ပျီႇတူႉၸိတ်ႉပဢူဝ်း PNO ဢဝ်ႁူဝ်ၶေႃႈ လွင်ႈႁူမ်ႇလူမ်ႈ ပိုၼ်ႉတီႈၼႆသေ ၾိုၵ်းၵၢၼ်သိုၵ်းပၼ်ၵူၼ်းၼုမ်ႇ ၼႂ်းပိုၼ်ႉတီႈၶဝ်ၵုမ်းၵမ် ၼႂ်းၸႄႈတွၼ်ႈတူၼ်ႈတီး ။
ပၢင်သွၼ်ၵၢၼ်သိုၵ်းၼႆႉတႄႇၸတ်းၼႂ်းဝၼ်းတီႈ 13 ၵျုၼ်ႊတေႃႇထိုင် 13 ၵျူႊလၢႆႊ တႃႇၶၢဝ်းတၢင်း ၼိုင်ႈလိူၼ်။
ဝၼ်းတီႈ 25 ၵျုၼ်ႊၼႆႉ ၵႅမ်ၽူႈၵွၼ်းသိုၵ်း PNO ၶုၼ်ႇၼေႇဝိၼ်းထုၼ်း မႃးတီႈပၢင်သွၼ်သေ မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ- “ၵူၼ်းၼုမ်ႇၼႂ်းဝၼ်းမိူဝ်ႈၼႆႉ ပေႃးမေႃဝႆႉၵၢၼ်သိုၵ်း ၸင်ႇတေၸၢင်ႈၵႅတ်ႇၶႄႁႄႉၵင်ႈပိုၼ်ႉတီႈၸဝ်ႈၵဝ်ႇလႆႈ။ ၸင်ႇတေၸၢင်ႈတိုၵ်းလိုပ်ႈၽူႈၶဵၼ်ၸိူဝ်ႉၸၢတ်ႈလႆႈ”- ဝႃႈၼႆ။
ႁွင်ႈၵၢၼ်ၾၢႆႇပွင်ႇၶၢဝ်ႇ ပျီႇတူႉၸိတ်ႉပဢူဝ်း PNO တႅမ်ႈတၢင်ႇၶၢဝ်ႇဝႆႉဝႃႈ ပဵၼ်ၵူၼ်းၼုမ်ႇၼႂ်းပိုၼ်ႉတီႈ ဢႃယု ၼႂ်းၵႄႈ 18 ထိုင် 49 ပီ မႃးၾိုၵ်းၵၢၼ်သိုၵ်း။ ၽူႈၼမ်းၾၢႆႇတၢင်း ပျီႇတူႉၸိတ်ႉ ပဢူဝ်းလႄႈ ၽူႈၼမ်းတၢင်းတပ်ႉသိုၵ်းမၢၼ်ႈ တင်းသွင်ၾၢႆႇမႃးမွၵ်ႇလၢတ်ႈၶေႃႈၵႂၢမ်းဝႃႈၼႆ။
ၼႂ်းၶႅပ်းႁၢင်ႈၼၼ်ႉ လႆႈႁၼ်ၵူၼ်းၼုမ်ႇမွၵ်ႈ 100 ပၢႆမႃးၾိုၵ်းၵၢၼ်သိုၵ်း။ ၵမ်ႈၽွင်ႈၵေႃႈသႂ်ႇသိူဝ်ႈၶူဝ်းပျီႇတူႉၸိတ်ႉပဢူဝ်း ၵမ်ႈၽွင်ႈၵေႃႈ ၼုင်ႈၶူဝ်းသိုၵ်းမၢၼ်ႈ ။
တီႈပၢင်ၼၼ်ႉ ၾၢႆႇသိုၵ်းမၢၼ်ႈသမ်ႉ ပဵၼ်ၵႅၼ်ၸွမ်ႁၢၼ် ၵျေႃႇတူႇရ ႁွင်ႈၵၢၼ်ငဝ်ႈငုၼ်းၵုမ်းၵမ်ၽႅၼ်ယၼ်ႇသိုၵ်းမၢႆ 7 မႃးၶဝ်ႈႁူမ်ႈသေလၢတ်ႈဝႃႈ-“ တႃႇႁႂ်ႈၼႃႈလိၼ်ပဢူဝ်းတေၵတ်းယဵၼ်ၼၼ်ႉၾၢႆႇတၢင်းသိုၵ်းမၢၼ်ႈၵေႃႈ ၶတ်းၸႂ်ႁဵတ်းသၢင်ႈပၼ်ဢၼ်လီသုတ်း ” ဝႃႈၼႆ။
မိူဝ်ႈဝၼ်းတီႈ 26 ၵျုၼ်ႊၼၼ်ႉၵေႃႈ ၵႅမ်ၸွမ်သိုၵ်း ယႃႇပျေႉ ၶွင်ႇသီႇသိုၵ်းမၢၼ်ႈ မႃးတီႈဝဵင်းၵျွၵ်ႉတလူင်းသေႁူပ်ႉထူပ်းတင်းႁူဝ်ပဝ်ႈ PNO ဢူးဢွင်ႇၶမ်းထီႇ။ ဢုပ်ႇၵၼ်လွင်ႈသင်တႄႉဢမ်ႇလႆႈႁူႉၸွမ်းႁူဝ်ယွႆႈမၼ်း။
သိုၵ်းၸိူဝ်ႉၸၢတ်ႈပဢူဝ်း PNA ဢၼ် ဢူးဢွင်ႇၶမ်းထီႇဢွၼ်ႁူဝ်ၼႆႉ ဢဝ်ငမ်းယဵၼ်တင်းတပ်ႉသိုၵ်းမၢၼ်ႈ မိူဝ်ႈပီ 1991 သေ လႅၵ်ႈလၢႆႈပဵၼ် ပျီႇတူႉၸိတ်ႉပဢူဝ်း PNO ဝႆႉ။ ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃး ပျီႇၸူႉၸိတ်ႉပဢူဝ်း ႁဵတ်းၵေႃႉၸွႆႈထႅမ်ၵၢၼ်သိုၵ်းမၢၼ်ႈ။ ၾိုၵ်းၵၢၼ်သိုၵ်းပၼ်ၵူၼ်းမႂ်ႇသေ သူင်ႇႁႅင်းသိုၵ်းၸွႆႈထႅမ်သိုၵ်းမၢၼ်ႈတၢင်းပၢင်တိုၵ်း လႅၼ်လိၼ်တႆး-ယၢင်းလႅင် ၼၼ်ႉမႃးတႃႇသေႇ။
