လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG ပိုၼ်ၽၢဝ်ႇဝႃႈ – သိုၵ်းမၢၼ်ႈၺႃးယိုဝ်းၵူႈၾၢႆႇၾၢႆႇလႄႈ ႁႅင်းယွမ်းတင်းၼမ်ယဝ်ႉဝႃႈၼႆ။
ဝၼ်းတီႈ 22/01/2024 ၼႆႉ NUG ဢွၵ်ႇၶေႃႈပိုၼ်ၽၢဝ်ႇဝႃႈ သိုၵ်းမၢၼ်ႈၺႃးယိုဝ်းလၢႆၾၢႆႇလႄႈ သုမ်းဢဵၼ်ႁႅင်းဝႆႉတင်းၼမ် တပ်ႉပၢင်သဝ်းၵေႃႈသုမ်းၼမ် ၵွပ်ႈၼႆလႄႈ ၼႂ်းပၢင်တိုၵ်း မိူင်းတႆးပွတ်းႁွင်ႇလႄႈ မိူင်းရၶႅင်ႇၼၼ်ႉလႆႈငိၼ်းဝႃႈသိုၵ်းမၢၼ်ႈ ၸႂ်ႉပႃးမၢၵ်ႇမိုဝ်ႈၸိုၼ်းယၢမ်းဢၼ်ပႃးထၢတ်ႈၶႅမ်ႊမီႊၶိူဝ်ႊလ် ဝႃႈၼႆ။
လိူဝ်ၼၼ်ႉ ပၢင်သဝ်းသိုၵ်းမၢၼ်ႈ လႄႈ ၵဵတ်ႉ/လၢၼ်ႇယႂ်ႇ ငိုၼ်းၶဝ်ႈၸိုင်ႈမိူင်းၼမ် ဢၼ်သိုၵ်းမၢၼ်ႈၵုမ်းဝႆႉၸိူဝ်းၼႆႉၵေႃႈ သိုၵ်းၸၢဝ်းၶိူဝ်း ယိုတ်းဢဝ်လႆႈဝႆႉ တင်းၼမ်။
ၵွပ်ႈၼႆလႄႈ ပၢင်တိုၵ်းတွၼ်ႈတႃႇၵူၼ်းမိူင်းၼႆႉ တင်ႈတႄႇႁၢင်ပီ 2023 ၼႆႉမႃး ပဵၼ်လွင်ႈလႅၵ်ႈလၢႆႈတွၼ်ႈတႃႇၸိုင်ႈမိူင်းတႄႉတႄႉ NUG လၢတ်ႈဝႆႉပႃးၼႂ်းၶေႃႈပိုၼ်ၽၢဝ်ႇဝႆႉၼင်ႇၼႆ။
ၼႂ်းၼၼ်ႉ NUG ထတ်းသၢင်ဝႆႉဝႃႈ – တီႈပၢင်တိုၵ်းၼႂ်းၸိုင်ႈတႆးပွတ်းႁွင်ႇ၊ မိူင်းရၶႅင်ႇ၊ တိူင်းၸႄႈၵႅင်း၊ မိူင်းယၢင်းလႅင်ၸိူဝ်းၼၼ်ႉ ၸႂ်ႉလၢႆးတိုၵ်းပၢႆးသိုၵ်း(Conventional warfare)သေပိုတ်းယိုဝ်းသေ ပၢင်တိုၵ်းတၢင်ႇတီႈတႄႉ ၸႂ်ႉလၢႆးတိုၵ်းပၢႆးသိုၵ်း (Unconventional warfare)သေပိုတ်းယိုဝ်းၵႂႃႇ ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၾၢႆႇတၢင်းသိုၵ်းမၢၼ်ႈတႄႉပႆႇတုမ်ႉတွပ်ႇၶိုၼ်းဝႃႈႁိုဝ်။ ၵူၼ်းပၵ်းတႃပႂ်ႉတူၺ်းၵၢၼ်သိုၵ်းၼႂ်းမိူင်းမၢၼ်ႈတႄႉလၢတ်ႈဝႃႈ သိုၵ်းမၢၼ်ႈၸႂ်ႉလၢႆးတိုၵ်းပၢႆးတိုၵ်းၸိူင်ႉႁိုဝ်ၵေႃႈလီ ယၢမ်းလဵဝ်တႄႉဢဵၼ်ႁႅင်းၶဝ်ၸုတ်ႈယွမ်းဝႆႉၼမ်သေ ဢဵၼ်ႁႅင်း သိုၵ်းၸၢဝ်းၶိူဝ်းလႄႈၵူၼ်းၼုမ်ႇ ဢွင်ႇပေႉဝႆႉၼမ်- ဝႃႈၼႆ။
