ၶၢဝ်းတၢင်း 2 လိူၼ်မႃးၼႆႉ ပၢင်တိုၵ်း ၼႂ်းၸိုင်ႈတႆးပွတ်းႁွင်ႇ သိုပ်ႇပဵၼ်ႁၢဝ်ႈႁႅင်းၶိုၼ်း ဢၼ်ႁၢႆႉၸႃႉသုတ်းတႄႉ ပဵၼ်တီႈဝဵင်းၵျွၵ်ႉမႄး – လႃႈသဵဝ်ႈ ဢၼ်သိုၵ်းတဢၢင်း၊ သိုၵ်းၵဝ်ႈၵၢင်ႉလႄႈ သိုၵ်းမၢၼ်ႈ ပိုတ်ႇပၢင်တိုၵ်းတေႃႇၵၼ်မႃး ႁၢဝ်ႈ ႁႅင်းၼၼ်ႉသေ တုမ်ႉတိူဝ်ႉၵူၼ်းမိူင်း လႆႈမၢတ်ႇၸဵပ်းလူႉတၢႆၼမ် လႄႈ လႆႈငိူင်ႉပၢႆႈၽေးသိုၵ်း ဝၼ်းဝၼ်းၶိုၼ်းၶိုၼ်း ႁၢၼ်ႉတေႃႇထိုင်ဝၼ်းမိူဝ်ႈၼႆႉ။

ယၢမ်းလဵဝ် သိုၵ်း ၵဝ်ႈၵၢင်ႉသမ်ႉ မုင်ႈၸူးဝဵင်းၼမ်ႉလၼ်ႈထႅင်ႈ ၾၢႆႇသိုၵ်းမၢၼ်ႈၵေႃႈ ထႅမ်ႁႅင်းသိုၵ်း ၶဝ်ႈမႃးထႅင်ႈ တင်း ၼမ် မိူၼ်ၵၼ်။ တေႃႈလဵဝ်သမ်ႉ သိုၵ်း SSPP ၵေႃႈ ၶဝ်ႈဢဝ်တီႈယူႇဝႆႉ ၼႂ်းဝဵင်းၼမ်ႉလၼ်ႈထႅင်ႈလႄႈ ယိင်ႈၶႅၼ်းႁဵတ်း ႁႂ်ႈၵူၼ်းမိူင်းတူၵ်းၸႂ်ယုပ်းၽၢၼ်ႈ မႆႈၸႂ်ၵူဝ်ပဵၼ်ပၢင်တိုၵ်းယႂ်ႇလူင် မိူၼ်ဝဵင်းလႃႈသဵဝ်ႈ ၼႆယဝ်ႉ။

တႄႇဢဝ်ႁၢင်လိူၼ်ၵျူႊလၢႆႊၼႆႉမႃး သိုၵ်းၵဝ်ႈၵၢင်ႉ မႃးဢဝ်တီႈယူႇဝႆႉ ၸွမ်းၼႂ်းၵႄႈၼမ်ႉလၼ်ႈ – သီႇပေႃႉ မိူၼ်ၼင်ႇ တၢင်းဝၢၼ်ႈၼႃးမၢၵ်ႇၶေႃ၊ ဝၢၼ်ႈၵွင်းမူး၊ ဝၢၼ်ႈႁူဝ်ၼႃး၊ ၼွင်ၵေႃႈ ၸိူဝ်းၼႆႉ။ ယဝ်ႉၵေႃႈ ၸွမ်းသၢပ်ႇဝဵင်းၼမ်ႉလၼ်ႈ ၸိူဝ်းၼႆႉသမ်ႉ ထႅမ်ႁႅင်းသိုၵ်းဝႆႉထႅင်ႈ တင်းၼမ်။ ၾၢႆႇသိုၵ်းမၢၼ်ႈၵေႃႈ လုၵ်ႉတၢင်းပွတ်းၸၢၼ်းသေ ထႅမ်ႁႅင်းသိုၵ်းမႃးဢိူမ်ႈဝႆႉ ၼမ်ႉလၼ်ႈထႅင်ႈ တင်းၼမ်။

