ဝၼ်းတီႈ 25/04/2026 ၾူၼ်လူင်လႄႈလူမ်းလႅင်ႉၽတ်ႉတီႈမိူင်းၶၢင်လႄႈ တိူင်းတႃႈလိူဝ်ႇ ႁဵတ်းႁႂ်ႈႁိူၼ်းယေးၵူၼ်းမိူင်းလူမ်ႉၵွႆတင်းၼမ်။
ဝၼ်းတီႈ 25 ယၢမ်းၵၢင်ၶိုၼ်း 10 မူင်းလူမ်းလႅင်ႉလႄႈၾူၼ်လူင်မၢၵ်ႇႁဵပ်းတူၵ်းတီႈဝဵင်းၼမ်ႉတီး၊ မိူင်းၵွင် လႄႈ ဝဵင်းၸႄႈၼႃး ၼႂ်းမိူင်းၶၢင်။ ႁိူၼ်းယေးၵူၼ်းမိူင်း ပႃးၸဵမ်သုမ်ႉသွင်းၵူၼ်းပၢႆႈၽေးသိုၵ်း၊ လုမ်းပလိၵ်ႈၸိူဝ်းၼႆႉ လူမ်ႉၵွႆ။ တူၼ်ႈမႆႉယႂ်ႇလူင်ၵူၼ်ႇလူမ်ႉတဵင်သုမ်ႉသွင်းၵူၼ်းပၢႆႈၽေးသိုၵ်းၸိူဝ်းလုၵ်ႉတၢင်းၽႃၵၢၼ်ႉမႃးတင်ႈသေယူႇသဝ်းဝႆႉ ။ လူမ်းႁႅင်းထိုင်တီႈ လင်ၶႃးႁိူၼ်း ပႃးၸဵမ်ၽိူၼ်/တင်ႇၵေႃႇၸိူဝ်းၼႆႉပိဝ်မူတ်း- ၵူၼ်းမိူင်းဝဵင်းၸႄႈၼႃးလၢတ်ႈၼင်ႇၼႆ။
ဝၼ်းတီႈ 25 ယၢမ်းၵၢင်ဝၼ်းၼၼ်ႉသမ်ႉ လူမ်းလႅင်ႉငူင်းၸၢင်ႉ(လူမ်းပၼ်ႇၽၼ်လူင် )ၵေႃႈၶဝ်ႈတီႈဝဵင်းပၢင်ႇဢူႈလူင်၊ လူမ်းၽီႁုင်ဢၼ်ပဵၼ်ၵႂႃႇၼႂ်းပွၵ်ႈၵမ်းၼႆႉ ယႂ်ႇလႄႈႁႅင်းလိူဝ်လူမ်းဢၼ်ယၢမ်ႈပဵၼ်မႃးၸိူဝ်းၼၼ်ႉ။ ၶၢဝ်းႁိုင်ယူႇမွၵ်ႈ 1 ၸူဝ်ႈမူင်း ၸင်ႇၸၢင်ႁၢႆ။ ၵူၺ်းၵႃႈ ၽတ်ႉပဝ်ႇတီႈပၢင်ႇပဵင်း ႁိမ်းဝၢၼ်ႈၼမ်ႉလိၼ်းၶမ်း – ပဵၼ်တီႈဢမ်ႇမီးႁိူၼ်းၵူၼ်းလႄႈ ဢမ်ႇမီးလွင်ႈလူႉသုမ်း- ၵူၼ်းမိူင်းဝဵင်းပၢင်ႇဢူႈလူင်ၵေႃႈလၢတ်ႈၼင်ႇၼႆ။
ၾၢႆႇပႂ်ႉတူၺ်းၾိင်ႈၾႃႉပိုၼ်ၽၢဝ်ႇဝႃႈ ယွၼ်ႉပိူဝ်ႈၽႃႈၾူၼ်ဢၼ်လုၵ်ႉတင်းမိူင်းၶႄႇလူင်းမႃးလႄႈဝူင်ႈဝၢင်ႈၼႆႉ မိူင်းတႆး ၊ မိူင်းၶၢင်၊ မိူင်းၶျၢင်း၊ တိူင်းၸႄႈၵႅင်းတွၼ်ႈၼိူဝ်၊ တိူင်းတႃႈလိူဝ်ႇ၊ တိူင်းပႃႇၵိူဝ်၊ မိူင်းမွၼ်း ၸိူဝ်းၼႆႉတေမီး ၾူၼ်လူင်လူမ်းလႅင်ႉမၢၵ်ႇႁဵပ်းတူၵ်း၊ ၾႃႉၽႅတ်ႇၾႃႉလင် ၾႃႉၸၢင်ႈၽႃႇပႃးလူးၵွၼ်ႇ ၊ ၵွပ်ႈၼႆႁႂ်ႈၵူၼ်းယူႇၸွမ်းတူၼ်းႁၢဝ်းသၼ်လွႆ၊ ယူႇတႂ်ႈပၢႆႉယႂ်ႇ၊ ယူႇႁိမ်းတူၼ်ႈမႆႉယႂ်ႇၸိူဝ်းၼႆႉ ႁႂ်ႈဢွၼ်ၵၼ်ၾၢင်ႉထွမ်ႇၶၢဝ်ႇထွမ်ႇငၢဝ်းသေ ႁၢင်ႈႁႅၼ်းတူဝ် တႃႇႁႂ်ႈလွတ်ႈၽေး ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