သိုၵ်းမၢၼ်ႈ ယိုတ်းမိူင်းလႄႈ သိုၵ်းတဢၢင်း TNLA တင်း ၸုမ်းၵႅတ်ႇၶႄၵူၼ်းမိူင်း PDF ယိုဝ်းၵၼ် တီႈ ဝဵင်းမိူင်းမိတ်ႈ၊ ၵူၼ်းမိူင်းတင်းဝဵင်း လႆႈပၢႆႈၽေးသိုၵ်း၊ ႁိူၼ်းယေးၵူၼ်းမိူင်း၊ ၵၢတ်ႇ၊ ဝတ်ႉဝႃးၽႃသိူဝ်ႇလႄႈ ႁူင်းႁဵၼ်းၸိူဝ်းၼႆႉ ၺႃး ၸၢၵ်ႇမၢၵ်ႇ လူႉၵွႆတင်းၼမ်။

ယၢမ်းလဵဝ် ၵူၼ်းဝဵင်းမိူင်းမိတ်ႈ ၵမ်ႈၼမ် ပၢႆႈႁွတ်ႈထိုင် တီႈဝဵင်းလိူဝ်ႇ (မၼ်းတလေး) မၢင်ၸိူဝ်း ပၢႆႈသွၼ်ႈယူႇၸွမ်း ႁိူၼ်းယေး ပီႈၼွင်ႉၽႂ်မၼ်းလႄႈ ၸွမ်းဝတ်ႉဝႃးၽႃသိူဝ်ႇ တေႃႈလဵဝ် ယၢပ်ႇၽိုတ်ႇၵိၼ်းၸႂ်ဝႆႉ လွင်ႈယူႇလွင်ႈၵိၼ်ႁင်း ၽႂ်မၼ်း။ သင်ဝႃႈ တေပွၵ်ႈၶိုၼ်း ဝၢၼ်ႈၵိူတ်ႇမိူင်းၼွၼ်းၽႂ်မၼ်းၵေႃႈ ဢမ်ႇမီးႁိူၼ်းယေးတီႈယူႇယဝ်ႉ ဝႃႈၼႆ။

ၼႂ်းပီ 2024 ၼႆႉ ပၢင်တိုၵ်းပဵၼ်ႁၢဝ်ႈႁႅင်း ၼႂ်းၸႄႈဝဵင်းမိူင်းမိတ်ႈ 2 ပွၵ်ႈ ၼႂ်းလိူၼ်ၵျႅၼ်ႊၼိဝ်ႊရီႊၼၼ်ႉ ပွၵ်ႈၼိုင်ႈလႄႈ ၼႂ်းလိူၼ်ၵျုၼ်ႊၼႆႉထႅင်ႈ ပွၵ်ႈၼိုင်ႈ ၼႂ်းၵႄႈၼၼ်ႉၵေႃႈ ပိုတ်းယိုဝ်းၵၼ်ယူႇ ဢမ်ႇထၢတ်ႇ။ ယၢမ်းလဵဝ် ၼႂ်းၵၢင်ဝဵင်းမိူင်းမိတ်ႈတႄႉ ပၢင်တိုၵ်းယဵၼ်ဝႆႉသေတႃႉ ၸွမ်းသၢပ်ႇဝဵင်းတႄႉ ယူႇယူႇၵေႃႈ ၸုမ်းသိုၵ်းလုၵ်ႉၽိုၼ်ႉလႄႈ သိုၵ်းမၢၼ်ႈၶဝ် တိုၵ်ႉသိုပ်ႇယိုဝ်းၵၼ်ယူႇ။

ၵူၼ်းမိူင်းမိတ်ႈ ပၢႆႈၽေးသိုၵ်းၵႂႃႇၵေႃႉတီႈၵေႃႉတၢင်း ၸိူင်ႉၼႆၼႆႉ ၵမ်ႈၼမ် ႁွတ်ႈထိုင် ဝဵင်းလိူဝ်ႇ ၼပ်ႉႁူဝ်ႁဵင်။ ၵူၼ်း ၼုမ်ႇ လုၵ်ႈဢွၼ်ႇၵေႃႈ ၶၢတ်ႇၵၢၼ်ႁဵၼ်း။ ၵူၼ်းဢႃယုယႂ်ႇ၊ ၵူၼ်းၸပ်းတၢင်းပဵၼ် ၸိူဝ်းၼႆႉၵေႃႈ လူႉတၢႆ ၽွင်းတိုၵ်ႉပၢႆႈ ၽေးသိုၵ်း။

