ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး ၼပ်ႉႁူဝ်ႁဵင် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်ႁႅင်း မၢင်ၸိူဝ်း ပၢႆႈဢွၵ်ႇမႃး ဢမ်ႇတၼ်းလႆႈသင် ဝႃႈၼႆ။
တႄႇဢဝ် ဝၼ်းတီႈ 25 – 30/06/2024 ၶၢဝ်းတၢင်း 6 ဝၼ်းမႃးၼႆႉ ၵူၼ်းမိူင်းၵျွၵ်ႉမႄး ဢွၼ်ၵၼ်ပၢႆႈၽေး သိုၵ်းဢွၵ်ႇမႃး သွၼ်ႈဝႆႉၸွမ်းဝတ်ႉဝႃးၽႃသိူဝ်ႇလႄႈ ႁိူၼ်းယေး ပီႈၼွင်ႉၽႂ်မၼ်း ၼပ်ႉႁူဝ်ႁဵင် ယွၼ်ႉသိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပိုတ်းယိုဝ်းၵၼ် ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်မႃး ပွႆႇမၢၵ်ႇထႅင်ႈ ၵူႈဝၼ်းၶိုၼ်း ၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ပၢႆႈမႃး တီႈဝတ်ႉၶၢႆး မွၼ်ၼႆႉ ႁူဝ်ၵူၼ်းမီး 320 ၵေႃႉ မိူဝ်ႈၼႆႉ ပၢႆႈမႃးထႅင်ႈ 411 ၵေႃႉ။ မိူဝ်ႈလဵဝ် ပီႈၼွင်ႉၶၢႆးမွၼ် ဢဝ်ပုၼ်ႈ ၽွၼ်း လဵင်ႉလူဝႆႉ ပႆႇမီးၸဝ်ႈတႃႇၼၶႃႈ။ ၵူၼ်းမိူင်းၸိူဝ်းပၢႆႈမႃးၼႆႉ ပဵၼ်ၵူၼ်းပၢႆႈၽေး မိူဝ်ႈပီပူၼ်ႉ ပၢႆႈမႃး ၼႂ်းဝဵင်းသေ ယၢမ်းလဵဝ် သိုပ်ႇၶၢႆႉပၢႆႈမႃးထႅင်ႈၶႃႈဢေႃႈ”- ဝႃႈၼႆ။
ၵူၼ်းမိူင်းၵျွၵ်ႉမႄး ဢၼ်ပၢႆႈသွၼ်ႈဝႆႉ ၸွမ်းဝတ်းဝႃးၽႃသိူဝ်ႇသမ်ႉ မိူၼ်ၼင်ႇ ဝတ်ႉၼႃးပဵင်း ႁူဝ်ၵူၼ်း 1,000 ပၢႆ ၊ ဝတ်ႉၶူဝ်တႅၼ် 200 ပၢႆ၊ ဝတ်ႉပုင်ႇဝူဝ်း 1,200 ပၢႆ။ ယဝ်ႉၵေႃႈ ဝတ်ႉၼွင်ပိင်ဢွၼ်ႇ၊ ၶူဝ်ဢုင်၊ ၵၢင်မိူင်း၊ ဝတ်ႉၵမ်ႇပေႃးၸတႆးလႄႈ ဢိၵ်ႇထႅင်ႈလၢႆလၢႆတီႈ ယၢမ်းလဵဝ် ယၢပ်ႇၽိုတ်ႇဝႆႉ ၶဝ်ႈၼမ်ႉတၢင်း ၵိၼ် ၼႆယဝ်ႉ။
“ဢၼ်ယၢပ်ႇၽိုတ်ႇႁႅင်းတႄႉ ၶဝ်ႈၼမ်ႉတၢင်းၵိၼ်ၼၼ်ႉၶႃႈယဝ်ႉ။ ယဝ်ႉၵေႃႈ ၶူဝ်းၼုင်ႈဝႂ်၊ ၽႃႈႁူမ်ႇ၊ သုတ်း ၵၢင် ၸိူဝ်းၼႆႉ။ ၵူၼ်းမိူင်းႁဝ်း ၸိူဝ်းၸမ်တပ်ႉၼၼ်ႉ ၶႅၼ်းဢမ်ႇတၼ်းလႆႈသင်မႃးၶႃႈယဝ်ႉ ၶဝ်ပၢႆႈဢွၵ်ႇ မႃးၸွမ်းၼႂ်းၵႄႈမၢၵ်ႇၵွင်ႇၵွၼ်ႇၶႃႈဢေႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။
ယွၼ်ႉပၢင်တိုၵ်းၼႆႉသေ မၢၵ်ႇလူင်လႄႈ မၢၵ်ႇၶိူင်ႈမိၼ် သိုၵ်းမၢၼ်ႈ တူၵ်းသႂ်ႇၵူၼ်းမိူင်း လူႉတၢႆ ဢမ်ႇယွမ်း 30 ၵေႃႉယဝ်ႉ မၢတ်ႇၸဵပ်းထႅင်ႈ တင်းၼမ် ၼႂ်းၶၢဝ်းတၢင်း 6 ဝၼ်းမႃးၼႆႉ ဝႃႈၼႆ။
ယၢမ်းလဵဝ် တီႈဝဵင်းၵျွၵ်ႉမႄးၼႆႉ သိုၵ်းတဢၢင်း TNLA ယိုတ်းလႆႈဝႆႉ ၵမ်ႈၼမ်သေတႃႉ ၵိုတ်းတပ်ႉသိုၵ်း မၢၼ်ႈ ၸၵၶ 1 ၵျွၵ်ႉမႄး ယဝ်ႉၵေႃႈ ၶမယ 501 – 502 ၸိူဝ်းၼႆႉတႄႉ ပႆႇယိုတ်းလႆႈ ဝႃႈၼႆ။
