ၼႂ်းထုင်ႉပူင်းၼႆႉ ယၢမ်းလဵဝ် ၾူၼ်တူၵ်းထပ်းၵၼ်လၢႆဝၼ်းလႄႈ ႁဵတ်းႁႂ်ႈၼမ်ႉၼွင်းထူမ်ႈတူင်ႈၼႃး ၵူၼ်းမိူင်း ဢမ်ႇယွမ်းႁဵင်ဢေႊၶိူဝ်ႊ ၽွင်းၼႆႉသမ်ႉ ပဵၼ်ၽွင်းလူဝ်ႇပၢတ်ႇၶဝ်ႈလႄႈ ၸဝ်ႈၼႃးၶဝ် ထူပ်းလွင်ႈယၢပ်ႇၽိုတ်ႇ မီးလွင်ႈလူႉသုမ်းၼမ်။

ၸဝ်ႈၼႃး ၼႂ်းထုင်ႉပူင်း လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉထူမ်ႈၼႃးၼႆႉ ၶႂ်ႈထူမ်ႈၵူႈဝၢၼ်ႈယဝ်ႉ။ ဢၼ်မီးၼႂ်းထုင်ႉပူင်းၼႆႉ မိူၼ်ၼင်ႇ တီႈဝၢၼ်ႈသၢႆလႄး၊ ၼွင်ၸၢင်ႉ၊ ၵုၼ်သၢႆးတင်း ဝၢၼ်ႈပူင်း ၸိူဝ်းၼႆႉ ၼမ်ႉထူမ်ႈၼမ် ဢေႊၶိူဝ်ႊမၼ်း မွၵ်ႈႁဵင်ပၢႆၼႆႉယဝ်ႉ ဢၼ်ၺႃးၼမ်ႉလုပ်ႇထူမ်ႈၼႆႉ ယွၼ်ႉဝႃႈ ႁူင်းၶဝ်ႈၼႆႉ သုၵ်းလီယဝ်ႉ လူဝ်ႇပၢတ်ႇၵူၺ်း မႃးၺႃးၼမ်ႉထူမ်ႈၸိူင်ႉၼႆမူတ်းၶႃႈဢေႃႈ”- ဝႃႈၼႆ။

ၵွပ်ႈၼႆလႄႈ ပေႃးတေဝႆႉၵေႃႈ တေဢွၵ်ႇၼေႃႇဢွၵ်ႇငူင်းမႃး ဢမ်ႇၸၢင်ႈဝႆႉယဝ်ႉလႄႈ ဢၼ်ပၢတ်ႇၵေႃႈပၢတ်ႇ ၸိူဝ်းၼမ်ႉထူမ်ႈၼႃးႁႅင်းသေ ထိုင်တီႈဢမ်ႇၸၢင်ႈလူင်းပၢတ်ႇ ပွႆႇဝႆႉၸိူင်ႉၼၼ် ၶၢမ်ႇသုမ်းၵေႃႈ မီးၼမ်။ ဢၼ်ၼမ်ႉထူမ်ႈၼႃးပွၵ်ႈၼႆႉ လႆႈၶဝ်ႈမၼ်းၵမ်ႈဢေႇၵူၺ်း ယွၼ်ႉတေပႃးဢၼ်ၽၢင်းမၼ်းမႃးၼမ် ၶဝ်ႈဢမ်ႇၶႅမ်ႉ ၸဝ်ႈၼႃးလူႉသုမ်းၼမ် – ၸဝ်ႈၼႃးလၢတ်ႈ။  

ၼႂ်းပီ 2024 ၼႆႉၵူၺ်း ၼမ်ႉထူမ်ႈၼႃးၵူၼ်းမိူင်း ၼႂ်းထုင်ႉပူင်းၼႆႉ ဢမ်ႇယွမ်း 2 ပွၵ်ႈ။ ပွၵ်ႈၼႆႉ လႆႈဝႃႈထူမ်ႈႁႅင်းလိူဝ်ၵူႈပီလႄႈ တႃႇၸဝ်ႈၼႃးၶဝ် တေပၢတ်ႇၶဝ်ႈဢၼ်ၸူမ်ဝႆႉ ၼႂ်းၼမ်ႉၼၼ်ႉ မီးလွင်ႈယၢပ်ႇဝႆႉထႅင်ႈ။ 

