ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး ႁူဝ်ၵူၼ်း 8,000 ပၢႆ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်လႄႈ ယႃႈယႃ ၸိူဝ်းၼႆႉႁႅင်း ဝႃႈၼႆ။
တႄႇဢဝ် ဝၼ်းတီႈ 25-30/6/2024 ၼႆႉ ၵူၼ်းမိူင်းၵျွၵ်ႉမႄး ဢွၼ်ၵၼ်ပၢႆႈၽေးသိုၵ်း သွၼ်ႈဝႆႉတီႈဝတ်ႉၼႃးပဵင်း ႁူဝ်ၵူၼ်း 2,045 ၵေႃႉ၊ ဝတ်ႉၶူဝ်ဢုင် 677 ၵေႃႉ၊ ၼွင်ပိင်လူင် 900 ၵေႃႉ၊ ဝတ်ႉၶူဝ်မုင်း 200 ၵေႃႉ၊ ဝတ်ႉႁွင်ႈႁိူင်း 900 ၵေႃႉ၊ ဝတ်ႉၼွင်ပိင်ဢွၼ်ႇ 600 ၵေႃႉ၊ ဝတ်ႉၶူဝ်တႅၼ်ႈ 376 ၵေႃႉ၊ ဝတ်ႉၶၢႆးမွၼ် 750 ၵေႃႉ၊ ဝတ်ႉပုင်ႇဝူင်း 1,411 ၵေႃႉလႄႈ ဝတ်ႉၸွႆးၵုင်း 130 ၵေႃႉ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယွၼ်ႉပၢင်တိုၵ်း သိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ဢၼ်လူဝ်ႇတၢင်းၸွႆႈထႅမ်ႁႅင်းတႄႉ ပဵၼ်ၶဝ်ႈၼမ်ႉတၢင်းၵိၼ်ၶႃႈဢေႃႈ။ ယဝ်ႉၵေႃႈ ယႃႈယႃ ၸိူဝ်းၼႆႉ။ ဢၼ်ယၢပ်ႇၽိုတ်ႇထႅင်ႈ လွင်ႈၼိုင်ႈသမ်ႉ လွင်ႈၵူၼ်းၼႂ်းဝဵင်းပၢႆႈဢွၵ်ႇမႃးတီႈဝၢၼ်ႈ ယွၼ်ႉပဵၼ်ၶၢဝ်းၾူၼ်လႄႈ သဵၼ်ႈတၢင်းယၢပ်ႇၽိုတ်ႇ တႃႇၵႂႃႇမႃးတေႃႉသူင်ႇ ၵၼ်ဢေႃႈ”- ဝႃႈၼႆ။
ၵွပ်ႈၼႆလႄႈ သင်ဝႃႈ ၽူႈမီးၼမ်ႉၸႂ်ၸေႇတႃႇၼ တီႈၸမ်ၵႆ ၶႂ်ႈၸွႆႈထႅမ်ၼႆၸိုင် ၸွႆႈလႆႈတီႈ ၸၢႆးႁၵ်ႉၶိူဝ်းႁၢၼ် Kpay – 09428344823 (SAI TUN TUN NAING) ဢမ်ႇၼၼ် ၸၢႆးၵျေႃႇလႃႉ (ၶႅၼ်လမ်) Kpay – 09664455669 (SAI KYAW HLA) ၵေႃႈလႆႈ ဝႃႈၼႆ။
မိူဝ်ႈၼႆႉ ဝၼ်းတီႈ 01/07/2024 ယၢမ်းၵၢင်ၼႂ် 10 မူင်းပၢႆ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇသႂ်ႇထႅင်ႈ တီႈဝဵင်းၵျွၵ်ႉမႄး မၢၵ်ႇလူင်တူၵ်းသႂ်ႇ တီႈႁၢၼ်ႉၶၢႆၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) ဢၼ်ၶၢႆၵိုၵ်းႁိူၼ်း ၸိုဝ်ႈႁွင်ႉ ၶျၢၼ်းမေႉသျႂႆႇ။ ယဝ်ႉၵေႃႈ တိူဝ်ႉပႃး ႁူင်းႁဵၼ်းၸၼ်ႉသုင် မၢႆ 9 ဝဵင်းၵျွၵ်ႉမႄး လူႉၵွႆထႅင်ႈ – ၵူၼ်းၵျွၵ်ႉမႄးလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