မိူဝ်ႈဝၼ်းတီႈ 29-31/07/2024 ပူၼ်ႉမႃးၼႆႉ သိုၵ်းမၢၼ်ႈ တီႈဝဵင်းၼမ်ႉလၼ်ႈ ယူႇၾၢႆႇလဵဝ်သေ ယိုဝ်းၵွင်ႈလူင် ၵႂႃႇတၢင်းၾၢႆႇႁွင်ႇဝဵင်းၼၼ်ႉ ၼိုင်ႈဝၼ်းလႂ် ဢမ်ႇယွမ်း 6 လုၵ်ႈ။ ပဵၼ်သဵင်ၵွင်ႈလူင် ပေႃးယိုဝ်းၼိုင်ႈၵမ်းလၢႆ ၼင်လိၼ်မိူင်းပေႃးသၼ်ႇ ယွၼ်ႈထိုင်ႁိူၼ်းယေး ႁဵတ်းႁႂ်ႈၵူၼ်းမိူင်းဢမ်ႇႁတ်းယူႇသဝ်း ဢွၼ်ၵၼ်ၶၢႆႉပၢႆႈဢွၵ်ႇဝဵင်းၼမ်။ ယၢမ်းလဵဝ် ၼႂ်းဝဵင်းၼမ်ႉလၼ်ႈၼႆႉ 3 ပုၼ်ႈလၢႆ ၵိုတ်းဝႆႉၼိုင်ႈပုၼ်ႈၵူၺ်းယဝ်ႉၼႆ ၵူၼ်းၼမ်ႉလၼ်ႈ လၢတ်ႈၼႄဝႆႉၼင်ႇၼႆ –

“မိူဝ်ႈသိုၼ်းၼၼ်ႉ ပေႃးမၢၼ်ႈၶဝ် ယိုဝ်းၵွင်ႈလူင်ၼိုင်ႈၵမ်းၼႆႉ မၢၵ်ႇၵွင်ႈလူင် သဵၼ်လတ်းၶၢမ်ႈပူၼ်ႉ ဝဵင်းၼမ်ႉလၼ်ႈ ၵႂႃႇလႄႈ ဢၢႆယၢမ်းလႄႈ ၸၢၵ်ႇယၢမ်းၵွင်ႈ ပေႃးၽူင်ႉပိဝ်တူၵ်းသႂ်ႇၼႂ်းဝၢၼ်ႈၼႂ်းသူၼ်ဢေႃႈ။ ၶဝ်သမ်ႉတင်ႈၸႂ် ယိုဝ်း ၵႂႃႇတၢင်းသိုၵ်းၵဝ်ႈၵၢင်ႉၶဝ်ယူႇဝႆႉ ၸိူဝ်းၼၼ်ႉဢေႃႈ။ ဝႃႈလႃးၵေႃႈ ၶဝ်ၶႂ်ႈၼႄဝႃႈ ၶဝ်တိုၵ်ႉမီးဢဵၼ်ႁႅင်းယူႇၼႆလႄႈ ယိုဝ်းၼႄႁိုဝ်ၵေႃႈ ဢမ်ႇႁူႉ”- ဝႃႈၼႆ။  

ၵူၼ်းၼမ်ႉလၼ်ႈ ဢၼ်ငိူင်ႉပၢႆႈဝႆႉ ယၢမ်းလဵဝ်သမ်ႉ ၵမ်ႈၼမ် တေပဵၼ်လုၵ်ႈဢွၼ်ႇလဵၵ်ႉလႄႈ ၵူၼ်းထဝ်ႈ ဢွၼ်ၵၼ် ၵႂႃႇသွၼ်ႈယူႇဝႆႉ တီႈလွတ်ႈၽေး။ မၢင်ၸိူဝ်း ၵႂႃႇယူႇဝႆႉၼႂ်းထဵင်ႁႆႈၼႃးလႄႈ ဝၢၼ်ႈဢၼ်ၵႆဝဵင်း ဢၼ်မီးတၢင်းတူၵ်းဝဵင်း၊ တၢင်းဢွၵ်ႇဝဵင်းလႄႈ တၢင်းၸၢၼ်းဝဵင်း ၸိူဝ်းၼႆႉ။ ၾၢႆႇႁွင်ႇဝဵင်းတႄႉ ဢမ်ႇမီးၽႂ်ႁတ်းၵႂႃႇယူႇ ယွၼ်ႉဝႃႈ သၢႆသိုၵ်းၶဝ်တူင်ႉၼိုင်ႈဝႆႉ တၢင်းပွတ်းတွၼ်ႈၼၼ်ႉၼႆ ၵူၼ်းပိုၼ်ႉတီႈလၢတ်ႈ။

