ယၢမ်းလဵဝ် ၵူၼ်းဝဵင်းလႃႈသဵဝ်ႈ ပၢႆႈၽေးႁွတ်ႈထိုင်မႃး တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း 396 ၵေႃႉယဝ်ႉ ယွၼ်ႉပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပိုတ်းယိုဝ်းၵၼ် ႁၢဝ်ႈႁႅင်း ဝႃႈၼႆ။

တႄႇဢဝ် ႁူဝ်လိူၼ်ၵျူႊလၢႆႊ 2024 ၼႆႉမႃး ၵူၼ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ပၢႆႈၽေးသိုၵ်း ႁွတ်ႈထိုင်ဝႆႉ တီႈဝတ်ႉပိတၵၢတ်ႈ လင်ႁိူၼ်း 44 လင် ႁူဝ်ၵူၼ်း 258 ၵေႃႉ၊ ဝတ်ႉဝုၺ်ႇလုဝၼ်ႇ လင်ႁိူၼ်း 18 လင် ႁူဝ်ၵူၼ်း 65 ၵေႃႉ၊ ၵေႃလိၵ်ႈလၢႆးလႄႈ ၾိင်ႈငႄႈတႆး လင်ႁိူၼ်း 13 လင် ႁူဝ်ၵူၼ်း 53 ၵေႃႉလႄႈ လုမ်းၼမ်ႉၶူင်းတႆး ၶႅၵ်ႇလီပၢင်ၸႃႉတႆး ႁူဝ်ၵူၼ်း 20 ၵေႃႉ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၼႆယဝ်ႉ။

ၸဝ်ႈသြႃႇ သီႇရိထမ်ႇမႃႇ ၽိပႃႇလ ဢွၼ်ႁူဝ်ၼမ်းၼႃႈ ၸွႆႈထႅမ်ၵူၼ်းပၢႆႈၽေးသိုၵ်း တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “လွင်ႈယၢပ်ႇၽိုတ်ႇ တႃႇၵူၼ်းပၢႆႈၽေးတႄႉ မီးၶႃႈယဝ်ႉ လွင်ႈတီႈယူႇတီႈ ၼွၼ်းၼၼ်ႉယဝ်ႉ။ ၶၢဝ်းၼႆႉ တီႈၵၼ်ႇတီႈၵျွင်းသမ်ႉ လႆႈႁပ်ႉဝႆႉသင်ၶၸဝ်ႈၼမ်လႄႈ ၵွပ်ႈၼႆ ႁဝ်းၸဝ်ႈ ၶဝ် ဢမ်ႇၸၢင်ႈႁပ်ႉၵူၼ်းပၢႆႈၽေးၼမ်။ ၸိူင်ႉႁိုဝ်ၵေႃႈလီ ၼင်ႇပွင်ပဵၼ်လႆႈသုတ်း တေၸွႆႈထႅမ်ပၼ် ပီႈၼွင်ႉပၢႆႈၽေးႁဝ်းၶႃႈယူႇ။ ၵူၼ်းပၢႆႈၽေး မၢင်ၸိူဝ်း လုၵ်ႉလႃႈသဵဝ်ႈ ၶီႇရူတ်ႉမႃးၽႅဝ်တူၼ်ႈတီးသေ ဢမ်ႇ လႆႈသင်မႃးၵေႃႈမီးၶႃႈယဝ်ႉ” – ဝႃႈၼႆ။

ဢိင်ၼိူဝ် လွင်ႈၼႆႉ ယူႇတီႈ ပေႃးပၵ ဝတ်ႉပိတၵၢတ်ႈ၊ ၸုမ်းၼမ်ႉၶူင်း ၶႅၵ်ႇလီပၢင်ၸႃႉ ဝဵင်းတူၼ်ႈတီး၊ ၸုမ်းၵူၼ်းၼုမ်ႇတႆး TYO ၊ ၸုမ်းၵုၼ်ႁဵင် ၽွင်ႇတေးသျိၼ်းလႄႈ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ႁူမ်ႈၵၼ်သေ ၸွႆး ၸတ်းၵၢၼ်၊ တူၺ်းထိုင်ဝႆႉပၼ်ၵႂႃႇ ဝႃႈၼႆ။

