ၵူၼ်းသႅၼ်ဝီတင်း ၵူၼ်းထုင်ႉပဵင်း ဢၼ်ၵႂႃႇႁဵတ်းၵၢၼ် တၢင်းဝဵင်းလၢဝ်ႇၵၢႆးၼၼ်ႉသေ ပၢႆႈမႃးသွၼ်ႈဝႆႉ တီႈဝဵင်းလႃႈသဵဝ်ႈ ႁူဝ်ၵူၼ်း 700 ပၢႆ ပႆႇၸၢင်ႈပွၵ်ႈႁိူၼ်းယေး ယွၼ်ႉဢမ်ႇငိုၼ်းၵႃႈၸရိတ်ႈတၢင်းပွၵ်ႈလႄႈ ဢမ်ႇမီးႁိူၼ်းယေး တီႈယူႇယဝ်ႉ ဝႃႈၼႆ။

တႄႇဢဝ် ၽႅၼ်ၵၢၼ်ယၼ်ႇသိုၵ်း 1027 ၼၼ်ႉမႃး ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်း 4 လိူၼ်ပၢႆ ယဝ်ႉ ၵူၼ်းပၢႆႈၽေးသိုၵ်း တီႈဝဵင်းသႅၼ်ဝီလႄႈ တင်းၵူၼ်းထုင်ႉပဵင်း တိုၵ်ႉၵိုတ်းဝႆႉ တီႈဝတ်ႉဝၢၼ်ႈသူႈ ႁူဝ်ၵူၼ်း 500 ပၢႆလႄႈ ဝတ်ႉၵၢင်မိူင်း 200 ပၢႆ ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ၼႆယဝ်ႉ။

ၸဝ်ႈၶူး သုၶမ်း (မွၵ်ႇသဵဝ်ႈ) ဝတ်ႉဝၢၼ်ႈသူႈတႆး လၢတ်ႈတီႈၽူႈတွႆႇႁွၵ်ႈဝႃႈ – “တိုၵ်ႉၵိုတ်းဝႆႉၼႆႉ ၵမ်ႈၼမ် ပဵၼ်ၵူၼ်းသႅၼ်ဝီ ယွၼ်ႉသိုၵ်းမၢၼ်ႈ ဢဝ်မၢၵ်ႇလူင် ပွႆႇသႂ်ႇႁိူၼ်းယေးလူႉၵွႆ ၾႆးမႆႈလႄႈ ဢမ်ႇမီးတီႈယူႇ တၼ်းသဝ်း မၢင်ဝၢၼ်ႈသမ်ႉ ယူႇၼႃႈတပ်ႉသေ ဢမ်ႇႁတ်းမိူဝ်း ၸိူဝ်းၼႆႉ။ ယဝ်ႉၵေႃႈ ၵူၼ်းမိူင်းမၢၼ်ႈ ဢၼ်ၵႂႃႇႁဵတ်းၵၢၼ် တၢင်းလၢဝ်ႇၵၢႆး ၼၼ်ႉသေ ပၢႆႈမႃးသွၼ်ႈဝႆႉ ၼႆႉသမ်ႉ ဢမ်ႇမီးငိုၼ်းၵႃႈၸရိတ်ႈတၢင်းပွၵ်ႈ။ မၢင်ၸိူဝ်း သဵၼ်ႈတၢင်းတေပွၵ်ႈႁိူၼ်း ၼၼ်ႉ ငဝ်းလၢႆးပႆႇလီလႄႈ ပႆႇၸၢင်ႈပွၵ်ႈ ၸိူဝ်းၼႆႉ”- ဝႃႈၼႆ။

ၵူၼ်းဝဵင်းသႅၼ်ဝီ ဢၼ်ပႆႇၸၢင်ႈပွၵ်းႁိူၼ်းယေး ၼႆႉသမ်ႉ ၵမ်ႈၼမ် ပဵၼ်ၵူၼ်းၼႂ်းဝဵင်းလႄႈ ၵူၼ်းဝၢၼ်ႈႁူဝ်တႃႈ ၸိူဝ်းၼႆႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵမ်ႈၼမ် ပဵၼ်ၵူၼ်းၼႂ်းဝဵင်း လႄႈ ၸွမ်းသၢပ်ႇဝဵင်း ယဝ်ႉၵေႃႈ ၵူၼ်းဝၢၼ်ႈႁူဝ်တႃႈ ၸိူဝ်ႈၼႆႉ ႁဵတ်းသင်လႄႈပႆႇပွၵ်ႈၼႆ ယွၼ်ႉႁိူၼ်းယေး လူႉၵွႆၼမ်လႄႈ ပႆႇၸၢင်ႈမိူဝ်းၼၼ်ႉၶႃႈယဝ်ႉ။ မၢင်ၸိူဝ်း တေဝူၼ်ႉလႆႈဝႃႈ ပၢင်တိုၵ်းၼႆႉ တေပႆႇယဝ်ႉၼႆသေ ပႆႇႁတ်းမိူဝ်းၸိူင်ႉၼၼ်ၵေႃႈ ပႃးဢေႃႈ”-  ဝႃႈၼႆ။

ၵူၼ်းဝဵင်းသႅၼ်ဝီ ဢၼ်ပၢႆႈမႃးသွၼ်ႈဝႆႉ တီႈဝဵင်းလႃႈသဵဝ်ႈၼႆႉ ယွၼ်ႉမီးၶၢဝ်းတၢင်းႁိုင်ယဝ်ႉလႄႈ မၢင်ၸိူဝ်း ၶႂ်ႈပွၵ်ႈမိူဝ်းၶိုၼ်း မႄးၵုမ်းလုမ်းလႃးႁိူၼ်းယေးယူႇသေတႃႉ တႃႇတေပွၵ်ႈမိူဝ်းၼၼ်ႉ လိူဝ်သေမႆႈၸႂ် လွင်ႈပၢင်တိုၵ်းယဝ်ႉ ယင်းလႆႈမႆႈၸႂ်ပႃး ငိုၼ်းတွင်း တႃႇတေၵေႃႇသၢင်ႈႁိူၼ်းယေးၶိုၼ်း ၼႆယဝ်ႉ။