မိူဝ်ႈၼႆႉ ဝၼ်းတီႈ 17/05/2024 ယၢမ်းၵၢင်ၼႂ်ၸဝ်ႉ 4 မူင်း လုင်းၸၢႆးတိၼ်ႇလႅင်ႇ ဢႃယု 84 ပီ ၽူႈၼမ်းၼႂ်း ပႃႇတီႇႁူဝ်သိူဝ် SNLD ၵေႃႉၵဝ်ႇ လူႉသဵင်ႈသုတ်းမုၼ် လူၺ်ႈတၢင်းပဵၼ်ၵူၼ်းထဝ်ႈ တီႈႁိူၼ်းမၼ်းၸဝ်ႈ ဢၼ်မီးၼႂ်းဝၢင်းမွၵ်ႇၵူႇသွႆႈလႅင် 9 လၵ်း ဝဵင်းတႃႈၵုင်ႈ ၼႆယဝ်ႉ။

လုင်းၸၢႆးသူၺ်ႇၵိဝ်း  ၸုမ်းပွင်ၵၢၼ်လုမ်း လၢတ်ႈတီႈၽူႈတွႆႇႁွၵ်ႈဝႃႈ -“လုင်းတိၼ်ႇလႅင်ႇၼႆႉ ဢႃယုၵေႃႈ ယႂ်ႇယဝ်ႉ တၢင်းပဵၼ်ၵူၼ်းထဝ်ႈၵေႃႈသမ်ႉမီးလႄႈ သဵင်ႈၵႂႃႇၵတ်းၵတ်းယဵၼ်ယဵၼ်တီႈႁိူၼ်း မွၵ်ႇၵူႇသွႆႈလႅင် ၵဝ်ႈလၵ်းၼၼ်ႉၶႃႈ ဢေႃႈ။ မၼ်းၸၢႆးၼႆႉ ႁပ်ႉပဵၼ်ၽူႈၼမ်းၼႂ်း ပႃႇတီႇႁူဝ်သိူဝ် ၽွင်းပီ 2005 ထိုင်မွၵ်ႈ 2012 ၽွင်းငဝ်းလၢႆးၵပ်ႉၵိၼ်း – ၽွင်းၽူႈၼမ်းပႃႇတီႇ ၺႃးတီႉၺွပ်းၶင်ၶွၵ်ႈဝႆႉၼၼ်ႉ။ လႆႈဝႃႈမၼ်းၸဝ်ႈၵေႃႈ လႆႈႁပ်ႉပုၼ်ႈၽွၼ်းယႂ်ႇမႃးဢၼ်ၼိုင်ႈ၊ မၼ်းၸဝ်ႈလူႉသဵင်ႈၵႂႃႇၼႆႉ ပဵၼ်ဢၼ်သေလၢႆမွင်ၸႂ်ၸွမ်းတႄႉ”- ဝႃႈၼႆ။

လုင်းၸၢႆးတိၼ်ႇလႅင်ႇၼႆႉ ပဵၼ်ပီႈဢၢႆႈ လုင်းၸၢႆးၼုတ်း (ႁူဝ်ပဝ်ႈ ပႃႇတီႇႁူဝ်သိူဝ် ယၢမ်းလဵဝ်) ဝႃႈၼႆ။

ၵူၼ်းႁိူၼ်းလုင်းၸၢႆးတိၼ်ႇလႅင်ႇ ယၢမ်းလဵဝ်ၼႆႉ ၵိုတ်းဝႆႉမေးၼၢင်း ပႃႈၸၢၼ်းသူၺ်ႇလႄႈ လုၵ်ႈယိင်း လုၵ်ႈၶူၺ်။ ပေႃးထိုင်မႃး ဝၼ်းတီႈ 19 ၼႆႉ တေယူႇတီႈလုၵ်ႈလၢင်းၼၢင်းမေးလႄႈ ပီႈၼွင်ႉပွင်ႈပၢႆ တေႁွပ်ႇႁူဝ်ၶဝ်ႈႁဵဝ်ႈ တီႈပႃႇႁဵဝ်ႈယေႇဝေး ဝဵင်းတႃႈၵုင်ႈ ၼႆယဝ်ႉ။