ဝၼ်းတီႈ 10/07/2024 မိူဝ်ႈၼႆႉ ပွတ်းၼႂ်ၵူၺ်း မၢၵ်ႇလူင်တူၵ်းၼႂ်းဝဵင်းလႃႈသဵဝ်ႈ 10 လုၵ်ႈယဝ်ႉ။
ၼႂ်ၼႆႉ မၢၵ်ႇလူင် – မၢၵ်ႇပျုင်းသျွတ်ႉ(ရှော့တိုက်ဒုံး) တူၵ်းၼႂ်းဝဵင်းလႃႈသဵဝ်ႈ လႄႈ တၢင်းဝၢၼ်ႈႁၢတ်ႇၵႃ ၵူၼ်းမိူင်းမၢတ်ႇၸဵပ်းလူႉတၢႆ ႁိူၼ်းယေးလူႉၵွႆ။
ယၢမ်းၵၢင်ၼႂ် 6 မူင်းၼၼ်ႉ မၢၵ်ႇပျုင်းသျွတ်ႉတူၵ်းတီႈႁိမ်းတႃႈရူတ်ႉၾႆး (ပူႇတႃႇ) 2 လုၵ်ႈ။ ၵူၼ်းတၢႆ 3 ၵေႃႉ ပဵၼ်ၼၢင်းယိင်း 2 ၵေႃႉလႄႈ လုၵ်ႈဢွၼ်ႇၵေႃႉၼိုင်ႈ။ မၢတ်ႇၸဵပ်းၵေႃႈမီး ဝႃႈၼႆ။
ၵူၼ်းလႃႈသဵဝ်ႈလၢတ်ႈၽူႈတွႆႇႁွၵ်ႈဝႃႈ – “ဢၼ်မၢတ်ႇၸဵပ်းမီး 11 ၵေႃႉ။ ၼႂ်းၼၼ်ႉသမ်ႉဢၼ်လီမႆႈၸႂ်မီး 7 ၵေႃႉ။ ဢၼ်တၢႆထင်တီႈ 3 ၵေႃႉၼၼ်ႉတႄႉ တူဝ်တၢႆမၢင်ၵေႃႉၼႆႉ သမ်ႉပေႃးပုတ်းပေႃးၶၢတ်ႇၵႂႃႇမူတ်း ”- ဝႃႈၼႆ။
တူၵ်းတီႈပွၵ်ႉ 9 (တႃႈရူတ်ႉၾႆး) 2 လုၵ်ႈ၊ တူၵ်းတီႈပႃႇပႅၵ်ႇ ထိၼ်းသျူးမျၢႆႇ 1 လုၵ်ႈ၊ ၵျွင်းမုၼ်ၸဝ်ႈၼေႇၶျီႇ 1 လုၵ်ႈ၊ တီႈၵျွင်းတေႃးယ 3 လုၵ်ႈ၊ ႁိမ်းၸၼ်ႉၸွမ်လႃႈသဵဝ်ႈ 1 လုၵ်ႈ လႄႈတီႈဝၢၼ်ႈႁၢတ်ႇၵႃ 2 လုၵ်ႈ။
ၶၢဝ်းပၢင်တိုၵ်းၼႆႉ တီႈဝဵင်းလႃႈသဵဝ်ႉသမ်ႉ ဢမ်ႇမီးသၼ်ယႃးၾူၼ်းလႄႈဢိၼ်ႊတိူဝ်ႊၼႅတ်ႉလႄႈ တႃႇယွၼ်းတၢင်းၸွႆႈထႅမ်ၼႆႉ ဢမ်ႇငၢႆႈၵူၼ်းလႃႈသဵဝ်ႈလၢတ်ႈၼင်ႇၼႆ။
