သိုၵ်း TNLA တင်း PDF ႁူမ်ႈၵၼ် လေႃႇတိုၵ်း တပ်ႉသိုၵ်းမၢၼ်ႈ တီႈဝဵင်းမိူင်းၵုတ်ႈ ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉမၢၵ်ႇလူင်သႅၼ်း 120 mm ယိုဝ်းၸွႆႈၶိူဝ်းယႂ်း ဝႃႈၼႆ။
ဝၼ်းတီႈ 25/06/2024 တႄႇဢဝ်ယၢမ်းၵၢင်ၼႂ် တေႃႇထိုင် ႁူဝ်ၶမ်ႈ တပ်ႉသိုၵ်းတဢၢင်း TNLA ႁူမ်ႈတင်း ၸုမ်းၵႅတ်ႇ ၶႄၵူၼ်းမိူင်း PDF သေ လေႃႇတိုၵ်း တပ်ႉသိုၵ်းမၢၼ်ႈ ယိုတ်းမိူင်း တၢင်းၾၢႆႇတူၵ်း ဝဵင်းမိူင်းၵုတ်ႈ ဢၼ်မီးၼႂ်းၵႄႈမိူင်းလူင် – မိူင်းမိတ်ႈ ၾၢႆႇသိုၵ်းမၢၼ်ႈ မီးလွင်ႈမၢတ်ႇၸဵပ်းလူႉတၢႆၼမ်။
ၵူၼ်းမိူင်းၵုတ်ႈ ဢၼ်ၸမ်ၸႂ်တင်း ၸုမ်းယိပ်းၵွင်ႈၵၢင်ႇ ၼႂ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းလွႆတင်း PDF သမ်ႉ ဝႅတ်ႉလွမ်ႉပွတ်းဝၼ်းတူၵ်း ဝဵင်းမိူင်းၵုတ်ႈဝႆႉ မၢင်ဢွင်ႈတီႈၵေႃႈ ၶဝ်ယိုတ်းလႆႈ တပ်ႉပၢင်သဝ်း သိုၵ်းမၢၼ်ႈယဝ်ႉ။ လႆႈႁူႉဝႃႈ ၾၢႆႇသိုၵ်းမၢၼ်ႈ တူၵ်းသုမ်းလူႉတၢႆ ဢမ်ႇယွမ်း 50 ၵေႃႉယဝ်ႉ ၼႆဢေႃႈ၊ သိုၵ်းမၢၼ်ႈ ဢၼ်ပၵ်းဝႆႉ တၢင်းၾၢႆႇ ဢွၵ်ႇဝဵင်းမိူင်းၵုတ်ႈၼၼ်ႉၵေႃႈ ယိုဝ်းမၢၵ်ႇလူင်သႅၼ်း 120 mm ၸူးတၢင်းၾၢႆႇတူၵ်းဝဵင်းၼႆႉ တင်းၼမ်ၶႃႈယဝ်ႉ။ ၵူၼ်းမိူင်းတႄႉ ဢမ်ႇၸၢင်ႈပၢႆႈတၢင်းလႂ် လိူဝ်သေ မူၵ်းသွၼ်ႈဝႆႉ ၼႂ်းႁိူၼ်းယေးၽႂ်မၼ်းၵူၺ်းၶႃႈ”- ဝႃႈၼႆ။
လိူဝ်ၼၼ်ႉ သိုၵ်းတဢၢင်း TNLA တင်း PDF ပိၵ်ႉဢိုတ်းသဵၼ်ႈပႅတ်ႈ ဢဝ်တူၼ်ႈမႆႉ၊ မၢၵ်ႇႁိၼ် ၸိူဝ်းၼႆႉ ႁႄႉတဵင်တၢင်းဝႆႉ မိူၼ်ၼင်ႇ မိူင်းၵုတ်ႈ – မိူင်းမိတ်ႈ၊ မိူင်းမိတ်ႈ – ဝဵင်းလိူဝ်ႇ၊ မိူင်းမိတ်ႈ – သပိတ်ႉၵျိၼ်းလႄႈ မိူင်းၵုတ်ႈ- ဝဵင်းလိူဝ်ႇ ၸိူဝ်းၼႆႉ။
“ဢၼ်ၶဝ် ပိၵ်ႉဢိုတ်းသဵၼ်ႈတၢင်းၼႆႉ ၶဝ်ၵူဝ်သိုၵ်းမၢၼ်ႈ ထႅမ်ႁႅင်းသိုၵ်းၸူးၶဝ်ႁိုဝ် ဢမ်ႇႁူႉ။ ဢၼ်ႁဝ်းၶႃႈ ငိၼ်းမႃးတႄႉ သိုၵ်းလွႆၶဝ် မီးယိူင်းဢၢၼ်း တေသိမ်းဢဝ်မိူင်းၵုတ်ႈ၊ မိူင်းမိတ်ႈ၊ ၵျွၵ်ႉမႄး ၽွမ်ႉၽွမ်ႉၵၼ် ၼႆၶႃႈဢေႃႈ။ မိူဝ်ႈဝႃး ဝၼ်းတီႈ 25 ၼႆႉ သိုၵ်းလွႆၶဝ် ပိုတ်ႇၼႃႈသိုၵ်း တီႈဝဵင်းၵျွၵ်ႉမႄး၊ မိူင်းၵုတ်ႈ ၸိူဝ်းၼႆႉ မႃးႁၢဝ်ႈႁႅင်း။ တီႈမိူင်းမိတ်ႈၵေႃႈ ၶဝ်ထႅမ်ႁႅင်းသိုၵ်း ဢိူမ်ႈၸမ်သိုၵ်းမၢၼ်ႈဝႆႉထႅင်ႈ တင်းၼမ်ယဝ်ႉ”- ၵူၼ်းပိုၼ်ႉတီႈ မိူင်းၵုတ်ႈ သိုပ်ႇလၢတ်ႈၼႄၼင်ႇ ၼႆ။
မိူဝ်ႈၼႆႉ ဝၼ်းတီႈ 26/06/2024 ယၢမ်းၵၢင်ၼႂ် 9 မူင်းပၢႆ သိုၵ်းမၢၼ်ႈ ၸႂ်ႉၶိူင်ႈမိၼ် မႃးပွႆႇမၢၵ်ႇ ၾၢႆႇတူၵ်းဝဵင်း မိူင်းၵုတ်ႇထႅင်ႈ 3 လုၵ်ႈ လွင်ႈလူႉတၢႆမၢတ်ႇၸဵပ်းတႄႉ ပႆႇႁူႉ ဝႃႈၼႆ။
မိူဝ်ႈဝႃး ဝၼ်းတီႈ 25 ၼႆႉ သိုၵ်းတဢၢင်း TNLA ႁူမ်ႈတင်း PDF သေ ပိုတ်ႇၼႃႇသိုၵ်းၸူး တပ်ႉသိုၵ်းမၢၼ်ႈ ယိုတ်းမိူင်း ၼႂ်းၸိုင်ႈတႆးပွတ်းႁွင်ႇ မႃးႁၢဝ်ႈႁႅင်း မိူၼ်ၼင်ႇ ၸႄႈဝဵင်းၵျွၵ်ႉမႄး၊ သီႇပေႃႉ၊ ၼွင်ၶဵဝ်လႄႈ မိူင်းၵုတ်ႈ ၸိူဝ်းၼႆႉ။
