ထုင်ႉပူင်း (ဢမ်ႇၼၼ်) ထုင်ႉတၢမ်ၽၢၵ်ႇၼႆႉ တႅၵ်ႇပဵၼ်ဝႆႉ 3 တွၼ်ႈ ၊ တွၼ်ႈၼိုင်ႈ ယူႇၼႂ်းၸႄႈဝဵင်းႁူဝ်ပူင်း ၊ တွၼ်ႈ ၼိုင်ႈ ယူႇၼႂ်းၸႄႈဝဵင်းသီႇသႅင်ႇလႄႈ ထႅင်ႈတွၼ်ႈၼိုင်ႈသမ်ႉ ယူႇၼႂ်းၸႄႈဝဵင်းၵျွၵ်ႉတလူင်း ၸႄႈတွၼ်ႈတူၼ်ႈတီး ၸိုင်တႆးပွတ်းၸၢၼ်း ၼႆယဝ်ႉ။

တင်းသၢမ်တွၼ်ႈၼႆႉ ၺႃးၸုမ်းပျီႇတူႉၸိတ်ႉပဢူဝ်း PNO ၵဵပ်းၶွၼ်ႇ၊ ၺႃးသိုၵ်းမၢၼ်ႈ ၵဵပ်းသိုၵ်းလႄႈ ၵူၼ်းၼုမ်ႇ သမ်ႉပေႃးဢမ်ႇႁတ်းယူႇ တီႈႁိူၼ်းတီႈယေးၵေႃႈ တေႃႉတႄႉၵိုတ်းၵူၼ်းထဝ်ႈၵူၼ်းၵႄႇ ပႂ်ႉဝႆႉၵူၺ်း။ ၵူၼ်းၽုၵ်ႇၶဝ်ႈၽုၵ်ႇ ၼႃး ပေႃးဢမ်ႇၶႂ်ႈမီး။

ထိုင်တီႈ ၸုမ်း PNO သမ်ႉ ပေႃးလႆႈၸီႉသင် ႁႂ်ႈၵၢင်ႉၵႄႇ ၵဵပ်းသဵၼ်ႈမၢႆ ၵူၼ်းၵႂႃႇမိူင်းထႆး သေဢမ်ႇၵႃး တဵၵ်းၸႂ်ႉၵဵပ်းငိုၼ်းပႃး ၼိုင်ႈႁိူၼ်းလႂ် 4 သႅၼ်ပျႃးထႅင်ႈ ဝႃႈၼႆ။

