဝၼ်းတီႈ 24/08/2024 ၵၢင်ၼႂ် 9 မူင်း ၼၼ်ႉၵေႃႈ ပွႆႇမၢၵ်ႇၵမ်းၼိုင်ႈ တူၵ်းတီႈၵျွင်းၶမ်းၵၢင်ဝဵင်း ၼၼ်ႉၵေႃႈ ၵူၼ်းမိူင်းတၢႆ ၵေႃႉၼိုင်ႈ မၢတ်ႇၸဵပ်း ႁၢဝ်ႈႁႅင်း 2 ၵေႃႉ။
ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “ဝၢႆးသိုၵ်းမၢၼ်ႈ တီႈၼွင်ၵေႃႈလူင် ထွႆဢွၵ်ႇ၊ သိုၵ်းၵဝ်ႈၵၢင်ႉ ၶဝ်ႈမိူဝ်းယူႇၼႂ်းဝၢၼ်ႈ၊ မိူဝ်းယႃႉသေႃးႁိူၼ်းပိူၼ်ႈသေ ၶဝ်ႈယူႇၼႂ်းႁိူၼ်းယေး ၵူၼ်းဝၢၼ်ႈ။ သိုၵ်းမၢၼ်ႈ လႅပ်ႈလၢမ်းႁူႉသေ ၸင်ႇၵမ်းၵမ်းဢဝ်ၶိူင်ႈမိၼ်မႃးပွႆႇမၢၵ်ႇ”- ဝႃႈၼႆ။
တီႈသီႇပေႃႉ – ၼွင်ၵေႃႈလူင် – ၼႃးမၢၵ်ႇၶေႃၼႆႉ ပၢင်တိုၵ်းယဵၼ်ဝႆႉယူႇသေတႃႉ ၵူၼ်းပိုၼ်ႉတီႈ ဢၼ်ပၢႆႈၽေးသိုၵ်းဝႆႉ ဢမ်ႇႁတ်းၶဝ်ႈမိူဝ်းယူႇၶိုၼ်း ၼႂ်းဝၢၼ်ႈသူၼ်ႁိူၼ်းယေးၸဝ်ႈၵဝ်ႇ၊ ၸိူဝ်းၵိုတ်းဝႆႉ ၼႂ်းဝဵင်းၼႂ်းဝၢၼ်ႈၵေႃႈ ၶႂ်ႈပၢႆႈယူႇၵေႃႈ ဢမ်ႇၸၢင်ႈပၢႆႈ၊ တေဢမ်ႇပၢႆႈသမ်ႉ မႆႈၸႂ် သိုၵ်းမၢၼ်ႈ တေဢဝ်မၢၵ်ႇမႃးပွႆႇထႅင်ႈ မိူဝ်ႈလႂ်ဢမ်ႇႁူႉၼႆ – ၵူၼ်းပိုၼ်ႉတီႈလၢတ်ႈထႅင်ႈဝႃႈ-
“ၶႂ်ႈပၢႆႈယူႇသေတႃႉၵေႃႈ မၢင်ၸိူဝ်း ႁဵတ်းၵိၼ်ႁႃလဵင်ႉတွင်ႉ ဝၼ်းလႂ်ဝၼ်းၼၼ်ႉၶႃႈလူး။ ပေႃးတေပၢႆႈၵေႃႈ သမ်ႉပေႃးလူဝ်ႇၸႂ်ႉၼမ်ႉမၼ်းၸၢၵ်ႈယဝ်ႉ။ ပေႃးဢမ်ႇမီးငိုၼ်းၵေႃႈ ဢမ်ႇၸၢင်ႈပၢႆႈ”- ဝႃႈၼႆ။
ၸွမ်းၼင်ႇ လူင်ပွင်ၸိုင်ႈ လူင်းၵဵပ်းသဵၼ်ႈမၢႆႁူဝ်ၵူၼ်း ၽွင်းပီ 2014 – 2015 ၼၼ်ႉသေ ၼႂ်းဝဵင်းသီပေႃႉၼႆႉ ႁူဝ်ၼပ်ႉ ၵူၼ်းမိူင်း တင်းမူတ်း မီး 3 မိုၼ်ႇပၢႆ။ ယၢမ်းလဵဝ် ဢၼ်ပၢႆႈၽေးသိုၵ်းသိူဝ်ဝႆႉ မီး 2 မိုၼ်ႇပၢႆ။ ဢၼ်ၵိုတ်းဝႆႉ ၼႂ်းဝၢၼ်ႈ ၼႂ်းဝဵင်း မိုၼ်ႇပၢႆသမ်ႉ ယွၼ်ႉပိူဝ်ႈ ၵၢၼ်ၵပ်းသိုပ်ႇတိတ်းတေႃႇလႅင်းၾူၼ်း၊ ဢိၼ်ႊထိူဝ်ႊၼႅတ်ႊ ယၢပ်ႇၽိုတ်ႇလႄႈ ႁဵတ်းႁိုဝ်ယူႇ ႁဵတ်းႁိုဝ်ၵိၼ်ဝႆႉ ၸွင်ႇလွတ်ႈၽေးႁိုဝ်ၼႆ ၵူၼ်းမုင်ႉႁေႃႁိူၼ်း ပဵၼ်ဢၼ်မႆႈၸႂ်ဝႆႉယူႇ ၵူၼ်းပၢႆႈၽေးသိုၵ်း လၢတ်ႈၼင်ႇၼႆ။
တီႈဝဵင်းသီႇပေႃႉၼႆႉ ပၢင်တိုၵ်း တႄႇပဵၼ်ၼႂ်းဝဵင်းႁၢဝ်ႈႁႅင်း မိူဝ်ႈဝၼ်းတီႈ 10/08/2024 ။ တေႃႇထိုင် ဝၼ်းတီႈ 26/08/2024 ၼႆႉ ၵူၼ်းၼႂ်းဝဵင်း ဢၼ်လႆႈလူႉတၢႆ ယွၼ်ႉပၢင်တိုၵ်း မီးမွၵ်ႈ 20 ယဝ်ႉ။ ၵူၼ်းမၢတ်ႇၸဵပ်း မီး 48 ၵေႃႉ ယဝ်ႉၼႆ ၸုမ်းၸွႆႈထႅမ် လွင်ႈမၢတ်ႇၸဵပ်းလူႉတၢႆၵေႃႈ တႅမ်ႈတၢင်ႇဝႆႉၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