တပ်ႉသိုၵ်းဝႃႉ UWSA ပိုၼ်ၽၢဝ်ႇဝႃႈ တေဢမ်ႇၶဝ်ႈတိုၵ်း တိူင်းသိုၵ်းသၢမ်ၸဵင်ႇၵဵင်းတုင် ၼႂ်းၸိုင်ႈတႆး ပွတ်းဢွၵ်ႇၶူင်း။

ဝၢႆးၸုမ်းဢူၺ်းလီ ပွတ်းႁွင်ႇ 3 ၸုမ်း ၵုမ်းလႆႈ ၸႄႈဝဵင်းႁူဝ်ပၢင်ႇလႄႈ ပၢင်ႇလူင် ၼႂ်းၸိုင်ႈတႆးပွတ်းႁွင်ႇယဝ်ႉၼႆႉ ၶိုၼ်း မွပ်ႈပၼ် သိုၵ်းဝႃႉ UWSA သေ မီးၶၢဝ်ႇလိုဝ်းဝႃႈ သိုၵ်းဝႃႉ တေၶဝ်ႈလူမ်ႇယိုဝ်း တပ်ႉသိုၵ်းမၢၼ်ႈ သၢမ်ၸဵင်ႇၵဵင်းတုင် ထႅင်ႈၼႆလႄႈ ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 16/1/2024 ၼႆႉ ပိုၼ်ၽၢဝ်ႇဢွၵ်ႇမႃးဝႃႈ ဢမ်ႇၸႂ်ႈလွင်ႈတႄႉ ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼႆႉ ပႃးဝႆႉဝႃႈ – “ၸွမ်းၼင်ႇ လူင်းလၢႆးမိုဝ်းလႆႈၸႂ်ၵၼ်ဝႆႉ လွင်ႈငမ်းယဵၼ်ၼၼ်ႉ ယူႇတီႈတပ်ႉသိုၵ်းဝႃႉ တေႁဵတ်းၸွမ်း။ ပၢင်တိုၵ်းသိုၵ်းသိူဝ် ဢၼ်ပဵၼ်ယူႇၼႂ်းမိူင်းႁူမ်ႈတုမ်ၼႆႉၵေႃႈ တပ်ႉသိုၵ်းဝႃႉ တိုၼ်းဝႃႈ ဢမ်ႇၶဝ်ႈပႃးၾၢႆႇ လႂ်။ ၵဵဝ်ႇၵပ်းလွင်ႈ ၸုမ်းသိုၵ်းဢူၺ်းလီပွတ်းႁွင်ႇ 3 ၸုမ်းတင်း သိုၵ်းမၢၼ်ႈ ဢုပ်ႇဢူဝ်းတူၵ်းလူင်းၵၼ်ဝႆႉ တီႈမိူင်းၶႄႇ ၼၼ်ႉၵေႃႈ ယုမ်ႇယမ်ဝႃႈ တေႁဵတ်းၸွမ်းၼင်ႇဢုပ်ႇဢူဝ်းဝႆႉ ၵူႈမူႇၵူႈၸုမ်းၼၼ်ႉယူႇ။ ယူႇတီႈ သိုၵ်းဝႃႉသေ တေၵမ်ႉထႅမ် ၵႂႃႇၸွမ်းယူႇ”- ဝႃႈၼႆ။

ၵွပ်ႈၼၼ်လႄႈ မီးၶၢဝ်ႇလိုဝ်းဢွၵ်ႇမႃးဝႃႈ လွင်ႈသိုၵ်းဝႃႉ တေလူမ်ႇယိုဝ်းသိုၵ်းမၢၼ်ႈတိူင်းသိုၵ်းသၢမ်ၸဵင်ႇ ၵဵင်းတုင် ဢၼ်ဝႃႈၼၼ်ႉ ဢမ်ႇၸႂ်ႈလွင်ႈတႄႉ ဝႃႈၼႆ။

“လွင်ႈတေၶဝ်ႈတိုၵ်း တိူင်းသိုၵ်းသၢမ်ၸဵင်ႇ ၵဵင်းတုင်း ဢၼ်ဝႃႈၼၼ်ႉ ဢမ်ႇၸႂ်ႈလွင်ႈတႄႉ ယွၼ်ႉပၢင်တိုၵ်းသိုၵ်းသိူဝ် ပွတ်းႁွင်ႇၼၼ်ႉသေ ႁဵတ်းႁႂ်ႈၵူၼ်းမိူင်းလႆႈတုၵ်ႉၸွမ်းၼမ်။ တပ်ႉသိုၵ်းဝႃႉၵေႃႈ လႆႈၸွႆႈထႅမ်ပၼ် သိုၵ်းႁၢၼ် ၸိူဝ်းဝၢင်း ၶိူင်ႈလႄႈ ၵူၼ်းမိူင်းၸိူဝ်းလႆႈပၢႆႈၽေးၸိူဝ်းၼၼ်ႉယူႇ” – ၼႂ်းလိၵ်ႈပိုၼ်ၽၢဝ်ႇ ဢွၵ်ႇဝႆႉပႃး ၼင်ႇၼႆထႅင်ႈ။

မိူဝ်ႈဝၼ်းတီႈ 13/1/2024 ဢၼ်သိုၵ်းဝႃႉ ပိုၼ်ၽၢဝ်ႇ လႆႈႁပ်ႉၵုမ်းၵမ် ၸႄႈဝဵင်းႁူဝ်ပၢင်ႇလႄႈ ပၢင်ႇလူင်ပွတ်းႁွင်ႇ ၼၼ်ႉ ၵေႃႈ ယွၼ်ႉၾၢႆႇသိုၵ်းမၢၼ်ႈ တူၵ်းလူင်းလႆႈၸႂ်ၵၼ်သေ မွပ်ႈပၼ်ဝႆႉၵူၺ်း။ တႃႇၽွင်းငမ်း ၸႄႈဝဵင်းႁူဝ်ပၢင်ႇလႄႈ ပၢင်ႇ လူင်ၼႆႉၵေႃႈ တပ်ႉသိုၵ်းဝႃႉ UWSA လႆႈတုၵ်းယွၼ်းလူင်ပွင်ၸိုင်ႈမၢၼ်ႈဝႆႉ ၸဵမ်မိူဝ်ႈလၢႆပီပူၼ်ႉမႃးယဝ်ႉ – UWSA ပိုၼ် ၽၢဝ်ႇလၢတ်ႈပႃးၼင်ႇၼႆ။

ၼႂ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼႆႉ တပ်ႉသိုၵ်းဝႃႉ UWSA ပဵၼ်တပ်ႉသိုၵ်း ဢၼ်မီးဢဵၼ်ႁႅင်းၼမ်လႄႈ ၶိူင်ႈၵွင်ႈၵၢင်ႇ ၼမ်သုတ်း – သိုဝ်ႇ Irrawaddy ဢွၵ်ႇဝႆႉၼင်ႇၼႆ။