သိုၵ်းမၢၼ်ႈယိုတ်းမိူင်း တင်း ၸုမ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ် ၼႂ်းၸႄႈဝဵင်းသီႇပေႃႉ 3 ဝၼ်းထပ်းၵၼ်မႃး ၼႆႉ သွင်ၾၢႆႇမီးလွင်ႈမၢတ်ႇၸဵပ်းလူႉတၢႆၼမ်။

တႄႇဢဝ် ဝၼ်းတီႈ 28 – 31/07/2024 ၼႆႉ ၸုမ်းဢူၺ်းလီပွတ်းႁွင်ႇ ဢၼ်ပႃးသိုၵ်းၵဝ်ႈၵၢင်ႉ MNDAA  ၼၼ်ႉ လေႃႇတိုၵ်း တပ်ႉသိုၵ်းမၢၼ်ႈ ၶမယ 147 ဢၼ်ပၵ်းတပ်ႉဝႆႉ တီႈဝၢၼ်ႈၼွင်ၵေႃႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ သွင်ၾၢႆႇယိုဝ်းတိုၵ်းၵၼ် ႁၢဝ်ႈႁႅင်း၊ မၢၵ်ႇလူင်သိုၵ်းမၢၼ်ႈ တူၵ်းတႅၵ်ႇတီႈသိုၵ်းၵဝ်ႈၵၢင်ႉယူႇလႄႈ မီးလွင်ႈမၢတ်ႇၸဵပ်းလူႉတၢႆၼမ်ၼႆ – ၽူႈတူင်ႉၼိုင်ၵၢၼ်သိုၵ်း ၼႂ်းပိုၼ်ႉတီႈလၢတ်ႈ။

ယွၼ်ႉပၢင်တိုၵ်းၼႆႉသေ ၵူၼ်းမိူင်းပိုၼ်ႉတီႈ ႁူမ်ႈပႃး ၵူၼ်းပၢႆႈၽေးသိုၵ်း ၸိူဝ်းသွၼ်ႈယူႇဝႆႉ တီႈထုင်ႉၼမ်ႉလၼ်ႈၼၼ်ႉ ဢွၼ်ၵၼ်ငိူင်ႉပၢႆႈဝႆႉတင်းၼမ် ဝႃႈၼႆ။

ဢွင်ႇတီႈ ဢၼ်ၶဝ်ပဵၼ်ပၢင်တိုၵ်းၵၼ်ၼၼ်ႉ ယၢၼ်ၵႆဝဵင်းသီႇပေႃႉ 14 လၵ်း မီးၼႂ်းၵႄႈသီႇပေႃႉ – ၼမ်ႉလၼ်ႈ ပဵၼ်ၼႃႈတီႈ SSPP ၵုမ်းၵမ်ဝႆႉ။