ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၼႆႉ တီႈဝဵင်းယွင်ႁူၺ်ႈ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ထၢင်ႇႁၢင်ႈပိုတ်ႇပၢင်တေႃႇလွင်းမႃး ႁဵတ်းႁႂ်ႈတုမ်ႉတိူဝ်ႉ ၵူၼ်းပိုၼ်ႉတီႈ ထူပ်းတၢင်းယၢပ်ႇၽိုတ်ႇႁႅင်း။

ယၢမ်းလဵဝ် ပၢင်တေႃႇလွင်း ဢၼ်ပိုတ်ႇတီႈ ဝဵင်းယွင်ႁူၺ်ႈၼႆႉ မိူၼ်ၼင်ႇ – လေးၵွင်ႇၵျိၼ်ႇလႄႈ ပၢင်ၽၢႆႉ ၸိူဝ်းၼႆႉ ဢိင်ၼိူဝ်လွင်ႈၼႆႉ ယူႇတီႈ ပလိၵ်ႈမၢၼ်ႈၶဝ် ဢမ်ႇၵူတ်ႇထတ်းတီႉၺွပ်း ဢဝ်လိူင်ႈသင် ၼႆယဝ်ႉ။

ၵူၼ်းပိုၼ်ႉတီႈ ဝဵင်းယွင်ႁူၺ်ႈ လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်းလဵဝ် တီႈဝဵင်းယွင်ႁူၺ်ႈၼႆႉ ယိင်ႈၶႅၼ်း ႁၢင်ႈႁၢႆႉယဝ်ႉ ။ ပၢင်တေႃႇလွင်းၼႆႉ ထၢင်ႇႁၢင်ႈပိုတ်ႇလွတ်ႈလွတ်ႈလႅဝ်းလႅဝ်း မိူၼ်ၼင်ႇ လေးၵွင်ႇၵျိၼ်ႇ ၸိူဝ်းၼႆႉ ၵူၼ်းမႃးလဵၼ်ႈ ၼမ်ဝႃႈၼမ်ယဝ်ႉ။ မၢင်ၸိူဝ်း ၵၢၼ်ငၢၼ်းဢမ်ႇႁဵတ်း ဢွၼ်ၵၼ်ၵႂႃႇတေႃႇလွင်း ဢဝ်ၼၼ်ႉႁဵတ်းၵၢၼ်ၶဝ်ဢေႃႈ။ ပလိၵ်ႈမၢၼ်ႈတႄႉ လႆႈငိၼ်းဝႃႈ ၶဝ်ႈတီႉၺွပ်း တီႈပၢင်ၽၢႆႉၼႆသေ ၵူၺ်း ၵႃႈ လေးၵွင်ႇၵျိၼ်ႇၼႆႉသမ်ႉ ပိုတ်ႇဝႆႉၸိူင်ႉ ဢမ်ႇႁၼ်ၶဝ် ၶဝ်ႈမႃးတီႉၺွပ်းသင်ၶႃႈ”- ဝႃႈၼႆ။

ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ႁဵတ်းႁႂ်ႈပၵ်းပိူင်မၢႆမီႈ ဝၢၼ်ႈမိူင်း ႁႅင်းဢေႇလူင်း ဢမ်ႇ ၵုမ်းၵမ်လႆႈ ယိင်ႈၶႅၼ်း ႁဵတ်းႁႂ်ႈပၢင်တေႃႇလွင်း ထၢင်ႇႁၢင်ႈပိုတ်ႇမႃးၼမ်။ ၵွပ်ႈၼႆလႄႈ ႁဵတ်းႁႂ်ႈပိုၼ်ႉတီႈ ဢွၼ်ၵၼ်ထူပ်းတၢင်းယၢပ်ႇၽိုတ်ႇႁႅင်း။ လိူဝ်သေ ၵူၼ်းပိုၼ်ႉတီႈယဝ်ႉ မိူၼ်ၼင်ႇ ၵူၼ်းတၢင်းဝဵင်းၵၢတ်ႇလေႃႉ ၸိူဝ်းၼၼ်ႉၵေႃႈ မႃးလွင်းၼမ် ဝႃႈၼႆ။

