ၵူၼ်းပၢႆႈၽေးသိုၵ်း တီႈဝဵင်းသီႇပေႃႉ ႁူဝ်ၵူၼ်း 1,000 ပၢႆ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ယွၼ်ႉသဵၼ်ႈတႃႈသၢႆတၢင်း ထုၵ်ႇပိၵ်ႉဢိုတ်း ဝႃႈၼႆ။

တႄႇဢဝ် ဝၼ်းတီႈ 25/06/2024 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် တီႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ၵူၼ်းၼႂ်းဝဵင်းသီႇပေႃႉ ဢွၼ်ၵၼ်ပၢႆႈၽေးသိုၵ်း ႁွတ်ႈထိုင်ဝႆႉ ၸွမ်းဝတ်ႉဝႃးၽႃသိူဝ်ႇ ႁူဝ်ၵူၼ်း 1,000 ပၢႆ ယွၼ်ႉသိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပိုတ်းယိုဝ်းၵၼ် ႁၢဝ်ႈႁႅင်း ၼႆယဝ်ႉ။

ၵူၼ်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ဢၼ်လူဝ်ႇတၢင်းၸွႆႈထႅမ်ႁႅင်းတႄႉ ပဵၼ်ၶဝ်ႈၼမ်ႉတၢင်းၵိၼ်ဢေႃႈ။ ယွၼ်ႉဝႃႈ သဵၼ်ႈတႃႈသၢႆတၢင်း တီႈဝဵင်းသီႇပေႃႉၼႆႉ ထုၵ်ႇပိၵ်ႉဢိုတ်းပႅတ်ႈမူတ်းယဝ်ႉ။ ၶူဝ်းၵုၼ်ႇ ဢမ်ႇၸၢင်ႈတေႃႉမႃးၶၢႆလႄႈ ႁဵတ်းႁႂ်ႈၶၼ်ၶူဝ်းၵုၼ်ႇ ပုင်ႈၶိုၼ်ႈႁႅင်း။ မိူၼ်ၼင်ႇ ၶဝ်ႈသၢၼ် 1 ထူင် 120,000 ပျႃးယဝ်ႉ ၵူႈပွၵ်ႈ 95,000 ပျႃး။ ၶႆႇၵႆႇၼႆႉ ပေႃးလႆႈၶဝ်ႈထႅဝ်သေ သိုဝ်ႉၶႃႈဢေႃႈ 1 လုၵ်ႈ 500 ပျႃး ၵူႈပွၵ်ႈ 250 ပျႃးၵူၺ်း”- ဝႃႈၼႆ။

ယၢမ်းလဵဝ် ၼႂ်းဝဵင်းသီႇပေႃႉၼႆႉ ယဵၼ်သီႇမူတ်း ၵိုတ်းၵူၼ်းပႂ်ႉႁိူၼ်း ဝႆႉၸိူင်ႉၼၼ်ၵူၺ်း ထႅင်ႈလွင်ႈၼိုင်ႈၵေႃႈ မိူဝ်ႈဝၼ်းတီႈ 27 လိူၼ်ၵျုၼ်ႊၼႆႉ သိုၵ်းမၢၼ်ႈ ပၢႆႁၢမ်ႈၵူၼ်းမိူင်းဢွၵ်ႇႁိူၼ်းယေးထႅင်ႈ ၼႆယဝ်ႉ။

“ၸူဝ်ႈပၢင်တိုၵ်းၼႆႉ ၶၼ်ၶဝ်ႈသၢၼ်ၵေႃႈၶိုၼ်ႈ မၢင်သႅင်ႇ ဢမ်ႇမီးၶၢႆယဝ်ႉ။ တႃႇတေၸွႆႈထႅမ် ၵူၼ်းပၢႆႈၽေးသိုၵ်းၼႆႉ ႁဝ်းၶႃႈ လႆႈၵႂႃႇသိုဝ်ႉၸဝ်ႈၸၢၵ်ႈၶဝ် တမ်ပၼ်ၶႃႈဢေႃႈ။ ယၢမ်းလဵဝ် ၸဝ်ႈၸၢၵ်ႈၶဝ်သမ်ႉပိၵ်ႉသေ ပၢႆႈၽေးထႅင်ႈ သင်ဝႃႈ ပၢင်တိုၵ်းပဵၼ်ၵႂႃႇၶၢဝ်းႁိုင်ထႅင်ႈတႄႉ လွင်ႈၵိၼ်ယႅမ်ႉတႃႇၵူၼ်းမိူင်းၼႆႉ တေယၢပ်ႇၽိုတ်ႇထႅင်ႈ ဢမ်ႇႁၢၼ်ႉ။ ဢၼ်လူဝ်ႇတၢင်းၸွႆႈထႅမ်ထႅင်ႈတႄႉ ၶူဝ်းၸႂ်ႉတိုဝ်းသုၼ်ႇတူဝ် ၼၢင်းယိင်းဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းမိူင်းသီႇပေႃႉ ဢၼ်လႆႈပၢႆႈၽေးသိုၵ်းဝႆႉတႄႉ တင်းမူတ်းဢမ်ႇယွမ်း 10 ပွၵ်ႉ ၵမ်ႈၼမ် ပၢႆႈႁွတ်ႈဝႆႉ တၢင်းဝတ်ႉၼွင်ၵၢတ်ႇ၊ ၵၢင်ႉမေႃႇ၊ ၼွင်ဢိုင်ႇ၊ ၼွင်ဢၢင်ႇ၊ သီႇသုင်ႇ၊ ၵျွင်းၵဝ်ႇ၊ ၵုင်းသႃႇ၊ ၵုင်းၵေႃႇ၊ ယေႇႁေႃႇလႄႈ ဝတ်ႉ 2500 ၸိူဝ်းၼႆႉ။