ယၢမ်းလဵဝ် သိုၵ်းမၢၼ်ႈသမ်ႉ တတ်းလႅင်းၾူၼ်း၊ လႅင်းဢိၼ်ႊထိူဝ်ႊၼႅတ်ႊဝႆႉလႄႈ တႃႇႁူႉငဝ်းလၢႆးၼႂ်း ပိုၼ်ႉတီႈၵေႃႈ ဢမ်ႇငၢႆႈ။ ႁိူၼ်းယေးၵေႃႈ ၵွႆမူတ်းယဝ်ႉလႄႈ ပွၵ်ႈၶိုၼ်းၵေႃႈ ဢမ်ႇၸၢင်ႈမိူဝ်းယူႇတီႈလႂ်ယဝ်ႉ ၼၢင်းယိင်း ၵူၼ်းပၢႆႈ ၽေးမိူင်းမိတ်ႈ လၢတ်ႈၼႄဝႆႉၼင်ႇၼႆ –

“ႁဝ်းၶႃႈ ပႆႇၸၢင်ႈမိူဝ်းႁိူၼ်းၶႃႈ။ တိုၵ်ႉပၢႆႈသွၼ်ႈယူႇဝႆႉ တီႈဝဵင်းလိူဝ်ႇၼႆႉဢေႃႈ။ တီႈမိူင်းမိတ်ႈၼၼ်ႉ တပ်ႉမၢၼ်ႈ ဢၼ်မီးတီႈတၢင်းၶဝ်ႈဢွၵ်ႇဝဵင်းၼၼ်ႉ တိုၵ်ႉမီးယူႇၼႆဢေႃႈ။ ယဝ်ႉၵေႃႈ ၸွမ်းသၢပ်ႇဝဵင်း ၸိူဝ်းၼႆႉ ငိၼ်းဝႃႈ တိုၵ်းမီးလွင်ႈပိုတ်းယိုဝ်းၵၼ်ယူႇၼႆဢေႃႈ။ တႃႇၵပ်းသိုပ်ႇၸူး မိူဝ်းၼႂ်းပိုၼ်ႉတီႈၵေႃႈ ဢမ်ႇငၢႆႈၶႃႈ။ သိုၵ်းမၢၼ်ႈၶဝ် ပိၵ်ႉဢိုတ်းလႅင်းၾူၼ်းဝႆႉ။ ၶႂ်ႈမိူဝ်ႈၶိုၼ်းယူႇၵေႃႈ ဢမ်ႇႁတ်း။ ႁိူၼ်းယေးၵေႃႈ ၵွႆမူတ်းယဝ်ႉႁိုဝ်ၵေႃႈ ဢမ်ႇႁူႉ”- ဝႃႈၼႆ။  

ပၢႆႈၽေးထိုင်ဝဵင်းလိူဝ်ႇယဝ်ႉသေတႃႉ တႃႇမီးတီႈယူႇတီႈၵိၼ်ၵႂႃႇၵူႈမိုဝ်ႉၵူႈဝၼ်း ၼႆႉၵေႃႈဢမ်ႇငၢႆႈ မၢင်ၸိူဝ်းၵႂႃႇ ႁဵတ်း ၵၢၼ်ၼႂ်းႁၢၼ်ႉ ၵိၼ်ၸၢင်ႈလၢင်ႉဝၢၼ်ႇလၢင်ႉမေႃႈ၊ မၢင်ၸိူဝ်းၵေႃႈ ၵႂႃႇၵိၼ်ၸၢင်ႈတေႃႉ သၢႆးတေႃႉဢုတ်ႇ သၢင်ႈႁိူၼ်းသၢင်ႈယေး ၸိူဝ်းၼႆႉ။

မၢင်ၸိူဝ်းၵေႃႈ ဢမ်ႇမီးတိုၼ်းလၢင်း၊ ဢမ်ႇမီးႁႅင်းတူဝ်ႁႅင်းၸႂ်တႃႇႁဵတ်းၵၢၼ်လႄႈ ၸုၼ်ႉတူဝ်ၸႂ်သေ ပွၵ်ႈယူႇၶိုၼ်း မိူင်းမိတ်ႈၵေႃႈမီး ၼၼ်ႉၵေႃႈ ပီႈၼွင်ႉၵၼ်ဢမ်ႇၵပ်းသိုပ်ႇၵၼ်လႆႈလႄႈ ပွၵ်ႈမိူဝ်းသေ တၢႆႁိုဝ်လိပ်း ၼႆၼၼ်ႉ ဢမ်ႇမီးၽႂ်ႁူႉၸွမ်း ၵူၼ်းမိူင်းမိတ်ႈ ဢၼ်ပၢႆႈၽေးဝႆႉ တီႈဝဵင်းလိူဝ်ႇ လၢတ်ႈၼႄၼင်ႇၼႆ။

