ၽွင်းပၢင်တိုၵ်းၼၼ်ႈယူႇ ၼႂ်းမိူင်းတႆးပွတ်းႁွင်ႇလႄႈ ပွတ်းၸၢၼ်းၼႆႉ ၵူၼ်းဝၢၼ်ႈၵူၼ်းမိူင်း ပၢႆႈဢွၵ်ႇႁိူၼ်း ၵႂႃႇသွၼ်ႈယူႇတီႈလွတ်ႈၽေး တၢင်ႇတီႈတၢင်ႇဝဵင်း။

ဝၼ်းတီႈ 31/07/2024 ပီႈၼွင်ႉၵူၼ်းမိူင်းတူၼ် ၊ မႄႈၵႅၼ်း ၊ ၼႃးၵွင်းမူး ၊ ပုင်ႇပႃႇၶႅမ် ၸိူဝ်းၼႆႉ ႁူမ်ႈၵၼ် ၶွတ်ႇၽွတ်ႈ  Committee (ၶွမ်ႊမတီႊ ပွင်ၵၢၼ်တႃႇၸွႆႈထႅမ် ၵူၼ်းပၢႆႈၽေး ၸႄႈဝဵင်းမိူင်းတူၼ်) သေ ဢုပ်ႇၵုမ်ၵၼ် ၶပ်းၶိုင်ႁၢင်ႈႁႅၼ်းယဝ်ႉ ပိုၼ်ၽၢဝ်ႇ တႃႇႁပ်ႉၸွႆႈၵူၼ်းပၢႆႈၽေးသိုၵ်း။

တီႈမိူင်းတူၼ်ၼႆႉ ၶပ်းၶိုင်ဝႆႉတီႈ ႁူင်းထမ်း (ပီၵွၼ်းငိုၼ်း)  ပိတၵၢတ်ႈ မိူင်းတူၼ် ၊ ဝတ်ႉသူၼ်သိူဝ်း၊  ( ၵျွင်းဢူးယဵၼ် ) ၊ ၵျွင်းလွႆ (ၵျွင်းတပ်ႉဢူး)  ဝႃႈၼႆ။

ႁူဝ်ပဝ်ႈ ၾၢႆႇႁပ်ႉၵူၼ်းပၢႆႈၽေးသိုၵ်း ၸဝ်ႈသြႃႇဝိမလ လၢတ်ႈတီႈၽူႈတွႆႇႁွၵ်ႈဝႃႈ -“ၸဝ်ႈႁဝ်းၶဝ် ဝူၼ်ႉဝႃႈ ပေႃးဢမ်ႇ ၸွႆႈၵၼ်တႄႉ ၵူၼ်းမိူင်း တေၶၢၼ်ၸႂ်ၼႃႇ ၵူဝ်ဢမ်ႇမီးတီႈယူႇတီႈသဝ်း။ ပဵၼ်ၵူၼ်းမိူင်းလဵဝ်ၵၼ် ပဵၼ်ၶိူဝ်းလဵဝ်ၵၼ် ပေႃးဢမ်ႇတူၺ်းလူၵၼ် ၽႂ်တေတူၺ်းလူႁဝ်း။ ၵွပ်ႈၼႆလႄႈ ၸင်ႇလႆႈႁွင်ႉပၢင်ၵုမ်ၵၼ်သေ ႁႃငိုၼ်းၵွင်ၵၢင် သိုဝ်ႉၶဝ်ႈၼမ်ႉတင်းၵိၼ်လႄႈ ႁၢင်ႈႁႅၼ်း တႃႇႁပ်ႉၸွႆႈထႅမ် ပီႈၼွင်ႉပၢႆႈၽေးသိုၵ်း မႃးလိုဝ်ႈသဝ်းလႆႈ ၸူဝ်ႈၶၢဝ်း”- ဝႃႈၼႆ။

ၼင်ႁိုဝ် ၵူၼ်းပၢႆႈၽေးသိုၵ်းသိူဝ် တေမီးလွင်ႈလူမ်ၸႂ် ၼႂ်းၵၢၼ်ယူႇသဝ်း လိုဝ်ႈၸႂ်ၼၼ်ႉ တေႁပ်ႉၼိုင်ႈၵျွင်းၼႆႉ 30 ၵေႃႉသေ ႁၢင်ႈႁႅၼ်းဝႆႉမီး 4 – 5 တီႈ ။ သင်ဝႃႈ တီႈမိူင်းတူၼ်ၼႆႉ တဵမ်ယဝ်ႉၸိုင် ႁၢင်ႈႁႅၼ်းဝႆႉထႅင်ႈတီႈ ၼႃးၵွင်းမူး၊ ပုင်ပႃႇၶႅမ် ၸိူဝ်းၼႆႉ ဝႃႈၼႆ ။

ၵူၼ်းပၢႆႈၽေးသိုၵ်း လႃႈသဵဝ်ႈၵေႃႉၼိုင်ႈလၢတ်ႈ တီႈၽူႈတွႆႇႁွၵ်ႈဝႃႈ -“ ယွၼ်ႉသိုၵ်းလႄႈ ၵူၼ်းမိူင်းၶဝ် လႆႈၽၢတ်ႇ ႁိူၼ်း ၽၢတ်ႇယေး မၢင်ၸိူဝ်း ဢမ်ႇမီးတီႈၵႂႃႇ ယၢပ်ႇၸႂ်တႄႉ လႆႈႁူႉဝႃႈမီးတီႈပိုင်ႈဢိင်ၸိူင်ႉၼႆ ပဵၼ်ဢၼ်ၸူမ်းတႄႉတႄႉဢေႃႈ”- ဝႃႈၼႆ။

သိုၵ်းမၢၼ်ႈလႄႈ သိုၵ်းၵဝ်ႈၵၢင်ႉ ပိုတ်းယိုဝ်းတိုၵ်းတေႃးၵၼ်ႁၢဝ်ႈႁႅင်း ၼႂ်းမိူင်းတႆးပွတ်းႁွင်ႇၼႆႉ ၵူၼ်းဝၢၼ်ႈၵူၼ်းမိူင်း ဢွၼ်ပၢႆႈၽေးသိုၵ်း ၽၢတ်ႇၽႄၵၼ်ၵႂႃႇယူႇၵေႃႉတီႈ ၵေႃႉတၢင်း။ ၵမ်ႈၼမ် ၵႂႃႇသွၼ်ႈယူႇဝႆႉၸွမ်း ၼႂ်းဝဵင်းၼမ်ႉလၼ်ႈ၊ ၵေးသီး၊ ဝဵင်းလၢႆးၶႃႈ၊ ဝဵင်းမိူင်းၵိုင်၊ ဝဵင်းပၢင်လူင်လႄႈ ဝဵင်းတူၼ်ႈတီး ၸိူဝ်းၼႆႉ မီးၼပ်ႉႁူဝ်သႅၼ်ၵေႃႉ။

တႅမ်ႈ- ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)