ဝၼ်းတီႈ 12 လိူၼ်ၵျူႊလၢႆႊ သိုၵ်းမၢၼ်ႈပိုၼ်ၽၢဝ်ႇဝႃႈ ၸိူဝ်းႁဵတ်း CDM ၼၼ်ႉ သင်ၶႂ်ႈၶဝ်ႈမႃးႁၢပ်ႇၵၢၼ် ၶိုၼ်းၸိုင် ယိၼ်းလီႁပ်ႉတွၼ်ႈသေ တေပူတ်းပၼ် ၼႂ်းသဵၼ်ႈမၢႆ Blacklist ၼၼ်ႉ ၶိုၼ်းၵမ်းလဵဝ် ဝႃႈၼႆ။

လွင်ႈၼႆႉ ၵူၼ်းႁဵတ်း CDM ၶဝ် ဢွၼ်ၵၼ်တွပ်ႇလၢတ်ႈဝႃႈ – ပဵၼ်ပရိယႄႇ သိုၵ်းမၢၼ်ႈႁူၺ်းႁွင်ႉၵူၺ်း။ ဢမ်ႇလီယုမ်ႇယမ်တမ်းၸႂ်သေ ၶဝ်ႈႁၢပ်ႇၵၢၼ်ၶိုၼ်း၊ ဢမ်ႇယွမ်းႁပ်ႉပိူင်ၸဝ်ႈဢႃႇၼႃႇသိုၵ်းလႄႈ ၸင်ႇပၢႆႈဢွၵ်ႇမႃး၊ ပေႃးသိုၵ်းမၢၼ်ႈလၢတ်ႈလီၶျေႃးဝွၼ်းၵေႃႈ ၸႂ်ဢူၼ်ႈဢွၼ်ႇယုမ်ႇယမ်သေ ၶိုၼ်းပွၵ်ႈမိူဝ်းၼႆႉတႄႉ ဢမ်ႇလီပဵၼ် – ဝႃႈၼႆ။

ၼႂ်းၶေႃႈပိုၼ်ၽၢဝ်ႇ သိုၵ်းမၢၼ်ႈၼၼ်ႉတႄႉပႃးဝႆႉဝႃႈ – ႁႅင်းၵူၼ်းမိူင်း ၼႂ်းမိူင်းယွမ်းႁႅင်းၼႃႇယဝ်ႉ။ ၵူၼ်းႁဵတ်း CDM ၵေႃႈ ယူႇယၢပ်ႇၵိၼ်းၸႂ်ၼႃႇယဝ်ႉလႄႈ တႃႇႁႂ်ႈၶိုၼ်းမီးၵၢၼ်သေ ယူႇငၢႆႈၵိၼ်လူမ်ၼၼ်ႉ ႁႂ်ႈ ပွၵ်ႈမႃးႁဵတ်းၵၢၼ်ၶိုၼ်း – ဝႃႈၼႆ။

ၾၢႆႇတၢင်း NUG တႄႉ ပိုၼ်ၽၢဝ်ႇဝႃႈ – ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ ၵူၼ်းႁဵတ်း CDM မီးမွၵ်ႈ 7 သႅၼ်၊ ၾၢႆႇပၢႆးပၺ်ႇၺႃႇ 2 သႅၼ်လႄႈ ၾၢႆႇပၢႆးယူႇလီ မီးမွၵ်ႈ 5 မိုၼ်ႇ ႁွင်ႈၵၢၼ်တၢင်ႇ ဢၼ်သမ်ႉ မီးမွၵ်ႈ 4 သႅၼ် – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။