သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇႁိူၼ်းယေးၵူၼ်းမိူင်း ဝဵင်းသီႇပေႃႉ လူႉၵွႆ 3 လင် ထဝ်ႈယိင်း လူႉတၢႆၵေႃႉၼိုင်ႈ။
ဝၼ်းတီႈ 19/08/2024 ယၢမ်းၵၢင်ၼႂ် 2 မူင်း သိုၵ်းမၢၼ်ႈ ဢဝ်ၶိူင်ႈမိၼ် ပွႆႇမၢၵ်ႇလႄႈ တူၵ်းတိူဝ်ႉႁိူၼ်းၵူၼ်းမိူင်း ဢၼ်မီးတီႈဝၢၼ်ႈၺွင်ႇၵဝ်ႈတူၼ်ႈ လူႉၵွႆ 3 လင် ၵူၼ်းတၢႆ 1 ၵေႃႉ မၢတ်ႇၸဵပ်းၵေႃႈမီး ဝႃႈၼႆ။
ၵူၼ်းမိူင်း ဝဵင်းသီႇပေႃႉ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇတိူဝ်ႉၺႃးႁိူၼ်း 3 လင်။ မႄႈထဝ်ႈၶႄႇ ၵေႃႉၼိုင်ႈၵေႃႈ တၢႆထင်တီႈ။ ၵူၼ်းမၢတ်ႇၸဵပ်းၵေႃႈမီး။ သၢႆသၼ်ယႃးၾူၼ်း CDMA ၵေႃႈ ႁၢႆဝႆႉ ဢမ်ႇၸၢင်ႈတိတ်းတေႃႇၸူးၵၼ်။ ပၢင်တိုၵ်း ၼႂ်းဝဵင်းသီႇပေႃႉၼႆႉ ၵူၼ်းမိူင်းလူႉတၢႆယဝ်ႉမွၵ်ႈ 20 ၵေႃႉ။ ပၢင်တိုၵ်းတႄႉ ဢမ်ႇပဵၼ်သေတႃႉ ယွၼ်ႉသိုၵ်းမၢၼ်ႈ လၢမ်းလိမ်းပွႆႇလႄႈ ၵူၼ်းမိူင်းလႆႈၵူဝ် ဢမ်ႇႁတ်းယူႇၼႂ်းဝဵင်း”- ဝႃႈၼႆ။
မိူၼ်ၼႆၼင်ႇၵဝ်ႇ သိုၵ်းမၢၼ်ႈ တင်းၼမ်ႉလၼ်ႈၵေႃႈ လၢမ်းလိမ်းယိုဝ်းၵွင်ႈလူင်ၵႂႃႇတူၵ်းတီႈ ဝၢၼ်ႈသၢႆလေး တိူဝ်ႉၺႃး ၵူၼ်းဝၢၼ်ႈ ၽူႈၸၢႆးတၢႆ ၵေႃႉၼိုင်ႈ။
ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈ လၢမ်းလိမ်းပွႆႇမၢၵ်ႇ တိူဝ်ႉၺႃးၵူၼ်းမိူင်း။ ၵူၼ်းၼႂ်းဝဵင်း 4 ပုၼ်ႈ 3 ပုၼ်ႈ ပၢႆႈဢွၵ်ႇမူတ်းယဝ်ႉ။ ဢမ်ႇပေႃး ၶႂ်ႈၵိုတ်းသင်ယဝ်ႉ။ ၵူဝ်ၶိူင်ႈမိၼ် မႃးပွႆႇမၢၵ်ႇလႄႈ ၽႂ်ဢမ်ႇႁတ်းယူႇ။ ယၢမ်းလဵဝ်သမ်ႉ သိုၵ်းတင်းသွင်ၾၢႆႇ ထႅမ်ႁႅင်းသိုၵ်းဝႆႉ”- ဝႃႈၼႆ။
ၵူၼ်းၼႂ်းမိူင်း ဝဵင်းသီႇပေႃႉ ဢမ်ႇႁတ်းယူႇသေ ဢွၼ်ၵၼ်ပၢႆႈၽေးသိုၵ်း ၵႂႃႇယူႇၸွမ်းဝၢၼ်ႈဢိူင်ႇ ၼႂ်းၸႄႈဝဵင်းသီႇပေႃႉ၊ ၵေးသီး၊ ဝဵင်းလိူဝ်ႇ၊ တူၼ်ႈတီး ၸိူဝ်းၼႆႉ။
ၸိူဝ်းဢၼ်ဢမ်ႇၶႂ်ႈပွႆႇပႅတ်ႈႁိူၼ်းယေး ၸဝ်ႈၵဝ်ႇတႄႉ ဢွၼ်ၵၼ်ပၢႆႈၵႂႃႇသွၼ်ႈဝႆႉ ၸွမ်းဝၢၼ်ႈ ၸိူဝ်းမီးသၢပ်ႇဝဵင်း မိူၼ် ၼင်ႇ – တၢင်းဝၢၼ်ႈတိုင်းၶႄႈ၊ တိုင်းၸၢမ် ၸိူဝ်းၼႆႉၵေႃႈမီး။ ၸိူဝ်းဢမ်ႇယွမ်းငိူင်ႉပၢႆႈသေ သိုပ်ႇယူႇဝႆႉၼႂ်းဝဵင်းၼၼ်ႉ ၸၢၵ်ႇမၢၵ်ႇတိူဝ်ႉသႂ်ႇသေ မၢတ်ႇၸဵပ်းလူႉတၢႆ – ၵူၼ်းပိုၼ်ႉတီႈ လၢတ်ႈၼင်ႇၼႆ။
ပၢင်တိုၵ်း တီႈဝဵင်းသီႇပေႃႉၼႆႉ တႄႇပဵၼ်မႃး မိူဝ်ႈဝၼ်းတီႈ 10 ဢေႃႊၵတ်ႊသ် တေႃႇထိုင် ဝၼ်းတီႈ 16/08/2024 ၼႆႉ ၵူၼ်းပိုၼ်ႉတီႈ ဢၼ်လႆႈလူႉတၢႆ ယွၼ်ႉပၢင်တိုၵ်းမီးၸမ် 20 ၵေႃႉယဝ်ႉ။ ၵူၼ်းမၢတ်ႇၸဵပ်းမီး 48 ၵေႃႉ ယဝ်ႉၼႆ – ၸုမ်းၸွႆႈထႅမ် လွင်ႈမၢတ်ႇၸဵပ်းလူႉတၢႆၵေႃႈ တႅမ်ႈတၢင်ႇဝႆႉၼင်ႇၼႆ။
ယၢမ်းလဵဝ် တီႈဝဵင်းသီပေႃႉ ပၢင်တိုၵ်းယဵၼ်ဝႆႉယူႇသေတႃႉ ဢၼ်ပဵၼ်ၸုမ်းဢူၺ်းလီသၢမ်ၸုမ်း သိုၵ်းတဢၢင်း TNLA ၊ သိုၵ်းၵဝ်ႈၵၢင်ႉ MNDAA ၶဝ်ဝႃႈ ၼင်ႇႁိုဝ် တေဢမ်ႇပဵၼ်ပၢင်တိုၵ်း၊ ၼင်ႇႁိုဝ် ဝၢၼ်ႈသူၼ် ႁိူၼ်းယေးၵူၼ်းမိူင်း တေဢမ်ႇလူႉၼၼ်ႉ သိုၵ်ႈမၢၼ်ႈ ထုၵ်ႇလီဝၢင်းၶိူင်ႈသေ ငိူင်ႉဝႄႈပွႆႇပၼ် – ဝႃႈၼႆဝႆႉ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