မိူဝ်ႈၼႆႉ ဝၼ်းတီႈ 25/07/2024 ယၢမ်းၵၢင်ၼႂ် 4 မူင်း သိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ တိူင်းသိုၵ်းလႃႈသဵဝ်ႈ ၸဵင်ႇႁွင်ႇဝၼ်းဢွၵ်ႇ (ယမၶ) တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇယဝ်ႉ – သိုဝ်ႇၶၢဝ်ႇၵဝ်ႈၵၢင်ႉ ဢွၵ်ႇဝႆႉၼင်ႇၼႆ။

“ပၢင်တိုၵ်း တီႈဝဵင်းလႃႈသဵဝ်ႈၼႆႉ ယူႇတီႈ တပ်ႉသိုၵ်းၵဝ်ႈၵၢင်ႉ MNDAA လႆႈၸႂ်ႉၶၢဝ်းယၢမ်း 23 ဝၼ်းသေ ၸင်ႇယိုတ်း ၵုမ်းလႆႈ တိူင်းသိုၵ်းလႃႈသဵဝ်ႈ ၸဵင်ႇႁွင်ႇဝၼ်းဢွၵ်ႇ (ယမၶ) ၵႂႃႇယဝ်ႉ။ ယၢမ်းလဵဝ် တီႈဝဵင်းလႃႈသဵဝ်ႈၼႆႉ ပဵၼ်ဝဵင်းပူတ်းပွႆႇလွတ်ႈလႅဝ်း လူၺ်ႈၸုမ်းလုၵ်ႉၽိုၼ်ႉ ၶဝ်ႈတိုၵ်းဢွင်ႇပေႉသေ ပဵၼ်မႃးပိုၼ်း ဢၼ်ၼိုင်ႈယဝ်ႉ”- ဝႃႈၼႆ။

ၶၢဝ်းတၢင်း 2-3 ဝၼ်းမႃးၼႆႉ သိုၵ်းၵဝ်ႈၵၢင်ႉ MNDAA လေႃႇတိုၵ်းတပ်ႉသိုၵ်းမၢၼ်ႈ ၸွမ်းသဵၼ်ႈတၢင်း လူင်ၶူင်ႇႁိူဝ်းမိၼ်းလႄႈ ၸွမ်းႁိမ်းၸမ် တိူင်းသိုၵ်းလႃႈသဵဝ်ႈ ၸိူဝ်းၼႆႉမႃးႁၢဝ်ႈႁႅင်း ဝႃႈၼႆ။  

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ႁဝ်းၶႃႈ လႆႈငိၼ်းၶၢဝ်ႇဝႆႉၸိူင်ႉ ၼၼ်ၶႃႈ လွင်ႈသိုၵ်းၶႄႇၵဝ်ႈၵၢင်ႉ သိမ်းလႆႈတိူင်းသိုၵ်းလႃႈသဵဝ်ႈယဝ်ႉၼႆဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈသိုဝ်ႇၶၢဝ်ႇ ဢေႇရႃႇဝတီႇ၊ Kit Thit Media လႄႈ သူၺ်ႇပျီႇမေႇ ၸိူဝ်းၼႆႉၵေႃႈ ပိုၼ်ၽၢဝ်ႇ ဢွၵ်ႇဝႆႉ လွင်ႈသိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈ တိူင်းသိုၵ်းလႃႈသဵဝ်ႈ မိူဝ်ႈၼႆႉ ဝၼ်းတီႈ 25 ယၢမ်းၵၢင်ၼႂ် 4 မူင်း ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 21 ယၢမ်းၵၢင်ၼႂ်မွၵ်ႈ 10 မူင်း ၼၼ်ႉၵေႃႈ ယူႇတီႈ ၸဝ်ႈသိုၵ်း ဢွၼ်ႁူဝ် ၶုၼ်သိုၵ်းလူင် 5 ၵေႃႉ ႁူမ်ႈတင်း လုၵ်ႈသိုၵ်း 317 ၵေႃႉ ဢဝ်ၶိူင်ႈၵွင်ႈၵၢင်ႇ မၢၵ်ႇမိုဝ်ႉၸိုၼ်းယၢမ်းတင်းၼမ် မႃးဝၢင်းၶိူင်ႈၸူး တီႈသိုၵ်းၵဝ်ႈၵၢင်ႉ MNDAA တီႈဝဵင်းလႃႈသဵဝ်ႈၼႆ – သိုဝ်ႇၶၢဝ်ႇၵဝ်ႈၵၢင်ႉ ပိုၼ်ၽၢဝ်ႇ ဢွၵ်ႇဝႆႉၼင်ႇၼႆ။

ပၢင်တိုၵ်း တီႈဝဵင်းလႃႈသဵဝ်ႈၼႆႉ ယူႇတီႈ သိုၵ်းၵဝ်ႈၵၢင်ႉ ႁႅၼ်းသိုၵ်းလေႃႇတိုၵ်း တပ်ႉသိုၵ်းမၢၼ်ႈမႃး ႁၢဝ်ႈႁႅင်း တင်ႈတႄႇ ဝၼ်းတီႈ 02/07/2024 ၼၼ်ႉမႃးသေ ႁၢၼ်ႉတေႃႇထိုင်ယၢမ်းလဵဝ် သဵင်ၵွင်ႈပႆႇယဵၼ် မီး ၶၢဝ်းတၢင်း 20 ဝၼ်းပၢႆယဝ်ႉ ဝႃႈၼႆ။