ၼွၵ်ႈလိူဝ်သေ ပၢင်တေႃႇလွင်းၼႆႉယဝ်ႉ မိူၼ်ၼင်ႇ ပၢင်တေႃႇလွင်း တၢင်းဢွၼ်ႊလၢႆႊၵေႃႈ ဢမ်ႇဝႃႈ လဵၵ်ႉယႂ်ႇၼုမ်ႇထဝ်ႈ ဢွၼ်ၵၼ်တေႃႇလွင်း လဵၼ်ႈၵၼ်ၼမ် ဝႃႈၼႆ။

“ပၢၼ်တေႃႈလဵဝ်ၼႆႉ ဢမ်ႇလီၶႃႈ ယိင်ႈၶႅၼ်းႁၢႆႉလိူဝ်ၵဝ်ႇ။ ယၢမ်းလဵဝ် ၵၢၼ်ငၢၼ်းႁႃယၢပ်ႇလႄႈ ၵူၼ်းမိူင်းၼႆႉ ႁႃႁဵတ်း ၵၢၼ်လၢႆးငၢႆႈ တေႃႇလွင်းႁႃၵိၼ် ၸိူင်ႉၼႆၵူၺ်း။ ပၢင်တေႃႇလွင်း ဢၼ်ပိုတ်ႇတၢင်းဢွၼ်ႊလၢႆႊ ၵေႃႈၼမ် သႂ်ႇငိုၼ်း ၾူၼ်းသေလဵၼ်ႈ ဢၼ်လဵၼ်ႈလႆႈငိုၼ်းတႄႉ မီးၵမ်ႉဢေႇၵူၺ်း။ ဢၼ်လွင်းသုမ်းတႄႉ မီးၼမ်ဢေႃႈ။ ပၢင်တေႃႇလွင်း ဢွၼ်ႊလၢႆႊၼႆႉသမ်ႉ ဢမ်ႇလိူၵ်ႈလဵၵ်ႇယႂ်ႇၼုမ်ႇထဝ်ႈ လဵၼ်ႈလႆႈၵူႈၵေႃႉၼၼ်ႉယဝ်ႉ”- ၵူၼ်းပိုၼ်ႉတီႈ ဝဵင်းယွင် ႁူၺ်ႈ သိုပ်ႇလၢတ်ႈၼႄၼင်ႇၼႆ။

ၵူၼ်းဝဵင်းယွင်ႁူၺ်ႈၼႆႉ ပိူင်လူင်မၼ်း ႁဵတ်းၵၢၼ်ႁႃၵိၼ်လဵင်ႉတွင်ႉ တေပဵၼ်ၵၢၼ်တေႃႉသူင်ႇႁပ်ႉၶႅၵ်ႇ ဢႅဝ်ႇယဵမ်ႈတွင်ႈတဵဝ်း ၼႂ်းၼွင်ႁၢႆးယႃႈ။ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၵေႃႈပိူင်ၼိုင်ႈ၊ ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်း ၵေႃႈပိူင်ၼိုင်ႈသေ ႁဵတ်းႁႂ်ႈတုမ်ႉတိူဝ်ႉၵူၼ်းမိူင်းထူပ်းတၢင်းယၢပ်ႇၽိုတ်ႇ ယွၼ်ႉဢမ်ႇမီးၵူၼ်းၼွၵ်ႈမိူင်း မႃးဢႅဝ်ႇယဵမ်ႈတွင်ႈတဵဝ်း ဢမ်ႇမီးငိုၼ်းၶဝ်ႈ မၢင်ၸိူဝ်း ဢမ်ႇမီးၵၢၼ်ႁဵတ်း ဝႃႈၼႆ။