ၸၢဝ်းတႆး 100 ပၢႆ ဢၼ်လႆႈပၢႆႈၽေးသိုၵ်း ၵႂႃႇသွၼ်ႈဝႆႉတီႈဝဵင်းလွႆၸေႊ လႅၼ်လိၼ်ၶၢင် – ၶႄႇၼၼ်ႉ ယၢမ်းလဵဝ် ယၢပ်ႇၽိုတ်ႇလွင်ႈၵိၼ်ယႅမ်ႉလႄႈ ယႃႈယႃ ဝႃႈၼႆ။

တႄႇဢဝ် လိူၼ်မေႊၼၼ်ႉမႃး တေႃႇထိုင်ယၢမ်းလဵဝ် ၸမ်ၶၢဝ်းတၢင်းမွၵ်ႈလိူၼ်ယဝ်ႉ ပီႈၼွင်ႉၸၢဝ်းတႆး တီႈမၢၼ်ႈ ၸေႊ၊ မိူင်းမွၵ်ႇလႄႈ မၢၼ်ႈမေႃႇ ႁူဝ်ၵူၼ်း 128 ၵေႃႉ မုင်ႉႁေႃႁိူၼ်း 42 လင် ဢၼ်ပၢႆႈၵႂႃႇသွၼ်ႈဝႆႉ တီႈဝဵင်းလွႆၸေႊ ၸႄႈဝဵင်းမိူင်းမွၵ်ႇ ၸႄႈတွၼ်ႈမၢၼ်ႈမေႃႇ ၸႄႈမိူင်းၶၢင်ၼၼ်ႉ ယၢမ်းလဵဝ် ထူပ်းတၢင်းယၢပ်ႇၽိုတ်ႇ လွင်ႈၵိၼ်ယႅမ်ႉလႄႈ ယႃႈယႃ ၼႆယဝ်ႉ။

ၵူၼ်းမိူင်းမွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်းလဵဝ် ၵူၼ်းပၢႆႈၽေးႁဝ်းၶႃႈ ဢၼ်လူဝ်ႇတၢင်းၸွႆႈထႅမ်ႁႅင်းတႄႉ ပဵၼ်ယႃႈယႃၶႃႈဢေႃႈ။ ဢၼ်ၼႆႉ ပႆႇမီးၽႂ်ၸွႆႈထႅမ်မႃးၶႃႈ။ ယဝ်ႉၵေႃႈ တီႈပၢင်သဝ်း ၵူၼ်းပၢႆႈၽေးၼၼ်ႉ ဢမ်ႇမီးဝႆႉယႃႈယႃသင်ၶႃႈ”- ဝႃႈၼႆ။

လိူဝ်ၼၼ်ႉ မိူၼ်ၼင်ႇ ၶွင်ၵိၼ်ယႅမ်ႉ ၸိူဝ်းၼႆႉၵေႃႈ ပဵၼ်ဢၼ်ယၢပ်ႇၽိုတ်ႇဝႆႉ မိူၼ်ၵၼ် မၢင်ၸိူဝ်းပၢႆႈမႃး ဢမ်ႇတၼ်းလႆႈသင် လႆႈၶူဝ်းၸပ်းတူဝ် ၸိူဝ်းၼႆႉမႃးၵူၺ်း ဝႃႈၼႆ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 4 ၼၼ်ႉ ႁဝ်းၶႃႈ လႆႈမိူဝ်းၸွႆႈထႅမ်ပၼ် ၶွင်ၵိၼ်ယႅမ်ႉလႄႈ ၶိူင်ႈၸႂ်ႉတိုဝ်းသပျႃႇ ၸိူဝ်းၼႆႉ။ ယူႇတီႈ ပီႈၼွင်ႉတႆးႁဝ်း ၼႂ်းမိူင်းၶၢင် – မိူင်းမၢဝ်း ၵမ်ႉၸွႆႈမႃးသေ ႁဝ်း ၶႃႈ မိူဝ်းၸွႆႈထႅမ်ပၼ်ၶႃႈဢေႃႈ ယၢမ်းလဵဝ် ဢၼ်လူဝ်ႇႁႅင်းတႄႉ ပဵၼ်ယႃႈယႃၶႃႈယဝ်ႉ”- ဝႃႈၼႆ။