ပေႃးတူၺ်းသဵၼ်ႈတႃႈသၢႆတၢင်း တႄႇဢဝ် လႃႈသဵဝ်ႈ – ၼမ်ႉပွင်ႈ တေႃႇပေႃးထိုင် သီႇပေႃႉၼႆႉ ဢွင်ႈတီႈ သိုၵ်းမၢၼ်ႈ ပၵ်းယူႇဝႆႉ တီႈဢၼ်ၵႅၼ်ႇၶႅင်ၼၼ်ႉ ဢမ်ႇပေႃးၶႂ်ႈမီးယဝ်ႉ ဢၼ်ၵိုတ်းဝႆႉၵေႃႈ တေပဵၼ်တီႈၼမ်ႉလၼ်ႈၼႆႉၵူၺ်း ယွၼ်ႉၼၼ် ၵူၼ်းမိူင်းတႄႉ ဢွၼ်ၵၼ်ၵူဝ်ၸုမ်းဢူၺ်းလီၶဝ် မႃးၽဵဝ်ႈၵႂၢတ်ႇလၢင်ႉပႅတ်ႈ တပ်ႉသိုၵ်းမၢၼ်ႈ တီႈၼမ်ႉလၼ်ႈၼႆႉထႅင်ႈ ဝႃႈၼႆ။

မိူဝ်ႈဝႃး ဝၼ်းတီႈ 31/07/2024 ၼႆႉ ၾၢႆႇသိုၵ်းတႆး SSPP ၵေႃႈ လၢတ်ႈတီႈၵူၼ်းမိူင်းဝႃႈ တႃႇၵႅတ်ႇၶႄ ၵူၼ်းမိူင်းၼႆသေ ဢွၼ်ၵၼ်ၶဝ်ႈဢဝ်တီႈယူႇဝႆႉ ၼႂ်းဝဵင်းၼမ်ႉလၼ်ႈ ၼပ်ႉႁူဝ်ႁဵင်။ ငဝ်းလၢႆးၼင်ႇၼႆ တီႈဝဵင်းၼမ်ႉလၼ်ႈၼႆႉ တေပဵၼ်ပၢင်တိုၵ်းႁႃႉ တေယဵၼ်ၵႂႃႇႁႃႉ ၼႆၼၼ်ႉ ၵူၼ်းမိူင်းဢမ်ႇၸၢင်ႈလၢမ်းလႆႈ ယွၼ်ႉဝႃႈ မီးသိုၵ်းငႃၵၼ်ဝႆႉ ပဵၼ် 3 ငႃးလူင်ၼႆ ၵူၼ်းၼမ်ႉလၼ်ႈ ၵေႃႉၼိုင်ႈ လၢတ်ႈၼႄ တၢင်းမႆႈၸႂ်ဝႆႉၼင်ႇၼႆ –

“သိုၵ်းမၢၼ်ႈၼႆႉ ၵိုတ်းတီႈၼမ်ႉလၼ်ႈၼႆႉၵူၺ်းယဝ်ႉ။ တေၵႂႃႇတၢင်းမိူင်းယႆၵေႃႈ ၶဝ်ၵူဝ်ၺႃးပိူၼ်ႈပႂ်ႉ လူမ်ႇတိုၵ်းၶဝ်။ ယၢမ်းလဵဝ် သိုၵ်းမၢၼ်ႈၼႆႉ ၵိုတ်းသၢႆၼႆႉၵူၺ်း။ တီႈၼမ်ႉလၼ်ႈၼႆႉ ႁႅင်းသိုၵ်းမၢၼ်ႈတႄႉ ဢမ်ႇၵႃႈႁိုဝ် ၵူၺ်းၵႃႈ ႁႅင်းၵွင်ႈၶဝ်ဢေႃႈၼမ်။ ၶဝ်တေမီးၵႃးထႅင်ႉ ၸိူဝ်းၼႆႉၼႃႇ။ ၵွင်ႈလူင်ၶဝ် ၼႆႉ ပေႃးယိုဝ်းၼိုင်ႈၵမ်းၼႆႉ ၵႂႃႇလႆႈ 3-4 လၵ်း ၶႃႈ ဢေႃႈ” – ဝႃႈၼႆ။

