တီႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း ၽွင်းၵူၼ်းမိူင်းပၢႆႈၽေးသိုၵ်းယူႇၼၼ်ႉ ၽူႈလၵ်ႉလိူင်ႇၼမ်ႁၢႆႉႁႅင်း ၶဝ်ႈယႃႉသွၵ်ႈတဝ်ဢဝ်ၶူဝ်းၶွင် ႁဵတ်းႁႂ်ႈၵူၼ်းပၢႆႈၽေးသိုၵ်း မႆႈၸႂ်ႁိူၼ်းယေးၸဝ်ႈၵဝ်ႇ။
ဝၼ်းတီႈ 06/08/2024 မီးၶၢဝ်ႇလိုဝ်းဝႃႈ ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈ ၸႂ်ႉပၢႆႈၼႆလႄႈ ၵူၼ်းမိူင်း ၼႂ်းဝဵင်းသီႇသႅင်ႇ ဢွၼ်ၵၼ်ပၢႆႈၽေးသိုၵ်း။ ၽွင်းၵူၼ်းမိူင်း ဢမ်ႇယူႇႁိူၼ်းၼၼ်ႉ ၽူႈလၵ်ႉၶဝ်ႈယႃႉႁိူၼ်းယေး ဢဝ်ၶူဝ်းၶွင်ဢၼ်မီးၵႃႈ ၶၼ် ၵႂႃႇမူတ်းၼႆ ၵူၼ်းမိူင်းသီႇသႅင်ႇ ဢၼ်လႆႈပၢႆႈၽေးသိုၵ်းဝႆႉၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈ ၼင်ႇၼႆ။
“ၸႂ်ႈယဝ်ႉၶႃႈ ၽူႈလၵ်ႉၼမ်ၼႃႇ သိုၵ်းၵေႃႈလႆႈၵူဝ် ၽူႈလၵ်ႉၵေႃႈလႆႈၵူဝ်။ ဝၢၼ်ႈမိူင်းဢမ်ႇလီလႄႈ လႆႈပၢႆႈ ၽေးသိုၵ်းသေ ပေႃးပွၵ်ႈၶိုၼ်းႁိူၼ်းသမ်ႉ ၽူႈလၵ်ႉၶဝ်ႈဢဝ်ၶူဝ်းႁိူၼ်းၵႂႃႇမူတ်း ဢမ်ႇၵိုတ်းလိူဝ်သင်ယဝ်ႉ။ ၶူဝ်းၶွင် ဢၼ်ၶၢႆႉလႆႈ ၸိူဝ်းၼၼ်ႉ ၶဝ်ဢဝ်ၵႂႃႇမူတ်း”- ဝႃႈၼႆ။
ၽွင်းသိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ပိုတ်းယိုဝ်းၵၼ် တင်း PNLA မႃးၼႂ်းၶၢဝ်းတၢင်းမွၵ်ႈ 4 – 5 လိူၼ်ၼႆႉ ၵူၼ်းမိူင်းဝဵင်းသီႇသႅင်ႇ ဢွၼ်ၵၼ်ပၢႆႈၽေးသိုၵ်း၊ ၵမ်ႈၽွင်ႈ ပၢႆႈၵႂႃႇတၢင်းသၢႆးၶၢဝ်၊ ၵမ်ႈၽွင်ႈ ပၢႆႈၵႂႃႇတၢင်း ဝဵင်းတူၼ်ႈတီး။
ႁိူၼ်းဢၼ်ဢမ်ႇမီးၵူၼ်းပႂ်ႉၼၼ်ႉ ၽူႈလၵ်ႉၶဝ်ႈဢဝ်ၶူဝ်းၶွင် ၸဵမ်ရူတ်ႉၶိူင်ႈ၊ ရူတ်ႉထိပ်ႇ၊ သၢႆၾႆးၾႃႉ ယင်းဢမ်ႇဝႆႉၵိုတ်း တတ်းဢဝ်ၵႂႃႇမူတ်း ဢမ်ႇလိူဝ်သင်။ ၵွပ်ႈၼႆလႄႈ ၵူၼ်းပၢႆႈၽေးသိုၵ်း မႆႈၸႂ်ႁိူၼ်းယေး ၸဝ်ႈၵဝ်ႇသေ 2-3 ဝၼ်း ၼိုင်ႈပွၵ်ႈ လႆႈပွၵ်ႈမႃးၸႂ်းႁိူၼ်းၶိုၼ်း ဝႃႈၼႆ။