“ၸွမ်းၼင်ႇ ၸဝ်ႈတႃႇၼ တီႈၸမ်ၵႆ လူႇတၢၼ်းၵမ်ႉၸွႆႈမႃး တႃႇၵူၼ်းပၢႆႈၽေးသိုၵ်းၼႆႉ ယူႇတီႈ ၸုမ်းဢွၼ်ႁူဝ် ၸွႆႈထႅမ် ၵူၼ်းပၢႆႈၽေးၼႆႉသေ ၶိုၼ်းၸႅၵ်ႇပၼ် မၢင်တီႈၵေႃႈ ႁုင်ၵိၼ်ၵူၺ်း ၵေႃႈမီး၊ တီႈဝတ်ႉပိတၵၢတ်ႈတႄႉ ယွၼ်ႉၵူၼ်း ၼမ်လႄႈ ဝႆႉပုၼ်ႈၽွၼ်းၵၼ်သေ ပၼ်ႇပုတ်ႈႁုင်လဵင်ႉၵၼ် ၼိုင်ႈဝၼ်းလႂ် 2 တႃႇ။ တေလဵင်ႉယၢမ်းၵၢင်ၼႂ် 9 မူင်းၶိုင်ႈ တႃႇၼိုင်ႈလႄႈ ယၢမ်းဝၢႆးဝၼ်း 4 မူင်း တႃႇၼိုင်ႈ” – ၸဝ်ႈသြႃႇ သီႇရိထမ်ႇမႃႇ ၽိပႃႇလ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်းတူၼ်ႈတီး ဢၼ်လူဝ်ႇတၢင်းၸွႆႈထႅမ်ႁႅင်း တီႈသုတ်းတႄႉ တၢင်းၵိၼ်ယႅမ်ႉ၊ ၽႃႈႁူမ်ႇၶူဝ်းၼွၼ်း၊ သုတ်းၵၢင်၊ မေႃႈဝၢၼ်ႇ၊ ၸေႃႉ၊ ၶိူင်ႈႁုင်မိုဝ်ႉ ၸိူဝ်းၼႆႉ ဝႃႈၼႆ။

လိူဝ်သေ ၵူၼ်းမိူင်းလႃႈသဵဝ်ႈ ပၢႆႈႁွတ်ႈထိုင်ဝႆႉ တီႈဝတ်ႉဝႃးၽႃသိူဝ်ႇ ၊ လုမ်းၼမ်ႉၶူင်း ၶႅၵ်ႇလီပၢင်ၸႃႉတႆးလႄႈ ၵေႃလိၵ်ႈလၢႆး ၼႆႉယဝ်ႉ။ မၢင်ၸိူဝ်း ဢၼ်ပွင်ပဵၼ်လႆႈသမ်ႉ ၵႂႃႇၶၢတ်ႈႁိူၼ်းယေး – ႁွင်ႈထႅဝ် ယူႇသဝ်း ၸိူဝ်းၼႆႉၵေႃႈ မီးထႅင်ႈၼမ်။ ၼၼ်ႉၵေႃႈ ထူပ်းတၢင်းယၢပ်ႇၽိုတ်ႇႁႅင်း ယွၼ်ႉၵႃႈၶၢတ်ႈႁိူၼ်း/ ႁွင်ႈထႅဝ် ၶိုၼ်ႈၵႃႈႁႅင်း မၢင်တီႈ ၼိုင်ႈလိူၼ်လႂ် လႆႈပၼ် 5 သႅၼ် – 6 သႅၼ်ပျႃး ၵေႃႈမီး။ ယဝ်ႉၵေႃႈ တေလႆႈၶၢတ်ႈယူႇ တီႈဢေႇသုတ်းမၼ်း 6 လိူၼ် – ၵူၼ်းပၢႆႈ ၽေးသိုၵ်း ဝဵင်းလႃႈသဵဝ်ႈလၢတ်ႈ။