သိုၵ်းမၢၼ်ႈဢဝ်ၶိူင်ႈမိၼ်သိုၵ်းပွႆႇမၢၵ်ႇသႂ်ႇ ၼႂ်းထုင်ႉသၼဵၼ်း ဝဵင်းပၢင်လူင်

မိူဝ်ႈၼႆႉ ယၢမ်းဝၢႆးဝၼ်း 3 မူင်း 45 မိၼိတ်ႉ ဢမ်ႇမီးပၢင်တိုၵ်း သိုၵ်းသိူဝ် သင်သေ သိုၵ်းမၢၼ်ႈဢဝ် ႁိူဝ်းမိၼ် မႅင်းမီႈ 4 လမ်း မႃးပွႆႇမၢၵ်ႇသႂ်ႇ ၼႂ်းပိုၼ်ႉတီႈ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA တၢင်းပွတ်းသၼ်လွႆ သၼဵၼ်း ဝဵင်းပၢင်လူင်။

ဝၼ်းတီႈ 7 လိူၼ်ဢေႃးၵတ်ႉသ် ပီ 2024 ၼႆႉ ႁိူဝ်းမိၼ် မႅင်းမီႈ သိုၵ်းမၢၼ်ႈ မႃး လဵပ်ႈႁဵၼ်း 2 လမ်းသေပွၵ်ႈမိူဝ်း။ ၶိုၼ်းမႃးထႅင်ႈ 2 လမ်းသေ ပွႆႇမၢၵ်ႇသႂ်ႇ ႁိမ်းဝၢၼ်ႈ ၼႃးၸိုၼ်း ဢိူင်ႇၼႃးတဵတ်ႇ ဢၼ်တိတ်းၵပ်းတင်း ဢိူင်ႇပၢင်ႇႁူႈ ႁၢင်ႇၵႆ ဝဵင်းပၢင်လူင် ၸႄႈတွၼ်ႈလွႆလႅမ် မွၵ်ႈ 20 လၵ်း။

ၵဵဝ်ႇၵပ်းလွင်ႈၼႆႉသေ ၵူၼ်းထုင်ႉသၼဵၼ်း ဝဵင်းပၢင်လူင်လၢတ်ႈဝႃႈ ႁိူဝ်းမိၼ် သိုၵ်းမၢၼ်ႈ မႃးပွႆႇမၢၵ်ႇသႂ်ႇတင်းမူတ်း 8 လုၵ်ႈ တူၵ်းႁိမ်းတပ်ႉပၢင်သဝ်း ပႃႇတီႇမႂ်ႇသုင်ၸိုင်ႈတႆး ဢၼ်ၵမ်ႉၼမ် ပဵၼ်ၵူၼ်းဝႃႉ သႂ်ႇသိူဝ်ႈၶူဝ်းသိုၵ်း SSPP သေယူႇသဝ်းဝႆႉၼၼ်ႉဝႃႈၼႆ။

သိုၵ်းမၢၼ်ႈၼႆႉ ဢမ်ႇမီးပၢင်တိုၵ်းသင်သေ မိူဝ်ႈသိုၼ်း ၼၼ်ႉၵေႃႈ ပွႆႇမၢၵ်ႇသႂ်ႇ ၵၢင်ဝဵင်းၵူတ်ႉၶၢႆ မီးၵူၼ်းတၢႆ 6 ၵေႃႉ မၢတ်ႇၸဵပ်း 10 ပၢႆ ။ ၸိူင်ႉၼၼ် ၼင်ႇၵဝ်ႇ မိူဝ်ႈႁၢင်လိူၼ်ၵျူႊလၢႆႊပူၼ်ႉမႃးၼၼ်ႉၵေႃႈ ပွႆႇမၢၵ်ႇသႂ်ႇၵၢင်ဝဵင်းသႅၼ်ဝီ ၵူၼ်းတၢႆ 10 ပၢႆ မၢတ်ႇၸဵပ်း 30 ၵေႃႉပၢႆ။