ၼႂ်းဝဵင်းမိူင်းမိတ်ႈၼႆႉ ၶွတ်ႇၽွတ်ႈဝႆႉပွၵ်ႉ ဢမ်ႇယွမ်း 4 ပွၵ်ႉ မိူၼ်ၼင်ႇ ပွၵ်ႉႁွင်ႇ၊ ပွၵ်ႉၸၢၼ်း၊ ပွၵ်ႉ လႅတ်ႉၶူၵ်ႉတၢၼ်း၊ ပွၵ်ႉႁေႃ (ဟော်နန်းရပ်ကွက်) ၸိူဝ်းၼႆႉ ၼိုင်ႈပွၵ်ႉလႂ် ႁူဝ်ၵူၼ်းဢမ်ႇယွမ်းႁဵင်လႄႈ မူႇဝၢၼ်ႈ ဢၼ်မီးၼႂ်းၸႄႈဝဵင်းမိူင်းမိတ်ႈၼႆႉသမ်ႉ ဢမ်ႇယွမ်း 35 ဝၢၼ်ႈ ၼႆယဝ်ႉ။

ယၢမ်းလဵဝ်တႄႉ ၵူၼ်းဝၢၼ်ႈၵူၼ်းသူၼ် ဢွၼ်ၵၼ်ပၢႆႈဢွၵ်ႇမိူင်း ဢမ်ႇၶႂ်ႈလိူဝ်ၽႂ်ယဝ်ႉ။ ၼႂ်းလိူၼ်ၵျႅၼ်ႊၼိဝ်ႊရီႊ ပူၼ်ႉမႃးၼၼ်ႉၵေႃႈ မၢၵ်ႇလူင်တူၵ်းသႂ်ႇၵၢတ်ႇလူင်ဝဵင်းမိူင်းမိတ်ႈသေ ၾႆးမႆႈႁွင်ႈထႅဝ် ႁၢၼ်ႉၶၢႆၵုၼ်ႇ လူႉၵွႆ ပဵၼ်ၽဝ်မူတ်း ဢမ်ႇၵိုတ်းသင်။ ၸဝ်ႈႁၢၼ်ႉၼႂ်းၵၢတ်ႇၸိူဝ်းၼၼ်ႉ ဢမ်ႇလႆႈသင်ၶိုၼ်း တႃႇတေတူၺ်းထိုင်လုမ်းလႃး ၶိုၼ်းၵူၺ်းၵေႃႈ ဢမ်ႇငၢႆႈ။ ၼိုင်ႈၸဝ်ႈလႂ် သုမ်းၶိူင်ႈၶူဝ်းၵုၼ်ႇၶၢႆ ၼပ်ႉႁူဝ်ႁဵင်သႅၼ်ပျႃး။

ၵူၼ်းမိူင်း မၢင်ၵေႃႉ ႁၢၼ်ႉၶၢႆႁွင်ႈထႅဝ် ၼႂ်းၵၢတ်ႇၵေႃႈ ၺႃးၾႆးမႆႈ၊ ႁိူၼ်းယေးၵေႃႈ ၺႃးၽူႈလၵ်ႉၶဝ်ႈသွၵ်ႈ ဢမ်ႇမီးသင်လိူဝ်ယဝ်ႉ။ လွင်ႈလူႉသုမ်းယႂ်ႇလူင် ၸိူဝ်းၼႆႉ ဢမ်ႇမီးၸုမ်းလႂ် မႃးဢဝ်ပုၼ်ႈၽွၼ်း ၵႄႈလိတ်ႈသင်ပၼ် ၼၢင်းယိင်း ၵူၼ်းမိူင်းမိတ်ႈ လၢတ်ႈၼႄဝႆႉၼင်ႇၼႆ –  