“ၼမ်ႉၼႆႉ ၼွင်းၵေႃႈၼွင်းႁႅင်း ယဝ်ႉၵေႃႈ ၼမ်ႉၶိုၼ်ႈလိူဝ်ၵူႈပီ။ ဢၼ်ၼမ်ႉၶိုၼ်ႈၵူႈပီၼႆႉ တၢင်းတႅမ်ႇလိူဝ်ပီၼႆႉ သွင်ထတ်းမွၵ်ႈၼႆႉဢေႃႈ။ ပီၼႆႉ လႆႈဝႃႈၼမ်ႉၶိုၼ်ႈႁႅင်းဢေႃႈ ပေႃးၼမ်ႉၶိုၼ်ႈႁႅင်းၵေႃႈ တႃႇတေပၢတ်ႇၶဝ်ႈၼႆႉ မၼ်းပၢတ်ႇယၢပ်ႇၼႃႇ။ ၵူၼ်းလႆႈလူင်း ယူႇၼႂ်းၼမ်ႉသေပၢတ်ႇဢဝ်။ ၵူၼ်းၵိၼ်ၸၢင်ႈပၢတ်ႇၵေႃႈ ဢမ်ႇမီး လႆႈၸၢင်ႈၵူၼ်းမႃးမဝ်လုမ်း ပၢတ်ႇဢဝ် ၸိူင်ႉၼၼ်ဢေႃႈ”- ၸဝ်းၼႃး သိုပ်ႇလၢတ်ႈၼင်ႇၼႆ။

ၵဵဝ်ႇလူၺ်ႈလွင်ႈၼမ်ႉထူမ်ႈၼႆႉသေ ၸဝ်ႈၼႃးၶဝ် လႆႈယိုၼ်ႈလိၵ်ႈထိုင် ၸုမ်းၵဵဝ်ႇၶွင်ႈ ၽူႈမီးပုၼ်ႈၽွၼ်းၶဝ်မႃးၵူႈပီသေတႃႉ တေႃႇထိုင်ဝၼ်းမိူဝ်ႈၼႆႉ ယင်းပႆႇလူင်းမႃးထတ်းထွင်တူၺ်းလႄႈ ၵႄႈလိတ်ႈပၼ်ႁႃ ပၼ်ၵူၼ်းမိူင်း ၼႆယဝ်ႉ။

“ဢၼ်မႃးၸွႆႈမႃးတူၺ်းထိုင်ၼႆ မိူဝ်ႈၵူႈပွၵ်ႈၼႆႉ ပေႃးၸမ်ပၢင်လိူၵ်ႈတင်ႈမႃး ပႃႇတီႇဢၼ်ၼိုင်ႈယဝ်ႉ ဢၼ်ၼိုင်ႈ ၵႆႉမႃးၸွႆႈပၼ်တူၺ်းပၼ်ယူႇ။ မိူဝ်ႈလဵဝ်တႄႉ ဢမ်ႇမီးၽႂ်မႃးယဝ်ႉ။ ယဝ်ႉၵေႃႈ ၼႃးထုင်ႉပူင်းၼႆႉ ၵူင်မၼ်းၵႂၢင်ႈၼႃႇၶႃႈလူင် ပေႃးၾူၼ်တူၵ်းမႃးၵေႃႈ ၼမ်ႉၼႆႉမႃးၶွၼ်ႈၼႂ်းၼႃးၼႆႉ တိၵ်းတိၵ်း ၵူၺ်းဢေႃႈ။ ပေႃးၶဝ်ႈၼႃးထုင်ႉပူင်းလူႉသုမ်းၼမ်ၵေႃႈ ၵူၼ်းမိူင်းယၢပ်ႇၵိၼ်းၸႂ်ၼႃႇ။ ၵွပ်ႈၼႆလႄႈ မုင်ႈမွင်းၵူၼ်းလူင်ၶဝ် ၶုၼ်မိူင်းၶဝ် ၽူႈလႂ်ဢမ်ႇဝႃႈၼေႃႈ မုင်ႈမွင်း ၵူႈၸုမ်းၸုမ်းၶႃႈယဝ်ႉ။ ႁႂ်ႈမႃးတူၺ်းထိုင် မႃးၸွႆႈထႅမ်ပၼ် ပီႈၼွင်ႉၼႂ်းပူင်းႁဝ်းၶႃႈၼႆႉဢေႃႈ”- ၸဝ်ႈၼႃး တုၵ်းယွၼ်းလၢတ်ႈၼင်ႇၼႆ။

ပွတ်းထုင်ႉပူင်းၼႆႉ ၵူၼ်းမိူင်းႁဵတ်းၵိၼ်ၵၢၼ်သူၼ်ၵၢၼ်ၼႃး ပဵၼ်ပိူင်လူင်။ ၶဝ်ႈဢၼ်ဢွၵ်ႇ ၼႂ်းထုင်ႉပူင်းၼႆႉ လႆႈသူင်ႇၶၢႆပႃးတၢင်ႇတီႈတၢင်ႇဝဵင်း။ မိူၼ်ၼင်ႇ – ဝဵင်းပၢင်လူင်၊ ဝဵင်းလွႆလႅမ်၊ ဝဵင်းတူၼ်ႈတီးလႄႈ တၢင်းမိူင်းမၢၼ်ႈတူင်ႈပဵင်း ၸိူဝ်းၼၼ်ႉ တင်းၼမ်။