ၼႂ်းဝၼ်းတီႈ 7/8/2024 မိူဝ်ႈၼႆႉ ယၢမ်းဝၢႆးဝၼ်း 2 မူင်း  ပၢင်တိုၵ်းၵေႃႈဢမ်ႇပဵၼ်သေတႃႉ သိုၵ်းမၢၼ်ႈဢဝ်ႁိူဝ်းမိၼ်သိုၵ်း   Jetfighter  မႃးပွႆႇမၢၵ်ႇသႅၼ်း  500 ပွၼ်ႊ ထႅင်ႈတီႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ ၊ ၼႂ်းဝူင်ႈၼႆႉပဵၼ်လွင်ႈပွႆႇမၢၵ်ႇ ပွၵ်ႈၵမ်း 2 ။

 ၵူၼ်းမိူင်းဝဵင်းၵူတ်ႇၶၢႆ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈမိူဝ်ႈၵႆႈၼႆႉ သိုၵ်းမၢၼ်ႈဢဝ်ႁိူဝ်းမိၼ်သိုၵ်း  မႃးပွႆႇမၢၵ်ႇၵႂႃႇထႅင်ႈတီႈ ၵွင်းပိဝ်ႇႁႃႇ 2 လုၵ်ႈၶႃႈဢေႃႈ။ ၶဝ်မႃးပွႆႇ ၵမ်းလုၵ်ႈလုၵ်ႈ  2 ၵမ်း  ပဵၼ်မၢၵ်ႇသႅၼ်း  500  ပွၼ်ႊၼႆဢေႃႈ။ လွင်ႈမၢတ်ႇၸဵပ်းလူႉတၢႆတေႉဢမ်ႇမီးၶႃႈ မၼ်းတူၵ်းသႂ်ႇၼႂ်းသူၼ်ပိူၼ်ႈၶႃႈဢေႃႈ ႁိူၼ်းယေးၵူၼ်းမိူင်းတႄႉတိူဝ်ႉၺႃးၽွင်ႈယူႇၼႆဢေႃႈ ” ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 5 /8/2024 ၼႆႉၵေႃႈ ၸုမ်းသိုၵ်းမၢၼ်ႈဢဝ်ႁိူဝ်းမိၼ်တိုၵ်းမႃးပွႆႇမၢၵ်ႇ 7 လုၵ်ႈ ၼႂ်းဝဵင်းၵူတ်ႉၶၢႆ ယဝ်ႉပွၵ်ႈၼိုင်ႈ။  ၽွင်းၼၼ်ႉၾႆးမႆႈၵၢတ်ႇဝဵင်းၵူတ်ႉၶၢႆၵႂႃႇ ၶိုင်ႈၼိုင်ႈ(ၾႆးမႆႈ ႁၢၼ်ႉၶၢႆၶူဝ်းမွၵ်ႈ 400 ႁၢၼ်ႉ) မီးလွင်ႈလူႉသုမ်း ၼပ်ႉႁူဝ်မိုၼ်ႇသႅၼ်ပျႃး။ လိူဝ်ၼၼ်ႉၵူၼ်းမိူင်း တိူဝ်ႉၺႃးၸၢၵ်ႇမၢၵ်ႇလူႉတၢႆမီး 6 ၵေႃႉလႄႈ မၢတ်ႇၸဵပ်းႁၢဝ်ႈႁႅင်း 3 ၵေႃႉဝႃႈၼႆ။

ၼွၵ်ႈလိူဝ်တီႈဝဵင်းၵူတ်ႉၶၢႆယဝ်ႉ   ဝဵင်းသႅၼ်ဝီ ၊ ဝဵင်းလၢဝ်ႇၵၢႆးၵေႃႈ သိုၵ်းမၢၼ်ႈၵႆႉဢဝ်ႁိူဝ်းမႃးပွႆႇမၢၵ်ႇလႄႈ ႁဵတ်းႁႂ်ႈၵူၼ်းမိူင်း မႆႈၸႂ်လွင်ႈႁူမ်ႇလူမ်ႈ။ ၵမ်ႈၽွင်ႈပၢႆႈၵႂႃႇသွၼ်ႈဝႆႉၸွမ်းဝဵင်းမူႇၸေႊ၊ ဝဵင်းၼမ်ႉၶမ်းလႄႈ  မိူင်းယူႉ။ ၵမ်ႈၽွင်ႈၸိူဝ်းဢၼ်ပၢႆႈၶဝ်ႈသွၼ်ႈၼႂ်းမိူင်းၶႄႇၵေႃႈမီးတၢင်းၼမ်ဝႃႈၼႆ။

မိူဝ်ႈဝႃးဝၼ်းတီႈ 6 ၵေႃႈသိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇသႂ်ႇၼႂ်းဢိူင်ႇၼွင်ၵေႃႈ တီႈသိုၵ်း MNDAA ၶဝ် ယူႇသဝ်းဝႆႉ။ ၸၢၵ်ႇမၢၵ်ႇတိူဝ်ႉၺႃးသင်ၶၸဝ်ႈတူၼ်ၼိုင်ႈလူႉလွၼ်ႇ။ ၵူၼ်းႁိူၼ်းၵေႃႉၼိုင်ႈလူႉတၢႆ။ သင်ၶၸဝ်ႈ ထႅင်ႈတူၼ်ၼိုင်ႈၵေႃႈ မၢတ်ႇၸဵပ်းလႆႈယူတ်းယႃတူဝ်ဝႆႉတီႈႁူင်းယႃၼမ်ႉလၼ်ႈ။

ၵဵဝ်ႇလူၺ်ႈလွင်ႈသိုၵ်းမၢၼ်ႈၵႆႉဢဝ်ႁိူဝ်းမိၼ်မႃးပွႆႇမၢၵ်ႇၸွမ်းဢၼ်ဢမ်ႇမီးပၢင်တိုၵ်း မိူၼ်ၼင်ႇဝဵင်းၵူတ်ႉၶၢႆ ၊ ဝဵင်းသႅၼ်ဝီ ၊ ဝဵင်းလၢဝ်ႇၵၢႆးၼႆႉ ယူႇတီႈၸုမ်းဢူၺ်းလီ 3 ၸုမ်း ဢၼ်မီးၸုမ်း သိုၵ်းၵဝ်ႈၵၢင်ႉ MNDAA ၊ ၸုမ်းသိုၵ်းတဢၢင်း TNLA ၸုမ်းသိုၵ်းရၶၢႆႇ AA လႆႈသူင်ႇလိၵ်ႈတုၵ်းယွၼ်းတီႈမိူင်းၶႄႇ လႄႈ လၢႆလၢႆမိူင်း ၼႂ်းဝၼ်းတီႈ 7 / 8/ 2024 ၼႆႉ ဝႃႈ ႁႂ်ႈသူၼ်းဢီးႁၢမ်ႈႁႄႉသိုၵ်းမၢၼ်ႈ လွင်ႈဢဝ်ႁိူၼ်းယေးၵူၼ်းမိူင်းဝႆႉပဵၼ်ပဝ်ႉမၢႆၵၢၼ်သိုၵ်း ဝႃႈၼႆ။