ယၢမ်းလဵဝ် ၵူၼ်းလႃႈသဵဝ်ႈ ဢွၼ်ၵၼ်ပၢႆႈႁွတ်ႈထိုင် ဝဵင်းလၢႆးၶႃႈဝႆႉ ၼပ်ႉႁူဝ်ပၢၵ်ႇ ယွၼ်ႉသိုၵ်းမၢၼ်ႈ ယိုတ်းမိူင်းတင်း သိုၵ်းၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် ႁၢဝ်ႈႁႅင်း ဝႃႈၼႆ။

တႄႇဢဝ် ႁူဝ်လိူၼ်ၵျူႊလၢႆႊၼႆႉမႃး ၵူၼ်းလႃႈသဵဝ်ႈ ဢွၼ်ၵၼ်ပၢႆႈၽေးသိုၵ်း ႁွတ်ႈထိုင်ဝႆႉ တီႈဝတ်ႉဝႃႇ သူဝ်ႇလႄႈ ႁူင်းႁေႃး (ခန်းမ) ဝၢၼ်ႈႁူဝ်ၽၢႆ 40 ၵေႃႉ၊ ဝတ်ႉၵုင်းၼိမ် 30 ၵေႃႉ၊ ဝၢၼ်ႈႁူဝ်ၼွင်ဢွၼ်ႇ 25 ၵေႃႉ၊ ဝၢၼ်ႈႁူၺ်ႈယဵၼ်ႇ 20 ၵေႃႉလႄႈ ပွၵ်ႉ 1 ႁူဝ်ၵူၼ်း 65 ၵေႃႉ ႁူမ်ႈတင်းမူတ်း 180 ၵေႃႉ ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၼႆယဝ်ႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ၶေႃႈမုလ်းၼႆႉ ဢၼ်ယူႇတီႈ ႁဝ်း ၶႃႈ ၵဵပ်းလႆႈမႃး တီႈဝတ်ႉမုၼ်ၸဝ်ႈလႄႈ တီႈဝၢၼ်ႈ။ ဢၼ်ႁဝ်းၶႃႈ ဢမ်ႇယိုၼ်းမိုဝ်းထိုင်လႆႈၵေႃႈ တေမီး ထႅင်ႈတင်းၼမ် ဢေႃႈ။ ၸိူဝ်းမႃးသွၼ်ႈဝႆႉ ၸွမ်းႁိူၼ်းယေး ပီႈၼွင်ႉၽႂ်မၼ်း ၸိူဝ်းၼႆႉၵေႃႈ မီးထႅင်ႈၼမ်ဢေႃႈ။ လႆႈငိၼ်းဝႃႈ တေမႃးထႅင်ႈၵေႃႈမီးၼႆဢေႃႈ။ ဢၼ်ပၢႆႈမႃးၼႆႉ ပဵၼ်ဝဵင်းလႃႈသဵဝ်ႈ ၵမ်ႈၼမ်ၶႃႈ”- ဝႃႈၼႆ။

သိုပ်ႇလၢတ်ႈဝႃႈ – “တႃႇလွင်ႈၵိၼ်ယႅမ်ႉ ႁႂ်ႈၵုမ်ႇထူၼ်ႈလီလီတႄႉ မၼ်းပႆႇၵုမ်ႇထူၼ်ႈၶႃႈ။ လွင်ႈမႆႈၸႂ်ၵူၼ်း ပၢႆႈၽေးတႄႉ ပေႃးၶၢဝ်းႁိုင်မႃး ၸွင်ႇတေမီးၵူၼ်းၸွႆႈထႅမ် ၼႆၸိူဝ်းၼႆႉလႄႈ ပဵၼ်လွင်ႈမႆႈၸႂ်ၶဝ်ဝႆႉယူႇ။ ၵမ်ႈၼမ် ဢၼ်ပၢႆႈမႃး ၼႆႉ ပဵၼ်ၼၢင်းယိင်းၶႃႈဢေႃႈ”- ဝႃႈၼႆ။