ၸုမ်းပျီႇတူႉၸိတ်ႉပဢူဝ်း PNO သင်ႇၵၢင်ႉၵႄႇလူင်းပွင်ႇၶၢဝ်ႇဝႆႉ ၼႂ်းလိူၼ်ၵျူႊလၢႆႊ ပီ 2024 ၼႆႉဝႆႉ၊ တေႃႇထိုင် ယၢမ်းလဵဝ် ပႆႇလူင်းၵဵပ်းငိုၼ်းတီႈၵူၼ်းဝၢၼ်ႈသေတႃႉ ဢိင်ၼိူဝ် ငဝ်းလၢႆးႁႃၵိၼ်လဵင်ႉတွင်ႉယၢပ်ႇ ၸိူင်ႉၼႆ ႁဵတ်းႁႂ်ႈၵူၼ်းထုင်ႉပူင်း လိူတ်ႇမႆႈႁူဝ်ၶႆႈဝႆႉ လွင်ႈၼိုင်ႈ။ ၵူၼ်းမီးလုၵ်ႈလၢင်း ၵႂႃႇႁဵတ်းၵၢၼ် တၢင်ႇမိူင်းၵေႃႈဢမ်ႇသႃႇ ၊ ဢၼ်မီးလုၵ်ႈလၢင်း ယူႇၵိုၵ်းႁိူၼ်းၵေႃႈ ၼႃႇၸႂ် ၊ ပိူင်လူင် ပေႃးၾိုၵ်းၵၢၼ်သိုၵ်းၸွမ်းၶဝ်ယဝ်ႉ ၵူၼ်းမိူင်းၵူဝ်ၶဝ် ဢဝ်ၵူၼ်းသိုၵ်းမႂ်ႇ ၸိူဝ်း ၼၼ်ႉ သူင်ႇပၼ်သိုၵ်းမၢၼ်ႈၸႂ်ႉ  ၵူၼ်းထုင်ႉပူင်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“ၵူၼ်းဝၢၼ်ႈတႄႉ ဢွၼ်ၵၼ်မႆႈၸႂ်ၼမ်ဢေႃႈ။ ၵူၼ်းၸိူဝ်းမီးလုၵ်ႈလၢင်းၵႂႃႇမိူင်းထႆးၵေႃႈ ပေႃးပိူၼ်ႈ မႃးၵဵပ်းငိုၼ်း ဢမ်ႇႁူႉတေလႆႈဢဝ်ငိုၼ်းတီႈလႂ်ပၼ်ၼႆ လႆႈဝူၼ်ႉၶမ်ၸႂ်ဝႆႉ။ ၸိူဝ်းယူႇတီႈႁိူၼ်းၵေႃႈ တေလႆႈၵႂႃႇၾိုၵ်းၵၢၼ်သိုၵ်းႁႃႉ ဢမ်ႇၾိုၵ်း ၼႆၸိူဝ်းၼႆႉ ဝူၼ်ႉယၢပ်ႇ ယွၼ်ႉဝႃႈ ၵူဝ်ဢမ်ႇမီးလွင်ႈႁူမ်ႇလူမ်ႈ။ ပေႃး PNO ၶဝ်ႁွင်ႉၵႂႃႇယဝ်ႉ ၸွင်ႇသိုၵ်းမၢၼ်ႈသမ်ႉ တေႁွင်ႉထႅင်ႈၼႆ ပဵၼ်ဢၼ်မႆႈၸႂ်ဝႆႉ။ ၾၢႆႇ PNO ၶဝ်တႄႉလၢတ်ႈဝႃႈ ပေႃးၵႂႃႇၾိုၵ်းၵၢၼ်သိုၵ်းၸွမ်းၶဝ် တေပၼ်ဝႂ်လူင်း ပၢင်ၾိုၵ်းၵၢၼ်သိုၵ်းဝႆႉ လႄႈ ၶဝ်တေဢဝ်ပုၼ်ႈၽွၼ်း။ တေလွတ်ႈသိုၵ်းမၢၼ်ႈၵဵပ်းထႅင်ႈၵမ်းၼိုင်ႈယူႇ”- ဝႃႈ ၼႆ။

ဝၢၼ်ႈဢၼ်ၺႃး ၸုမ်းပျီႇတူႉၸိတ်ႉပဢူဝ်း PNO သင်ႇမႃး လွင်ႈၵဵပ်းငိုၼ်း ၵူၼ်းၵႂႃႇမိူင်းထႆးၼႆႉ ပဵၼ်ဝၢၼ်ႈ ဢၼ်မီးၼႂ်းဢိူင်ႇၼမ်ႉၵူတ်ႉ မိူၼ်ၼင်ႇ – ဝၢၼ်ႈတူၼ်ႈမူင်ႈ ၊ ဝၢၼ်ႈႁူဝ်တၢတ်ႇ ၊ ဝၢၼ်ႈႁၢင်လွႆး ၊ ဝၢၼ်ႈသီႇသုင်ႇ ၊ ဝၢၼ်ႈတိုဝ်ႉႁိူဝ်း ၸဵမ်ၸိူဝ်းၼႆႉ။ ဝၢၼ်ႈၸိူဝ်းၼႆႉသမ်ႉ ပဵၼ်ဝၢၼ်ႈဢၼ်တိတ်းၸပ်းၵၼ် တၢင်းသၢပ်ႇၼမ်ႉတၢမ်ၽၢၵ်ႇ ၼိုင်ႈဝၢၼ်ႈလႂ်မီး လင်ၶႃးႁိူၼ်း 50 ၶိုၼ်ႈၼိူဝ်။   

