မိူဝ်ႈၼႆႉ ဝၼ်းတီႈ 26/6/2024 ၵၢင်ဝၼ်း 1 မူင်းၶိုင်ႈ မၢၵ်ႇလူင်တူၵ်းသႂ်ႇ ႁိူၼ်းၵူၼ်းမိူင်းလင်ၼိုင်ႈ ဢၼ်မီးတီႈပွၵ်ႉ 2 ယၢၼ်ႇၵိၼ်း ၼိူဝ်သဵၼ်ႈတၢင်းလူင်ၵႂႃႇလႃႈသဵဝ်ႈ ၸဝ်ႈႁိူၼ်းတၢႆထင်တီႈ 4 ၵေႃႉ မၢတ်ႇၸဵပ်းလိူဝ်ႁႅင်းၵေႃႉၼိုင်ႈ ။
![မၢၵ်ႇလူင် တူၵ်းသႂ်ႇၵူၼ်းၵျွၵ်ႉမႄး လူႉတၢႆ](https://shannews.org/wp-content/uploads/2024/06/004-2-1024x561.jpg)
ၵူၼ်းၵျွၵ်ႉမႄးလၢတ်ႈတီႈၽူႈတွႆႇႁွၵ်ႈဝႃႈ – “ ႁိူၼ်းလင်ၼႆႉ မီးၵူၼ်းႁူမ်ႈႁိူၼ်း 5 ၵေႃႉ ။ မၢၵ်ႇတႅၵ်ႇတိူဝ်ႉသႂ်ႇ ၶဝ်ပေႃႈမႄႈလုၵ်ႈ တၢႆထင်တီႈ 4 ၵေႃႉ ။ လုၵ်ႈယိင်းၶဝ် တႃႇၵေႃႉၼိုင်ႈတႄႉ ဢမ်ႇတၢႆ ။ လုၵ်ႈလၢင်းၶဝ် 2 ၵေႃႉ ဢၼ်တၢႆၵႂႃႇၼႆႉ ပဵၼ်ယိင်းႁႃႉၸၢႆးၼႆတႄႉ ပႆႇမီးၽႂ်မိူဝ်းတူၺ်းလႄႈ ပႆႇႁူႉလီလီ ” – ဝႃႈၼႆ။
မိူဝ်ႈဝႃး ဝၼ်းတီႈ 25/06/2024 တႄႇဢဝ်ယၢမ်းၵၢင်ၼႂ် 5 မူင်းပၢႆ တေႃႇထိုင်ႁူဝ်ၶမ်ႈၼႆႉၵေႃႈ သိုၵ်းမၢၼ်ႈ တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၸွမ်းသၢပ်ႇဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်း ပွၵ်ႉ 8 တၢႆၵေႃႉၼိုင်ႈ ပဵၼ် ၽူႈ ၸၢႆး တီႈ ပွၵ်ႉ 9 ၵေႃႈတၢႆၵေႃႉၼိုင်ႈပဵၼ်ၽူႈယိင်း။ လိူဝ်ၼၼ်ႉ မၢတ်ႇၸဵပ်း 10 ပၢႆ။
ၵူၼ်းၵျွၵ်ႉမႄးလၢတ်ႈတီႈၽူႈတွႆႇႁွၵ်ႈဝႃႈ – “ လႆႈငိၼ်းဝႃႈ သိုၵ်းလွႆ ယိုတ်းလႆႈ တပ်ႉၵွင်ႈလူင်ဢၼ်မီးတၢင်းၶဝ်ႈဝဵင်း ၼၼ်ႉလႄႈ ႁူင်းယႃလူင်ၵျွၵ်ႉမႄးၼၼ်ႉ ယဝ်ႉ ။ ယၢမ်းလဵဝ်ၼႆႉ တင်းသွင်ၾၢႆႇ ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉ ႁၢဝ်းႁႅင်း ။ တီႈဢၼ်သိုၵ်းလွႆယိုတ်းလႆႈၼႆႉၵေႃႈ သိုၵ်းမၢၼ်ႈ တေႃႉတႄႉမီး 2 – 3 ၵေႃႉၵူၺ်းယဝ်ႉလႄႈ ပေႃးငိၼ်း သဵင်ၵွင်ႈၵေႃႈ ၶဝ်ပေႃးပၢႆႈယဝ်ႉ။ ၸင်ႇဝႃႈသိုၵ်းလွႆၶဝ်ႈယိုတ်းဢဝ်ငၢႆႈငၢႆႈၵူၺ်း ” – ဝႃႈၼႆ။
မိူၼ်ၼင်ႇ တီႈဝဵင်းၼွင်ၶဵဝ်ၵေႃႈ မီးၶၢဝ်ႇလိုဝ်းဢွၵ်ႇမႃးဝႃႈ မိူဝ်ႈၼႆႉ ၵၢင်ဝၼ်း 12 မူင်း ၸုမ်းယိပ်းၵွင်ႈ ၸႂ်ႉ ႁႂ်ႈၵူၼ်းမိူင်းၶၢႆႉပၢႆႈ ဝႆႉတၢင်းမူတ်းဝႃႈၼႆ။