လူင်ပွင်ၸိုင်ႈၶႄႇ ၸႄႈမိူင်းယုၼ်ႊၼၢၼ်ႊ တူၵ်းလူင်းလႆႈၸႂ် တႃႇႁွင်ႉႁႅင်းၵၢၼ် ၵူၼ်းမိူင်း မၢၼ်ႈ ပဵၼ်တၢင်းၵၢၼ်၊ သွင်ၸိုင်ႈမိူင်း တူၵ်းလူင်းၵၼ်ယဝ်ႉတူဝ်ႈလီငၢမ်းသေ တေႁွင်ႉႁႅင်း ၵၢၼ်လူၺ်ႈ လိၵ်ႈႁူမ်ႈမၢႆ MOU ဝႃႈၼႆ။
ၽူႈမီးပုၼ်ႈၽွၼ်းႁွင်ႈ ၵၢၼ်ၾၢႆႇႁႅင်းၵၢၼ်မိူင်းမၢၼ်ႈ ၵေႃႉၼိုင်ႈ လၢတ်ႈတီႈၶၢဝ်ႇ VOA ဝႃႈ – ႁူင်းၸၢၵ်ႈ ဢၼ်မီးတီႈၵိင်ႇၸႄႈမိူင်း တိူဝ်ႇႁူင် (Dehong) လူဝ်ႇၵူၼ်းႁဵတ်းၵၢၼ်ၼႆလႄႈ လူင် ပွင်ၸိုင်ႈမိူင်းၶႄႇ ၸင်ႇလႆႈဢုပ်ႇၵၼ်တင်း လူင်ပွင်ၸိုင်ႈမိူင်းတႆးယဝ်ႉၶၵ်ႉတွၼ်ႈၼိုင်ႈ။ လူဝ်ႇ ဢုပ်ႇတင်း လူင်ပွင်ၸိုင်ႈသုၼ်ၵၢင်မိူင်းၶႄႇသေ ၶိုင်တႃႇႁဵတ်းပၢတ်ႉသပွတ်ႇ ၊ ဝီႊသႃႊ ၵူၺ်းယဝ်ႉ -ဝႃႈၼႆ၊
ၼႂ်းႁူဝ်လိူၼ်မေႊ တေမႃးၼႆႉ သိုၵ်းမၢၼ်ႈတေသူင်ႇတူဝ်တႅၼ်း ၵႂႃႇဢုပ်ႇၵုမ်တင်းလူင်ပွင်ၸိုင်ႈ မိူင်းတိူဝ်ႇႁူင်ထႅင်ႈ ၵမ်းၼိုင်ႈ။ ဝၢႆးၼၼ်ႉ တေလႆႈႁူႉဝႃႈ တေၸၢင်ႈသူင်ႇႁႅင်းၵၢၼ် ၵူၼ်းမိူင်းမၢၼ်ႈ ၵႂႃႇမိူင်းၶႄႇဝႆးဝႆးယူႇ ဝႃႈၼႆ။
ဢိင်ၼိူဝ်ၵၢၼ်မိူင်း ၵၢၼ်သိုၵ်းဢမ်ႇၼိမ်သဝ်းသေ ၵူၼ်းမိူင်းမၢၼ်ႈပၢႆႈဢွၵ်ႇမိူင်းၵႂႃႇ ႁႃႁဵတ်းၵၢၼ် မိူင်းၶႄႇ – မိူင်းထႆး – မိူင်းလၢဝ်းလႄႈ မိူင်းၵြႃးၼမ်။ ဢိင်ၼိူဝ်လွင်ႈၼႆႉ ၸဝ်ႈပၢႆးမၢၵ်ႈမီး ၸဝ်ႈၵၢၼ် သမ်ႉ တဵၵ်းတဵင်သုၼ်ႇလႆႈႁႅင်းၵၢၼ် ၊ တုမ်ႉတိူဝ်းႁႅင်းၵၢၼ်မႂ်ႇ ၵူၺ်းဢမ်ႇၵႃး တိူဝ်ႉပႃးၸိူဝ်းႁဵတ်း ၵၢၼ်မီးယူႇဝႆႉၸဵမ်ၵဝ်ႇ ၸိူဝ်းၼၼ်ႉ။
ႁႅင်းၵၢၼ် ဢမ်ႇမီးဝတ်းဝႂ်ၼႆသေ ထုၵ်ႇၸဝ်ႈၼႃႈတီႈ တီႉၺွပ်းၵုမ်းၶင်ဝႆႉၵေႃႈ မီးၼမ်။ ၼႂ်းဢမ်ႇ ႁိုင်ပူၼ်ႉမႃးၼႆႉ ႁႅင်းၵၢၼ်ၵူၼ်းမိူင်းမၢၼ်ႈ 1,000 ပၢႆ ဢၼ်ႁဵတ်းၵၢၼ်တီႈႁူင်းၸၢၵ်ႈ တီႈဝဵင်းယိၼ် ၵျၢင်းၼၼ်ႉ ၼႄၵၢင်ၸႂ်တုၵ်းယွၼ်း ၶိုၼ်းသုၼ်ႇလႆႈ။
ၽွင်းၼၼ်ႉ ၸဝ်ႈႁူင်းၸၢၵ်ႈ ဢမ်ႇၵႄႈလိတ်ႈပၼ်ႁႅင်းၵၢၼ်လီလီ ၵူၺ်းဢမ်ႇၵႃး ယင်းလိုပ်ႈႁႅင်းၵၢၼ် ဢွၵ်ႇၵၢၼ် တဵၵ်းၸႂ်ႉပွၵ်ႈၶိုၼ်းမိူင်း ဢမ်ႇယွမ်း 200 ၵေႃႉ – ၶၢဝ်ႇ VOA ပိုၼ်ၽၢဝ်ႇဝႆႉၼင်ႇၼႆ။
ၵမ်းၼႆႉတႄႉ သွင်ၸိုင်ႈမိူင်း တူၵ်းလူင်းလႆႈၸႂ်ၵၼ်ယဝ်ႉလႄႈ မုင်ႈမွင်း တေလႆႈ သုၼ်ႇလႆႈႁႅင်း ၵၢၼ်သေ တေလွတ်ႈတၢင်းလွင်ႈတဵၵ်းတဵင်ၼိူဝ်ႁႅင်းၵၢၼ်ယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