သိုၵ်းၵဝ်ႈၵၢင်ႉ ၵူတ်ႇထတ်း ၼႂ်းၵႄႈလႃႈသဵဝ်ႈ – မိူင်းယႆ ႁၢဝ်ႈႁႅင်း

ၽွင်းၵူၼ်းလႃႈသဵဝ်ႈ ပၢႆႈဢွၵ်ႇမႃးတၢင်းမိူင်းယႆၼႆႉ ၺႃးသိုၵ်းၵဝ်ႈၵၢင်ႉ ပႂ်ႉၸွမ်းတၢင်းၵူတ်ႇထတ်း ႁၢဝ်ႈႁႅင်း တီႈတၢင်း ၽႄမိူင်းယႆ – တၢင်ႉယၢၼ်း ႁဵတ်းႁႂ်ႈရူတ်ႉၵႃး ၵိုတ်းၶမ်ၸွမ်းသဵၼ်ႈတႃႇသၢႆ တၢင်းၼပ်ႉႁူဝ် ႁဵင်။

တႄႇဢဝ် ႁၢင်လိူၼ်ၵျူႊလၢႆႊၼႆႉမႃး သိုၵ်းၵဝ်ႈၵၢင်ႉ MNDAA ပႂ်ႉၵူတ်ႇထတ်း ၵူၼ်းမိူင်းၵႂႃႇမႃး ႁၢဝ်ႈႁႅင်း တီႈၵဵၵ်ႉလၢၼ်ႇ ဢိူင်ႇႁူဝ်ယ တၢင်းၽႄမိူင်းယႆ – တၢင်ႉယၢၼ်း ၼႂ်းၸႄႈဝဵင်းမိူင်းယႆ ၸိုင်ႈတႆးပွတ်းႁွင်ႇသေ ႁဵတ်းႁႂ်ႈရူတ်ႉၵႃး ၵိုတ်းၶမ်ၸွမ်းသဵၼ်ႈတၢင်းၼမ် တီႈဢေႇသုတ်းလႆႈပႂ်ႉ ၶၢဝ်းတၢင်းႁိုင် ဢမ်ႇယွမ်း 3 ၸူဝ်ႈမူင်း ၼႆယဝ်ႉ။

ၵူၼ်းဝဵင်းလႃႈသဵဝ်ႈ ဢၼ်ပၢႆႈဢွၵ်ႇမႃး တၢင်းမိူင်းယႆ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းၵဝ်ႈၵၢင်ႉၶႃႈဢေႃႈ ဢၼ် ၵူတ်ႇထတ်းၼႆႉ ၶဝ်တေၵူတ်ႇထတ်းမၢႆၾၢင်၊ ၾူၼ်း ယဝ်ႉၵေႃႈ ပေႃးၶဝ်ထၢင်ထိူမ်ၸိုင် တေ ၵူတ်ႇထတ်းပႃး ထူင်ၶူဝ်း ၸိူဝ်းၼႆႉထႅင်ႈဢေႃႈ။ ယွၼ်ႉၶဝ်ၵူတ်ႇထတ်း ၸိူင်ႉၼႆႁႅင်းသေ ႁဵတ်းႁႂ်ႈၵူၼ်းမိူင်း ပၢႆႈဢွၵ်ႇမႃး လႆႈၵိုတ်းၶမ်ႁိုင်ၼၼ်ႉ ၶႃႈယဝ်ႉ။ ဢၼ်ၶဝ်ၵူတ်ႇထတ်းၸိူင်ႉၼႆၼႆႉ မီးမႃးၶၢဝ်းတၢင်း 4-5 ဝၼ်းယဝ်ႉ”- ဝႃႈၼႆ။

ရူတ်ႉၵႃး ၵူၼ်းမိူင်းလႃႈသဵဝ်ႈ ဢၼ်မႃးၵိုတ်းၶမ်ႁိုင် ၸွမ်းသဵၼ်ႈတႃႈသၢႆတၢင်း ၼႂ်းၵႄႈလႃႈသဵဝ်ႈ – မိူင်းယႆၼႆႉ တၢင်းယၢဝ်းၵႃး ၵိုတ်းၶမ် တေမီး 1 လၵ်းပၢႆ ၼႆယဝ်ႉ။

“ဢၼ်ပၢႆႈမႃးၼႆႉ ပဵၼ်ၵူၼ်းလႃႈသဵဝ်ႈ ၵမ်ႈၼမ်ယဝ်ႉ ၸဵမ်ရူတ်ႉၶိူင်ႈ၊ ၵႃးၸိူဝ်းၼႆႉ မႃးၼမ်တႄႉၼမ်ဝႃႈ ၼၼ်ႉယဝ်ႉ။ ၵမ်ႈၼမ် မႃးတၢင်းမိူင်းယႆသေ ၵႂႃႇတၢင်းၵေးသီး၊ မိူင်းၵိုင်၊ လၢႆးၶႃႈ၊ မိူင်းသူႈ ၊ တူၼ်ႈတီး ၸိူဝ်းၼၼ်ႉဢေႃႈ။ မၢင်ၸိူဝ်း ၵေႃႈ ၵႂႃႇတၢင်းတၢင်ႉယၢၼ်းဢေႃႈ။ ဢၼ်ၶဝ်ၵူတ်ႇထတ်းၼၼ်ႉ တီႉလႆႈၵူၼ်းၵူႈဝၼ်း ၼိုင်ႈဝၼ်း 2-3 ၵေႃႉ ၵမ်ႈၼမ် ပဵၼ်ၵူၼ်းၸၢႆးဢေႃႈ”- ၵူၼ်းပိုၼ်ႉတီႈ ဝဵင်းမိူင်းယႆ လၢတ်ႈတီႈၽူႈတွႆႇႁွၵ်ႈၼင်ႇၼႆ။

ၵဵၵ်ႉလၢၼ်ႇ တီႈဢိူင်ႇႁူဝ်ယ ဢၼ်သိုၵ်းၵဝ်ႈၵၢင်ႉ ၵူတ်ႇထတ်းႁၢဝ်ႈႁႅင်းၼႆႉ တေယၢၼ်ဝဵင်းမိူင်းယႆ 5 လၵ်း။ တီႈႁိမ်း ၼၼ်ႉသမ်ႉ မီးဝႆႉၵဵၵ်း တပ်ႉသိုၵ်းၵဝ်ႈၵၢင်ႉ၊ သိုၵ်းဝႃႉ၊ သိုၵ်းမၢၼ်ႈလႄႈ သိုၵ်းတႆး SSPP ၸိူဝ်းၼႆႉ။