ပၢင်တိုၵ်း ယဵၼ်လူင်းယဝ်ႉသတေႃႉ ၵူၼ်းပၢႆႈၽေးသိုၵ်း တီႈဝဵင်းမိူင်းမိတ်ႈ ၼပ်ႉႁူဝ်ႁဵင် ပႆႇၸၢင်ႈပွၵ်ႈႁိူၼ်းယေး ၽႂ်မၼ်း ယွၼ်ႉၼႂ်းပိုၼ်ႉတီႈ ပႆႇမီးလွင်ႈၼိမ်သဝ်း။
တႄႇဢဝ် လိူၼ်ၵျႅၼ်ႊၼိဝ်ႊရီႊ 2024 ၼၼ်ႉမႃး သိုၵ်းမၢၼ်ႈ ယိုတ်းမိူင်းတင်း သိုၵ်းၶၢင် KIA လႄႈ ၸုမ်းၵႅတ်ႇၶႄ ၵူၼ်းမိူင်း PDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇသေ ႁဵတ်းႁႂ်ႈၵူၼ်းမိူင်းၼပ်ႉႁူဝ်မိုၼ်ႇ ပၢႆႈ ၽေးသိုၵ်း ႁၢၼ်ႉတေႃႇထိုင်ယၢမ်းလဵဝ် ပၢင်တိုၵ်းယဵၼ်လူင်းယဝ်ႉသေတႃႉ ၵူၼ်းမိူင်းယင်းပႆႇႁတ်းပွၵ်ႈ ယွၼ်ႉသိုၵ်းတင်းသွင် ၾၢႆႇ တိုၵ်ႉမီးလွင်ႈၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ဝႃႈၼႆ။
ၵူၼ်းပၢႆႈၽေးသိုၵ်း မိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပူၼ်ႉမႃး လၢႆဝၼ်းၼႆႉ ႁဝ်းၶႃႈ ပွၵ်ႈမိူဝ်းၸႂ်းႁိူၼ်းသေ ပွၵ်ႈမႃးၶိုၼ်း ဢွင်ႈတီႈၵူၼ်းပၢႆႈၽေး။ ယွၼ်ႉဝႃႈ ႁိူၼ်းယေး ၵမ်ႈၼမ်တႄႉ ပဵၼ်ၾႆးမႆးပႅတ်ႈမူတ်းလႄႈ ဢမ်ႇမီးတီႈယူႇ။ မၢင်ၸိူဝ်းႁိူၼ်း ယေး မီးယူႇၵေႃႈ ဢမ်ႇႁတ်းမိူဝ်းယူႇ။ ၵူဝ်သိုၵ်းၶၢင်တင်း သိုၵ်းမၢၼ်ႈ ယိုဝ်းၵၼ်ၶိုၼ်းၶႃႈဢေႃႈ။ ႁဝ်းၶႃႈ ၵူဝ်ၺႃး ၶိုၼ်းမိူၼ် မိူဝ်ႈ ပူၼ်ႉမႃးၼႆႉဢေႃႈ”- ဝႃႈၼႆ။
မိူဝ်ႈဝၼ်းတီႈ 24/1/2024 ၼၼ်ႉ သိုၵ်းၶၢင် KIA ပိုၼ်ၽၢဝ်ႇ ၵုမ်းလႆႈဝဵင်းယဝ်ႉ ဝႃႈၼႆသေတႃႉ ထိုင်မႃး ဝၼ်းတီႈ 27/1/2024 သိုၵ်းမၢၼ်ႈ ပိုၼ်ၽၢဝ်ႇ ယိုတ်းလႆႈၶိုၼ်းဝဵင်းမိူင်းမိတ်ႈယဝ်ႉ ႁၢၼ်ႉတေႃႇထိုင်ယၢမ်းလဵဝ် သိုၵ်းမၢၼ်ႈတူင်ႉၼိုင် ယူႇဝႆႉ ၼႂ်းဝဵင်း။