တီႈထုင်ႉပူင်းၼႆႉ ဝၢၼ်ႈတႆးမီးၼမ်သေတႃႉ ယူႇတီႈ လူင်ပွင်ၸိုင်ႈမိူင်းႁူမ်ႈတုမ် ပၢၼ်သိုပ်ႇပၢၼ် ၸႅၵ်ႇပဵၼ်လၢႆတွၼ်ႈလၢႆပွတ်းဝႆႉ။ ဢဝ်ဢိူင်ႇ ၊ ဝၢၼ်ႈ ၸိူဝ်းၼၼ်ႉ တတ်းထႅၵ်ႇသႂ်ႇၼႂ်း 3 ၸႄႈဝဵင်းၼႆႉ မိူၼ်ၼင်ႇ ၸႄႈဝဵင်းသီႇသႅင်ႇ ၊ ႁူဝ်ပူင်းလႄႈ ၼႂ်းတူၼ်ႈတီး။ ႁဵတ်းႁႂ်ႈပီႈၼွင်ႉၵၼ် ၵူၼ်းဝၢၼ်ႈလဵဝ်ၵၼ်ၵေႃႈ ဢမ်ႇလႆႈယူႇၵူမ်ၵဵဝ်ပဵၼ်ဢၼ်လဵဝ်ၵၼ်။ ထိုင်တီႈၸတ်းပၢင်လိူၵ်ႈတင်ႈမႃးၵေႃႈ တႃႇၸၢဝ်းတႆး ၼိုင်ႈၵေႃႉ တေလႆႈပဵၼ်ၽူႈတႅၼ်း (တႅၼ်းၽွင်း) ၼၼ်ႉ ဢမ်ႇငၢႆႈ ယွၼ်ႉဝႃႈ လႆႈယူႇတႅၵ်ႇယႅၵ်ႈၵၼ် ဝႆႉၼႆ ၵူၼ်း ထုင်ႉပူင်းၵေႃႉၼိုင်ႈ လၢတ်ႈၼႄဝႆႉၼင်ႇၼႆ –

“သိုၵ်းမၢၼ်ႈလႄႈ ၸုမ်းပျီႇတူႉၸိတ်ႉပဢူဝ်းၼႆႉ ၶဝ်တေၶႂ်ႈႁဵတ်းႁိုဝ်တႄႉ ဢမ်ႇႁူႉ ပေႃးပဵၼ်ဝၢၼ်ႈတႆးၼႆ ၼႂ်းထုင်ႉပူင်းၼႆႉ ၶဝ်တေၸႅၵ်ႇပဵၼ်လၢႆတွၼ်ႈ ၶဝ်ဢမ်ႇပၼ်ယူႇ ၼႂ်းၸႄႈဝဵင်းလဵဝ်ၵၼ် ၸႅၵ်ႇပဵၼ် ၸႄႈဝဵင်းႁူဝ်ပူင်း ၊ ၸႄႈဝဵင်းသီႇသႅင်ႇ ၊ ၸႄႈဝဵင်းတူၼ်ႈတီး ၼႆၸိူဝ်းၼႆႉ။ ပၼ်ႁႃၸိူဝ်းၼႆႉ ပေႃးလိူၵ်ႈ တင်ႈၽူႈတႅၼ်းၽွင်း ၸႄႈဝဵင်းမႃးၼႆ ႁဵတ်း ႁိုဝ်ၵေႃႈ တႆးႁဝ်းဢမ်ႇပေႉပိူၼ်ႈယူႇယဝ်ႉၶႃႈ ယွၼ်ႉဝႃႈ ၵူၼ်းၸၢဝ်းတႆး ဢမ်ႇပဵၼ်ဢၼ်လဵဝ် ဢမ်ႇၵူမ်ၵဵဝ်ၵၼ်လႆႈလႄႈ ဢမ်ႇပေႉပိူၼ်ႈလႆႈ” – ဝႃႈၼႆ။

