ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆးဝႃႈ ပၢင်တိုၵ်း ဢၼ်ပဵၼ်ယူႇ ၼႂ်းမိူင်းတႆးပွတ်းႁွင်ႇၼႆႉ ႁႂ်ႈၼႂ်းမိူင်း/ ၼွၵ်ႈမိူင်း ႁပ်ႉ ႁူႉႁၼ်ၸွမ်း လွင်ႈတုၵ်ႉၶ ၵူၼ်းမိူင်း ၼႂ်းၵႄႈပၢင်တိုၵ်းသိုၵ်းသိူဝ် ဢၼ်ပဵၼ်ယူႇႁၢဝ်ႈႁႅင်းၼႆႉ ဝႃႈၼႆ။
ဝၼ်းတီႈ 23/1/2024 ယူႇတီႈ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး ၵဵဝ်ႇလူၺ်ႈ လွင်ႈသိုၵ်း မၢၼ်ႈ သိုပ်ႇတိုၵ်းတေႃးၸွမ်းသဵၼ်ႈသၢႆတေႃႈၼမ်ႉမၼ်း – ၵျႅတ်ႊၶႄႇ ၼႂ်းမိူင်းတႆးပွတ်းႁွင်ႇ မိူၼ်ၼင်ႇ ၸႄႈဝဵင်းၼမ်ႉတူႈ၊ သီႇ ပေႃႉ၊ ၵျွၵ်ႉမႄးလႄႈ ၼွင်ၶဵဝ် ၸိူဝ်းၼႆႉ။ ၼႂ်းၶၢဝ်းတၢင်းၸမ်လိူၼ်ၵူၺ်း တုမ်ႉတိူဝ်ႉ ၵူၼ်းမိူင်းလူႉတၢႆ 10 ၵေႃႉ၊ မၢတ်ႇၸဵပ်း 14 ၵေႃႉယဝ်ႉ ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ -“ဢၼ်ႁဝ်းၶႃႈ ဢွၵ်ႇၽိုၼ် တၢမ်းငဝ်းလၢႆးၼႆႉ ၶႂ်ႈႁႂ်ႈၼႂ်းမိူင်း/ ၼွၵ်ႈမိူင်း ႁပ်ႉႁူႉႁၼ်ၸွမ်း ဢၼ်ပဵၼ်ပၢင်တိုၵ်းယူႇ ၼႂ်းမိူင်းတႆး ပွတ်းႁွင်ႇၼႆႉလႄႈ လွင်ႈ သိုၵ်းမၢၼ်ႈ ဢဝ်ၵွင်ႈလူင်ယိုဝ်းၵႂႃႇၵႃႈဝႃႈၵႃႈပဵၼ်ၸိူဝ်းၼၼ်ႉသေဢမ်ႇၵႃး လွင်ႈၸႂ်ႉၶိူင်ႈမိၼ်တိုၵ်းၼႂ်းမိူင်း ပွႆႇမၢၵ်ႇၸွမ်းပိုၼ်ႉ တီႈၵူၼ်းမိူင်းယူႇသဝ်းသေ ႁဵတ်းႁႂ်ႈၵူၼ်းမိူင်းလႆႈလူႉတၢႆ ပၢႆႈၽၢတ်ႇႁိူၼ်းယေး ၸိူဝ်းၼႆႉ မၼ်းပူၼ်ႉပႅၼ်ပိူင်သိုၵ်း ပဵၼ် (War crime) ယဝ်ႉ။ လွင်ႈဢဝ်ၶိူင်ႈမိၼ်တိုၵ်းၸွမ်း သၢႆတေႃႈၼမ်ႉမၼ်းလႄႈ ၵျႅတ်ႊ ၶႄႇ ၸိူဝ်းၼၼ်ႉၵေႃႈ ၸၢင်ႈႁဵတ်းႁႂ်ႈ တေႃႈ ၼမ်ႉမၼ်းၵျႅတ်ႊ တႅၵ်ႇလုၵ်ႉပဵၼ်ၾႆး လၢမ်းယႂ်ႇလူင်ထႅင်ႈဢေႃႈ”- ဝႃႈၼႆ။
ဢိင်ၼိူဝ် ပၢင်တိုၵ်း ၸွမ်းသၢႆတေႃႈၼမ်ႉမၼ်း – ၵျႅတ်ႊၶႄႇ ၼႂ်းၸိုင်ႈတႆးပွတ်းႁွင်ႇၼႆႉသေ ယူႇတီႈ ၵဝ်ႉငဝ်ႈသုၼ်ႇလႆႈ ၵူၼ်း ၸိုင်ႈတႆး ဢွၵ်ႇၽိုၼ်တၢမ်းငဝ်းလၢႆးဝႆႉဝႃႈ – တႄႇဢဝ် ဝၼ်းတီႈ 19/12/2023 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 11/1/2024 ၼႆႉ တုမ်ႉတိူဝ်ႉၵူၼ်းမိူင်း လူႉတၢႆမၢတ်ႇၸဵပ်းၸွမ်း မိူၼ်ၼင်ႇ – ၵူၼ်းမိူင်းၼမ်ႉတူႈ မၢတ်ႇၸဵပ်း 9 ၵေႃႉ လူႉတၢႆ 7 ၵေႃႉ။ ယဝ်ႉၵေႃႈ မၢၵ်ႇလူင်တူၵ်းသႂ်ႇ ဝတ်ႉမုၼ်ၸဝ်ႈ လူႉၵွႆ လင်ၼိုင်ႈ၊ ၵျွင်းမူႇသလိမ်ႇ လင်ၼိုင်ႈ၊ ႁူင်းႁဵၼ်း လင်ၼိုင်ႈလႄႈ ႁိူၼ်းယေးထႅင်ႈ 32 လင်။ ၼႂ်း 32 လင်ၼၼ်ႉ ထုၵ်ႇၾႆးမႆႈ ပဵၼ်ၽဝ် 2 လင်။
လိူဝ်ၼၼ်ႉ တီႈဝဵင်းသီႇပေႃႉၵေႃႈ တုမ်ႉတိူဝ်ႉ ၵူၼ်းမိူင်း မၢတ်ႇၸဵပ်း 2 ၵေႃႉ။ တိူဝ်ႉၺႃး သႃလႃး လင်ၼိုင်ႈလႄႈ ဝတ်ႉမုၼ်ၸဝ်ႈ လူႉၵွႆ ၸွမ်း 2 လင်။ ယဝ်ႉၵေႃႈ ၼႂ်းၸႄႈဝဵင်းၼွင်လႄႈ ၵျွၵ်ႉမႄးသမ်ႉ ၵူၼ်းမိူင်းမၢတ်ႇၸဵပ်း 3 ၵေႃႉ လူႉတၢႆ 3 ၵေႃႉ။ ႁိူၼ်း ယေး လူႉၵွႆ 35 လင် ဝႃႈၼႆ။