“ၵွပ်ႈၼႆလႄႈ ပၢင်တိုၵ်းၼႆႉ ဢမ်ႇႁူႉဝႃႈ တေၵိူတ်ႇၶိုၼ်ႈထႅင်ႈမိူဝ်ႈလႂ် ယၢမ်းလဵဝ် တင်းသွင်ၾၢႆႇၵေႃႈ တိုၵ်ႉၶဵင်ႈၶႅင်ၵၼ်ယူႇ ပေႃးတေပွၵ်ႈမိူဝ်း ႁဵတ်းၶိုၼ်းႁိူၼ်းတႄႉ မၼ်းဢမ်ႇငၢႆႈၶႃႈ။ ပေႃးဢမ်ႇမီးငိုၼ်း ၼပ်ႉႁူဝ်ပၢၵ်သႅၼ်မၼ်း။ ၵႃႈတေလႆႈႁဵတ်း ၵၢၼ်ႁႃငိုၼ်းၶိုၼ်းသေ ၸင်ႇတေၶိုၼ်းၵႂႃႇယူႇၵူၺ်း။ တႃႇတေၶိုၼ်းလီမိူၼ်ၵဝ်ႇတႄႉ မၼ်းဢမ်ႇငၢႆႈၶႃႈ မိူၼ် ၼင်ႇ ၵၢတ်ႇလူင် ႁၢၼ်ႉၶၢႆၶူဝ်း ၸိူဝ်းၼႆႉၵေႃႈ ထုၵ်ႇၾႆးမႆႈပႅတ်ႈတင်းၼမ်ယဝ်ႉ”- ၵူၼ်းပၢႆႈၽေးသိုၵ်း သိုပ်ႇလၢတ်ႈ ၼႄၼင်ႇၼႆ။
ၸွမ်းၼင်ႇ ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းမိူင်းမိတ်ႈၶဝ် ယိုၼ်းမိုဝ်းထိုင်လႆႈသေ ၵဵပ်းဝႆႉသဵၼ်ႈမၢႆႁူဝ်ၵူၼ်းတႄႉ မိူၼ်ၼင်ႇ တီႈဝဵင်းလိူဝ်ႇမီး 1,465 တူၼ်/ ၵေႃႉ (သင်ၶၸဝ်ႈ၊ ၸၢႆး/ ယိင်း) ၵမ်ႈၼမ် ပၢႆႈသွၼ်ႈဝႆႉၸွမ်းဝတ်ႉမုၼ် ၸဝ်ႈလႄႈ ႁိူၼ်း ယေးပီႈၼွင်ႉ။ ယဝ်ႉၵေႃႈ တီႈဝဵင်းမိူင်းမိတ်ႈ ဢၼ်ပၢႆႈၵႂႃႇသွၼ်ႈဝႆႉ ဢွင်ႈတီႈလွတ်ႈၽေးဝႆႉသမ်ႉ မီး 6,000 ပၢႆ (သင်ၶၸဝ်ႈ၊ ၸၢႆး/ ယိင်း) ၸိူဝ်းၼႆႉ။
ပၢင်တိုၵ်း တီႈဝဵင်းမိူင်းမိတ်ႈၼႆႉ ႁဵတ်းႁႂ်ႈ တုမ်ႉတိူဝ်ႉႁိူၼ်းယေး ၵူၼ်းဝၢၼ်ႈလႄႈ ၵၢတ်ႇၸိူဝ်းၼႆႉ လူႉၵွႆ ထုၵ်ႇၾႆးမႆႈၼမ်။ ယဝ်ႉၵေႃႈ တုမ်ႉတိူဝ်ႉၵူၼ်းမိူင်း လူႉတၢႆ ဢမ်ႇယွမ်း 20 လိူဝ်ၼၼ်ႉ မၢတ်ႇၸဵပ်းၸွမ်းထႅင်ႈၼမ်။