ၸဝ်ႈၼင်ႈၵျွင်း ဝဵင်းသီႇသႅင်ႇ တူၼ်ၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ –“ၸႂ်ႈယဝ်ႉဝႃႈ ၵူၼ်းလၵ်ႉၼမ်ၼႃႇ။ ၺွပ်းလႆႈ 8 ၵေႃႉ 9 ၵေႃႉယဝ်ႉ။ ငဝ်းလၢႆးတေႃႈလဵဝ် ႁဵတ်းၵၢၼ်ႁႃၵိၼ်လဵင်ႉတွင်ႉၵေႃႈယၢပ်ႇ၊ ဝၢၼ်ႈမိူင်းၵေႃႈ ဢမ်ႇလီလႄႈ ၵူၼ်းပၢႆႈၽေးသိုၵ်း ၵေႃႈၼမ်၊ ပေႃးဝၢၼ်ႈမိူင်းဢမ်ႇလီၵေႃႈ ၵူၼ်းမိူင်း လႆႈယၢပ်ႇၽိုတ်ႇၵိၼ်းၸႂ်” – ဝႃႈၼႆ။
ယွၼ်ႉပိူဝ်ႈ မႆႈၸႂ်ၵူဝ်ၽူႈလၵ်ႉၶဝ်ႈႁိူၼ်းလႄႈ ပေႃးမီးငဝ်းလၢႆးပၢင်တိုၵ်းသိုၵ်းသိူဝ်မႃး လႆႈဝႆႉၵူၼ်းပႂ်ႉႁိူၼ်း ၵေႃႉၼိုင်ႈသေ ၸင်ႇၸၢင်ႈငိူင်ႉပၢႆႈၽေးသိုၵ်း။
လွင်ႈၽူႈလၵ်ႉလိူင်ႇၼမ်ၼႆႉ ပလိၵ်ႈမၢၼ်ႈ၊ သိုၵ်းမၢၼ်ႈ ၽူႈၵွၼ်းပွၵ်ႉဢိူင်ႇ ၽူႈယႂ်ႇၵူၼ်းလူင်ၼႂ်းဝၢၼ်ႈ ၸိူဝ်းၼႆႉၵေႃႈ ဢမ်ႇဢဝ်လိူင်ႈ ဢမ်ႇၸွႆႈၵႅတ်ႇၶႄႁႄႉၵင်ႈပၼ်သင်လႆႈ။
တီႈဝဵင်းသီႇသႅင်ႇၼႆ့ ယၢမ်းလဵဝ် မီးၸုမ်းသိုၵ်းမၢၼ်ႈတင်း ပျီႇတူႉၸိတ်ႉ PNO လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈပ ဢူဝ်း PNLA တူင်ႉၼိုင်ဝႆႉ။ တင်ႈတႄႇ ဝၼ်းတီႈ 06/08/2024 မႃးၶိုၼ်းပိုတ်းယိုဝ်းၵၼ်လႄႈ ၵူၼ်းၼႂ်းဝဵင်းသီႇသႅင်ႇလႄႈ ႁိမ်းႁွမ်းမွၵ်ႈ 10 ဝၢၼ်ႈ ဢွၼ်ၵၼ်ငိူင်ႉပၢႆႈၽေးသိုၵ်း မီးမွၵ်ႈ 3,000 ၵေႃႉ လႆႈႁူႉၼင်ႇၼႆ ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇ ၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