ယၢမ်းလဵဝ် တီႈထုင်ႉပူင်းၼႆႉ ပဵၼ်ၶၢဝ်းၽုၵ်ႇသွမ်ႈၶဝ်ႈၼႃး မၢင်တီႈၵေႃႈ လႆႈၽုၵ်ႇၶဝ်ႈၸဝ်ႉလႄႈ တူၼ်ႈယႂ်ႇဢွၵ်ႇႁူင်းယဝ်ႉ။ မၢင်တီႈၵေႃႈ တိုၵ်ႉတႄႇသွမ်ႈၵေႃႈမီး။ ယွၼ်ႉၵူၼ်းထုင်ႉပူင်း ပၢႆႈဢွၵ်ႇ ပိုၼ်ႉတီႈၼမ်ၼႃႇယဝ်ႉလႄႈ ၵူၼ်းသွမ်ႈ ၼႃးၵေႃႈ ဢမ်ႇၵိုတ်းၼမ် ပေႃးလႆႈ ၸၢင်ႈၵူၼ်းထုင်ႉၼွင်ႁၢႆးယႃႈ မႃးၽုၵ်ႇၸွႆႈ။

ၵူၼ်းထုင်ႉပူင်းၼႆႉ ယၢမ်းလဵဝ် ဢမ်ႇလႆႈၶိုၼ်း ၼမ်ႉမျၢတ်ႈၼမ်ႉတွၼ်းသင်ၵေႃႈ ၵမ်ႈၼမ် ဢမ်ႇမီးတၢင်းလိူၵ်ႈလႄႈ ၵႃႈလႆႈၽုၵ်ႇၵိၼ်ၶဝ်ႈၵူၺ်း။ မိူၼ်ၼင်ႇ ၵႃႈၸၢင်ႈလၢႆးဝၼ်းၼႆၵေႃႈ ၼိုင်ႈၵေႃႉလႂ် လႆႈပၼ် တီႈဢေႇသုတ်း ၼိုင်ႈမိုၼ်ႇပျႃးယဝ်ႉလႄႈ တႃႇတေလႆႈ တိုၼ်းလၢင်းၶိုၼ်းၵူၺ်းၵေႃႈ ဢမ်ႇငၢႆႈ သမ်ႉမီးၸုမ်းၼၼ်ႉ ၸုမ်းၼႆႉ မႃးယွၼ်းၵဵပ်းငိုၼ်းၵဵပ်းၶွၼ်ႇထႅင်ႈလူးၵွၼ်ႇၼႆ –  ၵူၼ်းပိုၼ်ႉတီႈ လၢတ်ႈၼင်ႇၼႆ။

ႁၢင်လိူၼ်ၵျုၼ်ႊပူၼ်ႉမႃးၼႆႉၵေႃႈ ၸုမ်းပျီႇတူႉၸိတ်ႉ ပဢူဝ်း PNO ၸီႉသင်ႇၵၢင်ႉၵႄႇ ၼႂ်းထုင်ႉပူင်း ႁႂ်ႈသူင်ႇၵူၼ်းမႂ်ႇပၼ် တႃႇၾိုၵ်းၵၢၼ်သိုၵ်း ၼိုင်ႈဝၢၼ်ႈလႂ် တေဢမ်ႇလႆႈယွမ်း 4 ၵေႃႉ။ ဝၢၼ်ႈဢၼ် ဢမ်ႇပၼ်လႆႈသမ်ႉ ၵဵပ်းငိုၼ်းၼပ်ႉ ႁူဝ်သိပ်းသႅၼ်ပျႃး ဝႃႈၼႆ။