မိူဝ်ႈၼႆႉဝၼ်းတီႈ 10/7/2024 သိုၵ်းဝႃႉ “UWSA” ဢဵၼ်ႁႅင်းမွၵ်ႈ 2 ႁဵင် ၶၢမ်ႈၼမ်ႉၶူင်း လတ်းဝဵင်း တၢင်ႉယၢၼ်း သေမုင်ႈၼႃႈၵႂႃႇတၢင်းဝဵင်းလႃႈသဵဝ်ႈ ယဝ်ႉၼႆ ၸဝ်ႈၼႃႈတီႈတူင်ႉၼိုင်ၼႂ်းၵၢၼ်သိုၵ်း ၼႂ်းပိုၼ်ႉတီႈလၢတ်ႈၼင်ႇၼႆ။

“သိုၵ်းဝႃႉ ထႅမ်ႁႅင်းသိုၵ်းၶဝ်ႈၼႂ်းဝဵင်းတၢင်ႉယၢၼ်းၶမ်ႈဝႃးတင်းၶိုၼ်းလႄႈမိူဝ်ႈၼႆႉတင်းဝၼ်း။ ဝၢႆးဝၼ်းၼႆႉတႄႉမုင်ႈၼႃႈၶိုၼ်ႈၵႂႃႇတၢင်းဝဵင်းလႃႈသဵဝ်ႈၵမ်ႈၼမ်ယဝ်ႉ။ ၵူၺ်းၵႃႈတေၵႂႃႇတၢင်းလႂ်တႄႉတႄႉ တႄႉဢမ်ႇႁူႉ။လွၵ်းလၢႆးၵၢၼ်သိုၵ်းတေပဵၼ်မႃးၸိူင်ႉႁိုဝ်တႄႉတႄႉ ဢမ်ႇႁူႉ ”- ဝႃႈၼႆ။

ၵူၼ်းႁူႉလွင်ႈၵၢၼ်မိူင်းၵၢၼ်သိုၵ်း ဢၼ်ႁၼ်တႂ်ႈတႃလၢတ်ႈဝႃႈ – ပဵၼ်သိုၵ်းဝႃႉ ၼႃႈလိၼ်သိုၵ်း 171 ဢၼ်လုၵ်ႉတၢင်းလႅၼ်လိၼ်ထႆးမႃးမွၵ်ႈ 1500 ၊ ဢၼ်လုၵ်ႉတၢင်း တပ်ႉၸုမ်း 318 ၼႃႈလိၼ်သိုၵ်းမိူင်းလိူၼ်းမႃးမွၵ်ႈ 500 ၵေႃႉ ႁူဝ်ၼပ်ႉမီးမွၵ်ႈ 2000  ဝႃႈၼႆ။

ၽူႈၸမ်ၸႂ်ၸုမ်းယိပ်းၵွင်ႈၵၢင်ႇပိုၼ်ႉတီႈလၢတ်ႈဝႃႈ – ဢၼ်သိုၵ်းဝႃႉၵိုင်ႉၵၢင်ႉထႅမ်ႁႅင်းသိုၵ်းမႃးၸိူင်ႉၼႆၼႆႉ လႅပ်ႈတေတႃႇထႅမ်ႁႅင်းၵုမ်းၸွႆႈ  ယႃႇႁႂ်ႈမိူင်းယႆ လႄႈတၢင်ႉယၢၼ်း တူၵ်းၼႂ်းမိုဝ်းၸုမ်းဢူၺ်းလီ ပွတ်းႁွင်ႇဝႃႈၼႆ။

ၾၢႆႇၼိုင်ႈၵေႃႈမၼ်းၸၢႆးထတ်းသၢင်လၢတ်ႈဝႃႈ – သိုၵ်းဝႃႉ ၼႄၾၢင်ႁၢင်ႈ ယႃႇႁႂ်ႈလူင်ပွင်ၸိုင်ႈၶႄႇ ထၢင်ႇထိူမ်ငမ်းငဝ်းဝႃႈ ၶဝ်ယူႇလင်ၵမ်ၸိူၵ်ႈ MNDAA လႄႈ TNLA ဢၼ်တူင်ႉၼိုင်ၵၢၼ်သိုၵ်းသေ ပိုတ်းယိုဝ်းသိုၵ်းမၢၼ်ႈယူႇၼႂ်းၸိုင်ႈတႆးပွတ်းႁွင်ႇယၢမ်းလဵဝ် -ၵေႃႈပဵၼ်လႆႈ။

ၵူၼ်းၸမ်ၸႂ်သိုၵ်းၼႂ်းပိုၼ်ႉတီႈ ၵမ်ႈၽွင်ႈလၢတ်ႈတီႈၽူႈတွႆႇႁွၵ်ႈဝႃႈ သိုၵ်းမၢၼ်ႈမွၵ်ႇႁွင်ႉၸုမ်းသိုၵ်းဝႃႉ မႃးၵႅတ်ႇၶႄၸွႆႈ ၾႆးသိုၵ်းဢၼ်ပဵၼ်ယူႇၼႂ်းမိူင်းတႆးပွတ်းႁွင်ႇယၢမ်းလဵဝ် ဝႃႈၼႆ။

ၵဵဝ်ႇၵပ်းလွင်ႈၼႆႉသေ ယူႇတီႈၽူႈတွႆႇႁွၵ်ႈတိုၵ်ႉသိုပ်ႇတွင်ႈထၢမ်ၸွပ်ႇတူၺ်းထႅင်ႈယူႇ ပဵၼ်ယွၼ်ႉသင်တႄႉတႄႉၼႆ ပႆႇလႆႈႁူႉႁူဝ်ယွႆႈတႅတ်ႈတေႃး။

 ၽွင်းၽႅၼ်ယၼ်ႇသိုၵ်း 1027 ၵမ်းဢွၼ်တၢင်းၼၼ်ႉတႄႉ မိူဝ်ႈဝၼ်းတီႈ 5 လိူၼ်ၵျၼ်ႊၼိဝ်ႊရီႊၼၼ်ႉ သိုၵ်းဝႃႉ UWSA ဢမ်ႇလႆႈလၼ်ႇၵွင်ႈသေၵမ်းသေ ၶဝ်ႈယိုတ်းဝဵင်းႁူဝ်ပၢင်ႇလႄႈပၢင်ႇလူင် ငၢႆႈငၢႆႈလူမ်လူမ်။ ထိုင်မႃးဝၼ်းတီႈ 10 ၵေႃႈ ပိုၼ်ၽၢဝ်ႇဝႃႈ ႁူဝ်ပၢင်ႇလႄႈပၢင်ႇလူင် ပဵၼ်ၼႃႈလိၼ်သိုၵ်းဝႃႉ ၽွင်းငမ်းၵုမ်းၵမ် ဝႃႈၼႆၵူၺ်း။