“ ၽွင်းၶၢဝ်းမွၵ်ႈ 10 မူင်းၼၼ်ႉသမ်ႉ တူၵ်းသႂ်ႇတီႈ ဝၢၼ်ႈႁၢတ်ႇၵႃ ပွၵ်ႉၸၢၼ်း။ တိူဝ်ႉသႂ်ႇႁူဝ်ႉလုင်းၸၢႆးၵွႆႇ ပႃႈၶမ်းၶဝ်။ လုၵ်ႈယိင်းၶဝ် မၢတ်ႇၸဵပ်းၸၢၵ်ႇမၢၵ်ႇတီႈၶႅၼ်။ႁိူၼ်းၶဝ်ၵေႃႈၵွႆ။ ယွမ်ႇၼၼ်ႉတိူဝ်ႉႁိူၼ်း 2-3 လင်။ ၵူၼ်းဝၢၼ်ႈတႄႉဢမ်ႇၸၢင်ႈပၢႆႈၵႂႃႇတၢင်းလႂ်ၸဵမ်မိူဝ်ႈပၢင်တိုၵ်းတႄႇပုၼ်ႉ။ မိူဝ်ႈၼႆႉတႄႉတူၵ်းၸႂ်ႁႅင်းၼႃႇလႄႈ ၶိုင်တႃႇပၢႆႈယူႇ။ၵူၺ်းၵႃႈတေလႆႈပၢႆႈၵႂႃႇတၢင်းလႂ် တိုၵ်ႉၵႂင်ပူၵႂင်ပႃယူႇ။ တၢင်းဝဵင်းလႃႈသဵဝ်ႈၵေႃႈပိူၼ်ႈပၢႆႈမူတ်းယဝ်ႉ ”- ၵူၼ်းႁၢတ်ႇၵႃၵေႃႉၼိုင်ႈလၢတ်ႈၼင်ႇၼႆ။
ၾၢႆႇတၢင်းတိူင်းသိုၵ်း ယမၶ တႄႉ ဢဝ်ရူတ်ႉၵႃး ဢဝ်ၶိူင်ႈမိၼ် တေႃႉလုၵ်ႈလၢင်းမေးၼၢင်းၵူၼ်းသိုၵ်းၶဝ်ဢွၵ်ႇပၢႆႈ ယူႇၵူႈဝၼ်းဢမ်ႇထၢတ်ႇ။ ၾၢႆႇၼိုင်ႈ သိုၵ်းမၢၼ်ႈသမ်ႉယူႇၼႂ်းတိူင်းသိုၵ်းသေ ယိုဝ်းၵွင်ႈလူင်ဢွၵ်ႇၵႂႃႇၵူႈႁူးၵူႈတၢင်းၵူႈဝၼ်းလႄႈ မၢၵ်ႇၼႆႉတူၵ်းသႂ်ႇႁိူၼ်းယေးၵူၼ်းမိူင်း -ၵူၼ်းပိုၼ်ႉတီႈလၢတ်ႈၼင်ႇၼႆ။ လွင်ႈၼႆႉယူႇတီႈၽူႈတွႆႇႁွၵ်ႈသေတိတ်းတေႃႇၸူး ၽူႈၶၢၼ်ပၢၵ်ႇတင်းသွင်ၾၢႆႇဢမ်ႇလႆႈလႄႈဢမ်ႇၸၢင်ႈယိုၼ်ယၼ်။
ဝၼ်းတီႈ 3 ၵျူႊလၢႆႊၼၼ်ႉ မၢၵ်ႇတူၵ်းသႂ်ႇႁိူၼ်းလင်ၼိုင်ႈတီႈပွၵ်ႈ 1 လႃႈသဵဝ်ႈ၊ ၵူၼ်းၼႂ်းမုင်ႉႁေႃႁိူၼ်းလဵဝ် 6 ၵေႃႉ တၢႆထင်တီႈ။
တီႈဝဵင်းလႃႈသဵဝ်ႈၼႆႉ တႄႇဢဝ်ဝၼ်းတီႈ 2 ၵျူႊလၢႆႊၼႆႉမႃး သိုၵ်း TNLA – PDF – MNDAA လႄႈသိုၵ်းမၢၼ်ႈပိုတ်းယိုဝ်းၵၼ်ႁၢဝ်ႈႁႅင်း။ တေႃႇထိုင်ဝၼ်းမိူဝ်ႈၼႆႉဝၼ်းတီႈ 10 ၵူၼ်းမိူင်းတၢႆယွၼ်ႉပၢင်တိုၵ်း 20 ပၢႆ။ မၢတ်ႇၸဵပ်းၸၢၵ်ႇမၢၵ်ႇမီး 30 ပၢႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