PDF-Zoland သိုၵ်းၶျၢင်း ဢၼ်တူင်ႉၼိုင် ၼႂ်းဝဵင်းတုၼ်ႊၸၢၼ်ႊလႄႈ ဝဵင်းတီႊတိမ်ႊ ပိုၼ်ၽၢဝ်ႇဝႃႈ တီႉၺွပ်းလႆႈ ၵူၼ်းၶွင်ၸုမ်းသိုၵ်းမၢၼ်ႈ 5 ၵေႃႉ ဢၼ်လူင်းႁူၺ်းသူၼ်းၵူၼ်းဝၢၼ်ႈသေ ၵဵပ်းႁွမ်သိုၵ်းမႂ်ႇပၼ် သိုၵ်းမၢၼ်ႈဝႆႉၼၼ်ႉ ဝႃႈၼႆ။

ၵူၼ်း 5 ၵေႃႉၼႆႉ ၺႃးတီႉ မိူဝ်ႈဝၼ်းတီႈ 25 မၢတ်ႊၶျ် တီႈႁိူၼ်းယေးၸိူဝ်းၶဝ် ၊ ၸိူဝ်းၶဝ်ပဵၼ်ၸၢဝ်းၶျၢင်း ဢၼ်ပဵၼ် ၽူႈႁၢပ်ႇၵၢၼ်ၾၢႆႇဢိၼ်ႊၵျိၼ်ႊၼီႊယိူဝ်ႊ ၾၢႆႇလိူမ်ႈလႆႇ ၊ ၾၢႆႇယူတ်းယႃတူဝ်သတ်း ၊ ၾၢႆႇၽွင်းငမ်း ၊ ၾၢႆႇလဵၼ်ႈႁႅင်းလႄႈ ၾၢႆႇၵဵပ်းသဵၼ်ႈမၢႆႁူဝ်ၵူၼ်း တႂ်ႈသိုၵ်းမၢၼ်ႈ ၸိူဝ်းၼႆႉ။

ၸုမ်းသိုၵ်း  PDF Zoland  လၢတ်ႈဝႃႈ – လႆႈပၼ်ၾၢင်ႉၶဝ်လၢႆၵမ်းယဝ်ႉ ၵွၼ်ႇတေတီႉၺွပ်းၶဝ်ၼၼ်ႉ။ ၵူၺ်းၵႃႈ ၶဝ်ဢမ်ႇထွမ်ႇ။ ၶဝ်သႂ်ႇႁႅင်းၸွႆႈၵၢၼ်သိုၵ်းမၢၼ်ႈ၊ ႁူၺ်းသူၼ်းၵူၼ်းၼုမ်ႇၵူၼ်းမိူင်း ႁၢဝ်ႈႁႅင်းလႄႈ ၸင်ႇလႆႈ တီႉၺွပ်းၶဝ် – ဝႃႈၼႆ။

သိုၵ်းၶျၢင်း PDF Zoland ၼႆႉ ပိုၼ်ၽၢဝ်ႇဝႆႉၸဵမ်လႂ်ဝႃႈ – ၽႂ်ၶဝ်ႈႁူမ်ႈႁဵတ်းသိုၵ်းမၢၼ်ႈ၊ ၽႂ်ၸွႆႈထႅမ် ႁႃၵူၼ်းသိုၵ်းပၼ်သိုၵ်းမၢၼ်ႈၸိုင် တေဢဝ်လိူင်ႈပၼ်တူတ်ႈတၢမ်ႇ တီႉၺွပ်း- ဝႃႈၼႆဝႆႉ။ 

ဢၢင်ႈဢိင် – DVB