တီႈဝဵင်းၼမ်ႉလၼ်ႈၼႆႉ မီးဝႆႉတပ်ႉမၢၼ်ႈ ၶလယ 505 ၊ 506 လႄႈ 243 ၶပ်ႉယႆၵၼ်ဝႆႉ ပေႃးလုၵ်ႉတၢင်း လွႆလႅမ် – မိူင်း ၵိုင် မႃးၸိုင် တေမႃးတေႃႇသႂ်ႇတပ်ႉမၢၼ်ႈ ၸိူဝ်းၼႆႉ ၵမ်းသိုဝ်ႈ လႆႈဝႃႈတပ်ႉမၢၼ်ႈၸိူဝ်းၼႆႉ ပၵ်းဝႆႉတီႈ ႁၢင်ဝဵင်းၼမ်ႉလၼ်ႈ ၼႆယဝ်ႉ။

ဝဵင်းၼမ်ႉလၼ်ႈၼႆႉ တိတ်းၸပ်းဝႆႉ လၢႆဢိူင်ႇ မိူၼ်ၼင်ႇ – ဢိူင်ႇၼွင်ဝၼ်း၊ ဢိူင်ႇဝၢၼ်ႈလီ၊ ဢိူင်ႇသီႇထွၵ်ႈ၊ ဢိူင်ႇဝၢၼ်ႈ ၸိင်း ၸိူဝ်းၼႆႉ ၼိုင်ႈဢိူင်ႇလႂ် ဢမ်ႇယွမ်း 15 ဝၢၼ်ႈ။ ယၢမ်းလဵဝ် ပဵၼ်ၶၢဝ်းၽုၵ်ႇ မၢၵ်ႇၶဝ်ႈတဝ်ႈၼမ်ႉလႄႈ လူဝ်ႇလုမ်းလႃး တိူၵ်ႇႁႆႈလွၵ်းၼႃးဝႃႈၼႆသေတႃႉ ၵူၼ်းဝၢၼ်ႈၵူၼ်းမိူင်းတႄႉ မႆႈၸႂ် ၸူဝ်းၵၼ် ႁႃတၢင်းပၢႆႈၽေးၵူၺ်းလႄႈ ဢမ်ႇပဵၼ်ၵၢၼ်ပဵၼ်ငၢၼ်းသင်ယဝ်ႉ။ လုၵ်ႈဢွၼ်ႇၵေႃႈ ၶၢတ်ႇၵၢၼ်ႁဵၼ်း ၵူၼ်းထဝ်ႈၵူၼ်းၵႄႇ ၵူၼ်းၸိူဝ်းပၢႆးယူႇလီ ဢမ်ႇတဵမ်ထူၼ်ႈၶဝ်ၵေႃႈ ထူပ်းလွင်ႈယၢပ်ႇ ၶၢၼ်ၸႂ်ၵၼ်မူတ်း ဝႃႈၼႆ။

ၵူၼ်းပၢႆႈၽေးသိုၵ်း တၢင်းဝဵင်းမိူင်းယႆ – လႃႈသဵဝ်ႈ ဢၼ်ပၢႆႈႁွတ်ႈထိုင်ဝႆႉ တီႈဝဵင်းၼမ်ႉလၼ်ႈ ၸိူဝ်းၼႆႉၵေႃႈ ယၢမ်းလဵဝ် ဢွၼ်ၵၼ်သိုပ်ႇၶၢဝ်းတၢင်းၶၢႆႉပၢႆႈ တီႈယူႇထႅင်ႈၵေႃႈမီး။ ၵမ်ႈၽွင်ႈၵေႃႈဝႃႈ ပၢင်တိုၵ်း ပႆႇႁုၵ်ႉႁၢႆႉပဵင်းလႃႈသဵဝ်ႈၼႆသေ ဢွၼ်ၵၼ်ယဵၼ်ႉယူႇယဵၼ်ႉၵိၼ်ဝႆႉ။ မိူဝ်ႈတႄႇမၼ်း ၵူၼ်းပၢႆႈၽေးသိုၵ်း တီႈဝတ်ႉၽြႃးလူင်ၼမ်ႉလၼ်ႈၼႆႉ မီးၼပ်ႉႁူဝ်ႁဵင်။ ယၢမ်းလဵဝ် ၽူႈၵမ်ႉၸွႆႈၵူၼ်းပၢႆႈၽေး ၶဝ်ဝႃႈ ယွမ်းၵႂႃႇၼမ်ၼႃႇယဝ်ႉ ၵူၼ်းပၢႆႈၽေးၶဝ် သိုပ်ႇပၢႆႈၵႂႃႇတၢင်း ၸိုင်ႈတႆးပွတ်းၸၢၼ်းထႅင်ႈယဝ်ႉ ဝႃႈၼႆ။