“ၵၢတ်ႇလူင်မိူင်းမိတ်ႈၼၼ်ႉတႄႉ ၺႃးမၢၵ်ႇလူင်တူၵ်းသႂ်ႇသေ ၾႆးလၢမ်းမႆႈ လူႉၵွႆမူတ်းၶႃႈ။ ပႃးႁၢၼ်ႉ ႁဝ်းၶႃႈၵႂႃႇဢေႃႈ။ မၼ်းပဵၼ်ႁွင်ႈထႅဝ်ၶႃႈလူးၼေႃ။ ပေႃးမႆႈလင်ၼိုင်ႈၵေႃႈ လၢမ်းမႆႈလူႉၵွႆမူတ်းၶႃႈယဝ်ႉ။ ၶူဝ်းၵုၼ်ႇႁဝ်း ဢၼ်မီးၼႂ်းၵၢတ်ႇ ၼၼ်ႉ ၾႆးမႆႈပဵၼ်ၽဝ်ႇမူတ်းယဝ်ႉၶႃႈ။ တေလႆႈဝႃႈ သုမ်းၼမ်ၵၼ် ၵူႈၵေႃႉၶႃႈယဝ်ႉ ၽႂ်ၵေႃႈဢမ်ႇထၢင်ႇတေပဵၼ်ၼႆ။ တႃႇမီးတီႈၵႃႉၶၢႆၼႂ်းၵၢတ်ႇၼႆႉ ႁဝ်းၶႃႈ လႆႈသိုဝ်ႉႁွင်ႈ ထႅဝ်ဝႆႉၵူၺ်းၶေႃၶေႃဢေႃႈၼၼ်ႉ။ ဢမ်ႇၸႂ်ႈႁွင်ႈဢၼ်ၶၢတ်ႈဝႆႉ။ ဢၼ်ၾႆးမႆႈၼႆႉ တင်းၶူဝ်းၶွင် တင်းႁွင်ႈထႅဝ်ႁဝ်းသုမ်း ဢမ်ႇယွမ်း 2 ႁဵင်သႅၼ်။ ၸဝ်ႈႁၢၼ်ႉမၢင်ၸဝ်ႈ ႁွင်ႈထႅဝ်ၼႂ်းၵၢတ်ႇၵေႃႈ ၾႆးမႆႈလူႉၵွႆ တီႈႁိူၼ်းၵေႃႈ ၺႃးမၢၵ်ႇတူၵ်းသႂ်ႇသေ လူႉၵွႆမူတ်းၵေႃႈမီး။ တိုၼ်းဝႃႈဢမ်ႇ မီးတီႈယူႇတီႈၵိၼ် ၼၼ်ႉယဝ်ႉ”- ဝႃႈၼႆ။

ႁိူၼ်းယေး ဢၼ်ၵိုတ်းဝႆႉ ၸိူဝ်းၼၼ်ႉၵေႃႈ ယွၼ်ႉဢမ်ႇမီးၽႂ်ပႂ်ႉလုမ်းလႃးလႄႈ ၺႃးၵူၼ်းလၵ်ႉသွၵ်ႈတဝ် ဢဝ်ၶိူင်ႈၶူဝ်းၼႂ်းႁိူၼ်းၼႂ်းယေးၵႂႃႇမူတ်း မိူၼ်ၼင်ႇ ရူတ်ႉၶိူင်ႈ ၊ ၸၢၵ်ႈၾႆး ၊ တူႈယဵၼ် ၊ ထီႇဝီႇ တႄႇၵႂႃႇ ၸိူဝ်းၼႆႉ။ လိူဝ်ၼၼ်ႉ ပေႃႉထုပ်ႉယႃႉၵွႆပႅတ်ႈ တိူၵ်ႈသိမ်းၶူဝ်း၊ တူႈမၢၼ်ႇ ဢၼ်သႂ်ႇဝႆႉ ၶိူင်ႈၸႂ်ႉၶူဝ်းသွႆ ၸိူဝ်းၼႆႉသေ ဢဝ်ၶူဝ်းၶွင်ဢၼ်မီးၵႃႈမီးၶၼ် ၵႂႃႇထႅင်ႈလူးၵွၼ်ႇ။

ဝဵင်းမိူင်းမိတ်ႈၼႆႉ ယူႇတီႈလႅၼ်ၶႅၼ်ႈမိူင်းတႆးပွတ်းႁွင်ႇ – တိူင်းတႃႈလိူဝ်ႇ။ ပဵၼ်သဵၼ်ႈတၢင်းဢၼ် လုၵ်ႈမိူင်းၵုတ်ႈ – မိူင်းမိတ်ႈ – မၢၼ်ႈပဵင်း – မၢၼ်ႈမေႃႈ ပွင်ႇထိုင် သဵၼ်ႈတၢင်းလူင်ပျီႇထွင်ႇၸူႉ၊ ပဵၼ်သဵၼ်ႈတၢင်း ဢၼ်လမ်ႇလွင်ႈ တႃႇၸုမ်း PDF တူင်ႈပဵင်းၶဝ် လတ်းၵႂႃႇမႃးတူင်ႉၼိုင် – တေႃႉၶိူင်ႈၵွင်ႈၵၢင်ႇလႄႈ ၸင်ႇဝႃႈ သိုၵ်းမၢၼ်ႈ ဢမ်ႇယွမ်းထွႆထွၼ်သေ သႂ်ႇႁႅင်းပၵ်းတႃပႂ်ႉၽဵဝ်ႈယိုဝ်း။

ယၢမ်းလဵဝ် ၼႂ်းၸႄႈဝဵင်းမိူင်းမိတ်ႈၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ယူႇဝႆႉ မိူၼ်ၼင်ႇ – သိုၵ်းမၢၼ်ႈ ယိုတ်းမိူင်း၊ သိုၵ်းၶၢင် KIA ၊ သိုၵ်းတဢၢင်း TNLA ၊ သိုၵ်းတႆး SSPP လႄႈ ၸုမ်းၵႅတ်ႇၶႄၵူၼ်း မိူင်း PDF ၸိူဝ်းၼႆႉ။