မိူဝ်ႈၼႆႉ ဝၼ်းတီႈ 28/3/2024 ယၢမ်းၵၢင်ၼႂ် ယူႇတီႈ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် ၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA လူင်းႁူပ်ႉထူပ်းပၼ်ႁႅင်းၸႂ် ၵေႃႉသိုၵ်းမႂ်ႇ တီႈၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။
ဢိင်ၼိူဝ် လွင်ႈၼႆႉ ယူႇတီႈ ႁွင်ႈၵၢၼ်လူင် ပိုၼ်ၽၢဝ်ႇၶွင် RCSS ၵေႃႈ တႅမ်ႈတၢင်ႇဝႆႉ တီႈ Page – Tai Freedom ၼၼ်ႉဝႃႈ – ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် RCSS လူင်းႁူပ်ႉထူပ်းပၼ်ပိုၼ်ႉႁူႉ၊ ပၼ် ႁႅင်းၸႂ် ၵေႃႉသိုၵ်း ၵေႃႉႁၢၼ် ၽွင်းၾိုၵ်းသွၼ်ၵၢၼ်ငဝ်ႈၶၢမ်ႇပိုၼ်ႉၵၢၼ်သိုၵ်း ၼႂ်းၼႃႈတီႈဢုပ်ႉပိူင်ႇ RCSS/ SSA ၸႄႈဝဵင်းမိူင်းပၼ်ႇ – ဝႃႈၼႆ။
ၵူၼ်းပိုၼ်ႉတီႈ ပွတ်းထုင်ႉလၢင်းၶိူဝ်း လၢတ်ႈတီႈၽူႈတွႆႇႁွၵ်ႈ -“ၸႂ်ႈယဝ်ႉၶႃႈ မၼ်းၸဝ်ႈမႃးပၼ် ႁႅင်းၸႂ် ၵူၼ်းသိုၵ်းမႂ်ႇ တီႈဝဵင်းမိူင်းပၼ်ႇ ၼႆၶႃႈဝႃႇ။ ၸူဝ်ႈသိုၵ်းမၢၼ်ႈ ပိုၼ်ၽၢဝ်ႇ ၵဵပ်းသဵၼ်ႈၸိုဝ်ႈၵူၼ်းၼုမ်ႇမႃး တႃႇႁဵတ်းသိုၵ်းၶဝ်ၼၼ်ႉႁဵတ်းႁႂ်ႈၵူၼ်းၼုမ်ႇ တၢင်းပွတ်းလၢင်းၶိူဝ်း၊ မိူင်းၼၢႆး၊ မိူင်းပၼ်ႇ၊ ၵဵင်းတွင်း ၸိူဝ်းၼႆႉ ဢွၼ်ၵၼ် ၵႂႃႇႁဵတ်းသိုၵ်းတႆး ၼမ်တႄႉၼမ်ဝႃႈ မိူင်းပေႃးယဵၼ်ဢေႃႈ။ ယၢမ်းလဵဝ် ၸွမ်းၼႂ်းထိူၼ်ႇတႄႉ ၵိုၼ်းမိူၼ်ပွႆးယဝ်ႉ ယွၼ်ႉၵူၼ်းၼုမ်ႇၵႂႃႇၶွၼ်ႈ ၵၼ်ၼမ်”- ဝႃႈၼႆ။
တႄႇဢဝ် လိူၼ်မၢတ်ႊၶျ်ၼႆႉမႃး ၵူၼ်းၼုမ်ႇ ၸိူဝ်းဢႃယု 18 ပီ ၶိုၼ်ႈၼိူဝ် တၢင်းဝဵင်လၢင်းၶိူဝ်း၊ မိူင်းၼၢႆး၊ မိူင်းပၼ်ႇ၊ ၵဵင်းတွင်းလႄႈ မွၵ်ႇမႆႇ ၸိူဝ်းၼႆႉ ဢွၼ်ၵၼ်ပၢႆႈ ၵူဝ်လႆႈၶဝ်ႈႁၢပ်ႇထၢမ်းၵၢၼ်သိုၵ်းမၢၼ်ႈ ၵမ်ႈၼမ် ပၢႆႈၸူးသိုၵ်းတႆး RCSS မၢင်ၸိူဝ်း ပၢႆႈၶဝ်ႈမိူင်းထႆး ဝႃႈၼႆ။
“ၸူဝ်ႈသိုၵ်းမၢၼ်ႈ ပိုၼ်ၽၢဝ်ႇ တေၵဵပ်းသိုၵ်းၼႆၼၼ်ႉသေ ၵူၼ်းၼုမ်ႇ တီႈလၢင်းၶိူဝ်းၼႆႉ ဢွၼ်ၵၼ်ပၢႆႈၸူး RCSS မိူင်းပေႃးယဵၼ်ဢေႃႈ။ ဢွင်ႈတီႈၾိုၵ်းသိုၵ်းၶဝ် တီႈလၢင်းၶိူဝ်းၼႆႉ တဵမ်မူတ်းယဝ်ႉသေ ပေႃးလႆႈၽႄၵႂႃႇတီႈဝဵင်းမိူင်းပၼ်ႇ ၽွင်ႈၶႃႈဢေႃႈ”- ၵူၼ်းပိုၼ်ႉတီႈ ဝဵင်းလၢင်းၶိူဝ်း လၢတ်ႈၼႄၼင်ႇၼႆ။
တႄႇဢဝ် ၵၢင်လိူၼ်ၾႅပ်ႊပိဝ်ႊရီႊ 2024 ၼႆႉမႃး ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈလူင် RCSS လူင်း ပိုၼ်ႉတီႈ ႁူပ်ႉထူပ်းၵူၼ်းမိူင်း တၢင်းထုင်ႉလၢင်းၶိူဝ်း ၸိူဝ်းၼႆႉမႃးယဝ်ႉ ၵမ်းၼိုင်ႈ။
ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA ၼႆႉ ပဵၼ်ၸုမ်းလူင်းလၢႆးမိုဝ်း ၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA ဝႆႉ ၸုမ်းၼိုင်ႈ မိူဝ်ႈဝၼ်းတီႈ 15/10/2015 မိူဝ်ႈပၢၼ် ဢူးတဵင်းၸဵင်ႇ ပဵၼ်ၸွမ် ၸိုင်ႈမိူင်းႁူမ်ႈတုမ်ၼၼ်ႉ ဝႃႈၼႆ။
