ဝၼ်းတီႈ 30 ၵျူႊလၢႆႊ သိုၵ်းၶႄႇၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ ၽွင်းယၢမ်းပၢင်တိုၵ်းၽႅၼ်ယၼ်ႇသိုၵ်း 1027 ၼႆႉ တေၵႅတ်ႇၶႄႁႄႉၵင်ႈပၼ်ပၢႆးမၢၵ်ႈမီးလႄႈၵၢၼ်လူင်းတိုၼ်းလၢင်းၶူဝ်းၶွင်မိူင်းၶႄႇ ဢၼ်မီးၼႂ်းမိူင်းမၢၼ်ႈ မိူင်းတႆးပွတ်းႁွင်ႇ တင်းမူတ်းဝႃႈၼႆ။

ၼႂ်းၶေႃႈပိုၼ်ၽၢဝ်ႇၼၼ်ႉပႃးဝႆႉဝႃႈ- တေၶတ်းၸႂ်ႁူၺ်းႁွင်ႉၸုမ်းဢူၺ်းလီၶဝ်သေ တေလၢတ်ႈႁႂ်ႈပၼ်ၾၢင်ႉၵူၼ်းႁဵတ်းၵၢၼ်ၶဝ်ဝႃႈ ႁႂ်ႈငိူင်ႉဝႄႈပၼ်ဢၼ်တေၸၢင်ႈတုမ်ႉတိူဝ်ႉပၢႆးမၢၵ်ႈမီး လႄႈ ၵၢၼ်ဢၼ်တေပဵၼ်ၼမ်ႉတွၼ်းတႃႇမိူင်းၶႄႇၼၼ်ႉ ၊ သင်ဝႃႈႁၼ်မူႇၸုမ်းလႄႈၵူၼ်းၸိူဝ်းတေၵႂႃႇႁဵတ်းလွင်ႈတုမ်ႉတိူဝ်ႉၼၼ်ႉၵေႃႈႁႂ်ႈႁိပ်ႈႁၢႆးငၢၼ်းပၼ်တီႈၶွမ်ႊမတီႇၵၢၼ်သိုၵ်းႁႂ်ႈၶိုတ်းတၼ်းၵမ်းလဵဝ် ဝႃႈၼႆ။

လိူဝ်ၼၼ်ႉဢမ်ႇၵႃး ႁႂ်ႈၵႅတ်ႇၶႄႁႄႉၵင်ႈပၼ်ပႃး ပၢႆးမၢၵ်ႈမီးလႄႈၵၢၼ်လူင်းတိုၼ်းၵူၼ်းမိူင်းၸိူဝ်းယူႇၼွၵ်ႈမိူင်း လႄႈ ၵူၼ်းမိူင်းၸိူဝ်းလႈပၢႆႈၽေးသိုၵ်းဝႆႉၸိူဝ်းၼၼ်ႉဝႃႈၼႆ။

ဢၼ်လမ်ႇလွင်ႈသုတ်းတႄႉ ၽႂ်ႁၼ်ၵေႃႈႁႂ်ႈၸွႆႈထႅမ်ၵူၼ်းမိူင်းၶႄႇ ဢၼ်ၶမ်ဝႆႉၼႂ်းပၢင်တိုၵ်းသိုၵ်းသိူဝ်၊ ႁႂ်ႈၸွႆႈထႅမ်ၵူၼ်းမိူင်းၶႄႇ ဢၼ်မၢတ်ႇၸဵပ်းၼႂ်းပၢင်တိုၵ်း ဢမ်ႇၼၼ် ၸွႆႈၵႅတ်ႇၶႄပၼ်ပေႃးႁၼ်မီးၵူၼ်းယႃႉၶွမ်ႊပၼီႊလႄႈပၢႆးမၢၵ်ႈမီးၵူၼ်းမိူင်းၶႄႇ ဢၼ်ၺႃးယႃႉယူႇၼၼ်ႉ ဝႃႈၼႆ၊

ၵူၺ်းၵႃႈၼႂ်းဝၼ်းတီႈ 30 လႄႈ 31 ၵျူႊလၢႆႊၼႆႉ သိုၵ်းမၢၼ်ႈလႄႈသိုၵ်းၵဝ်ႈၵၢင်ႉ MNDAA သိုပ်ႇယိုဝ်းၵၼ်တီႈပွၵ်ႉ 9 ဝဵင်းလႃႈသဵဝ်ႈႁၢဝ်ႈႁႅင်း။ ႁိူၼ်းယေးၵူၼ်းမိူင်းၼႂ်းပွၵ်ႉၼၼ်ႉၵေႃႈၺႃးယႃႉ၊ သေ ၶဝ်ႈတဝ်ႈသွၵ်ႈဢဝ်ၶူဝ်းၶွင်။

သိုၵ်း MNDAA ၵေႃႈပိုၼ်ၽၢဝ်ႇဝႃႈ ယိုတ်းလႆႈပိုၼ်ႉတီႈဢၼ်လမ်ႇလွင်ႈၼႂ်းဝဵင်းလႃႈသဵဝ်ႈ လၢႆလၢႆဢၼ်ယဝ်ႉပႃးၸဵမ်တိူင်းသိုၵ်းယမၶ ၼႆသေတႃႉ ၾၢႆႇတၢင်း သိုၵ်းမၢၼ်ႈတႄႉၶိုၼ်းပိုၼ်ၽၢဝ်ႇတွပ်ႇဝႆႉဝႃႈ – တိူင်းသိုၵ်း ယမၶပႆႇတူၵ်း ဝႃႈၼႆဝႆႉ။

ၽူႈၶၢၼ်ပၢၵ်ႇ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းၶႄႇ မၢဝ်ႊၼိင်ႊ ၵေႃႈႁဵတ်းပၢင်သပ်းၸႅင်ႈၶၢဝ်ႇမိူဝ်ႈဝၼ်းတီႈ 25 ၵျူႊလၢႆႊၼၼ်ႉသေ ပၼ်ၾၢင်ႉလၢတ်ႈဝႃႈ – ပၢင်တိုၵ်းၼႂ်းၸိုင်ႈတႆးပွတ်းႁွင်ႇလႄႈလႅၼ်လိၼ်တႆး-ၶႄႇ ၼႆႉ ယႃႇႁႂ်ႈမၼ်းတုမ်ႉတိူဝ်ႉလွင်ႈႁူမ်ႇလူမ်ႈ ၵူၼ်းမိူင်းၶႄႇ၊ ပၢႆးမၢၵ်ႈမီးလႄႈ ၶူင်းၵၢၼ်လူင်ပွင်ၸိုင်ႈမိူင်းၶႄႇ ဢၼ်မီးၼႂ်းပိုၼ်ႉတီႈပၢင်တိုၵ်းၸိူဝ်းၼၼ်ႉ ဝႃႈၼႆ။