လိူဝ်ၼၼ်ႉ တီႈဝဵင်းပၢင်လူင်ၵေႃႈ ပၢႆႈႁွတ်ႈထိုင်ဝႆႉ ႁူဝ်ၵူၼ်း ဢမ်ႇယွမ်း 50 ၵေႃႉ တီႈဝတ်ႉမူၺ်ႇတေႃႇလႄႈ ႁူင်းႁဵၼ်းပရႁိတ ဝၢၼ်ႈလူင် ၸိူဝ်းၼႆႉ။ ယဝ်ႉၵေႃႈ တီႈဝတ်ႉၺွင်ႇၵဝ်ႈတူၼ်ႈ ဝဵင်းလွႆလႅမ် ၸိူဝ်းၼႆႉထႅင်ႈ။

ယဝ်ႉၵေႃႈ တၢင်းဝဵင်းတူၼ်ႈတီး ၸိူဝ်းၼႆႉၵေႃႈ ပၢႆႈႁွတ်ႈထိုင် ဢမ်ႇယွမ်း 1,000 ယဝ်ႉ ၵမ်ႈၼမ် တေမႃးၶၢတ်ႈႁွင်ႈယူႇသဝ်း၊ မၢင်ၸိူဝ်း မႃးသွၼ်ႈယူႇၸွမ်း ႁိူၼ်းယေး ပီႈၼွင်ႉၽႂ်မၼ်း။ လိူဝ်ၼၼ်ႉ ၸွမ်းဝတ်ႉ ဝႃးၽႃသိူဝ်ႇထႅင်ႈ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းၼင်ႇ ႁဝ်းၶႃႈ ႁူႉဝႆႉတႄႉ ၵူၼ်းပၢႆႈ ၽေးသိုၵ်း မီးၵႂႃႇ 400 ပၢႆ ဢၼ်မႃးသွၼ်ႈဝႆႉ ၸွမ်းဝတ်ႉမုၼ်ၸဝ်ႈ။ ဢၼ်ယူႇၸွမ်းႁိူၼ်းယေး ပီႈၼွင်ႉလႄႈ ၶၢတ်ႈႁွင်ႈယူႇသဝ်း ၸိူဝ်းၼႆႉထႅင်ႈ ပႆႇလႆႈႁူႉၶေႃႈမုလ်းၶႃႈ ႁူဝ်ၵူၼ်းမီးၵႃႈႁိုဝ်ၼႆ။ ပေႃးႁူမ်ႈၵၼ် တင်းမူတ်းတႄႉ တေဢမ်ႇယွမ်း 1,000 ၶႃႈယဝ်”- ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈႁွတ်ႈထိုင်ဝႆႉ တီႈဝဵင်းတူၼ်ႈတီးၼႆႉသမ်ႉ မိူၼ်ၼင်ႇ တီႈဝတ်ႉပိတၵၢတ်ႈ၊ ဝတ်ႉဝေႇလုဝုၼ်ႇလႄႈ လုမ်းၵေႃလိၵ်ႈလၢႆးလႄႈ ၾိင်ႈငႄႈတႆး ၸိူဝ်းၼႆႉ။ လိူဝ်ၼၼ်ႉ တီႈဝဵင်းဢွင်ႇပၢၼ်းၵေႃႈ ၵူၼ်းလႃႈသဵဝ်ႈ ပၢႆႈ ႁွတ်ႈထိုင်ဝႆႉ 100 ပၢႆ ၵမ်ႈၼမ် တေၶၢတ်ႈႁွင်ႈယူႇလႄႈ ၸွမ်းဝတ်ႉ ၸိူဝ်းၼႆႉ။

ယွၼ်ႉပၢင်တိုၵ်း တၢင်းပွတ်းႁွင်ႇၼၼ်ႉသေ ႁဵတ်းႁႂ်ႈၵူၼ်းမိူင်း ဢွၼ်ၵၼ်ပၢႆႈႁွတ်ႈထိုင်ဝႆႉ ၼႂ်းၸိုင်ႈတႆး ပွတ်းၸၢၼ်း မိူၼ်ၼင်ႇ – ၵေးသီး၊ မိူင်းၵိုင်၊ လၢႆးၶႃႈ၊ ပၢင်လူင်၊ လွႆလႅမ်၊ ၼမ်ႉၸၢင် (ပၢင်ႇလႅင်းသႂ်)၊ တူၼ်ႈတီးလႄႈ ဢွင်ႇပၢၼ်း ၸိူဝ်းၼႆႉ။