တႄႇဢဝ် လိူၼ်မေႊၼၼ်ႉမႃး ယွၼ်ႉသိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA ႁူမ်ႈပႃး PDF သေ ပဵၼ်ပၢင်တိုၵ်း ၵၼ် ႁၢဝ်ႈႁႅင်း ၼႂ်းၸႄႈတွၼ်ႈမျိတ်ႉၵျီးၼႃး (ၸေႈၼႃး) လႄႈ ၸႄႈတွၼ်ႈမၢၼ်ႈမေႃႇ ၸိူဝ်းၼႆႉ။ ပၢင်တိုၵ်းၼၼ်ႉ ၵမ်ႈၼမ် ပဵၼ်ၼႂ်းမူႇဝၢၼ်ႈပီႈၼွင်ႉၸၢဝ်းတႆးယူႇလႄႈ ႁဵတ်းႁႂ်ႈၵူၼ်းမိူင်း ပၢႆႈႁွတ်ႈထိုင် ၸွမ်းလႅၼ်လိၼ်ၶၢင် – ၶႄႇ၊ မၢၼ်ႈမေႃႇ၊ မျိတ်ႉၵျီးၼႃး၊ ၼမ်ႉၶမ်း ၸိူဝ်းၼႆႉ ၼပ်ႉႁူဝ်ႁဵင်။  

“ယွၼ်ႉပၢင်တိုၵ်းၶဝ်ၼၼ်ႉသေ ႁဝ်းၶႃႈ လႆႈပၢႆႈဢွၵ်ႇမႃး မၢင်ၸိူဝ်း လႆႈၶူဝ်းၼုင်ႈၸပ်းတူဝ်မႃးၵူၺ်း။ မၢင်ၸိူဝ်း ဢမ်ႇပၢႆႈ ထုၵ်ႇမၢၵ်ႇလူင်တူၵ်းသႂ်ႇ လူႉတၢႆၶမ်ၼႂ်းႁိူၼ်း ၸိူဝ်းၼႆႉၵေႃႈမီးဢေႃႈ။ ၵမ်ႈၼမ် ၵူၼ်းမိူင်း ဢၼ်လႆႈပၢႆႈမႃးၼႆႉ တၢင်းမၢၼ်ႈၸေႊ၊ မိူင်းမွၵ်ႇ၊ ဝဵင်းမႂ်ႇ၊ မၢၼ်ႈမေႃႇ ၸိူဝ်းၼႆႉ။ သင်ဝႃႈ ပၢင်တိုၵ်းၶဝ် တိုၵ်ႉသိုပ်ႇပဵၼ်ၶၢဝ်းႁိုင်တႄႉ ႁဝ်းၶႃႈ ၵူၼ်းမိူင်းၼႆႉ တိုၼ်းတေယၢပ်ႇၽိုတ်ႇ လိူဝ်ႁႅင်းဢမ်ႇႁၢၼ်ႉ” – ၵူၼ်းပၢႆႈၽေးသိုၵ်း တီႈဝဵင်းမိူင်းမွၵ်ႇ လၢတ်ႈၼႄၼင်ႇ ၼႆ။

ၵမ်ႈၼမ် ပီႈၼွင်ႉၸၢဝ်းတႆး ၼႂ်းမိူင်းၶၢင်သမ်ႉ ႁဵတ်းၵၢၼ်ၼႃး ပဵၼ်ပိူင်ယႂ်ႇလႄႈ ယၢမ်းလဵဝ် ထိုင်ၶၢဝ်းၽုၵ်ႇသွမ်ႈၵေႃႈ ယင်းပႆႇလႆႈၽုၵ်ႇ တႃႇပီၼႃႈပီၼႂ်းမႃးတႄႉ တိုၼ်းတေယၢပ်ႇၽိုတ်ႇ လွင်ႈၵိၼ်ယႅမ်ႉယဝ်ႉ ဝႃႈၼႆ။

ဝဵင်းလွႆၸေႊၼႆႉ ယူႇဝႆႉၼႂ်းၸႄႈဝဵင်းမိူင်းမွၵ်ႇ ၸႄႈတွၼ်ႈမၢၼ်ႈမေႃႇ ၸႄႈမိူင်းၶၢင် ယဝ်ႉၵေႃႈ ပဵၼ်ဝဵင်းတိတ်းၸပ်းလႅၼ်လိၼ်ၶၢင် – ၶႄႇ ၼႆယဝ်ႉ။