ၵူၼ်းပၢႆႈၽေးသိုၵ်း တၢင်းၾၢႆႇႁွင်ႇဝဵင်းလႄႈ ၾၢႆႇၸၢၼ်းဝဵင်းလႃႈသဵဝ်ႈ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်း မွၵ်ႈ 10 ဝၢၼ်ႈယဝ်ႉသေတႃႉ မၢင်ၸိူဝ်း ပွၵ်ႈမိူဝ်းယဝ်ႉ ပႆႇႁတ်းၶဝ်ႈဝၢၼ်ႈ ပၢႆႈမူၵ်းၸွမ်းထဵင်ၼႃး ၸွမ်းထိူၼ်ႇၶိူဝ်း ၸိူဝ်းၼႆႉ ၵေႃႈမီး။
တႄႇဢဝ် ၵၢင်လိူၼ်ၵျႅၼ်ႊၼိဝ်ႊရီႊ 2024 ၼႆႉမႃး ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ သဵင်ၵွင်ႈ ယဵၼ်လူင်းယဝ်ႉလႄႈ ၵူၼ်းပၢႆႈၽေးသိုၵ်း မိူၼ်ၼင်ႇ ဝၢၼ်ႈႁူဝ်ၼႃး၊ ၵုင်းသႃႇ၊ မၢၵ်ႇၶီႈၼူ၊ ဝၢၼ်ႈမွၼ်း၊ ပၢင်ၸူင်၊ မိူင်းတဵမ်၊ ၽၢႆတွင်းလႄႈ ဝၢၼ်ႈ ပၢင်ႁုင်း ၸိူဝ်းၼႆႉ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းသေတႃႉ ယၢမ်းလဵဝ် ၼႂ်းပိုၼ်ႉတီႈၸိူဝ်းၼၼ်ႉ မီးလွင်ႈၶဵင်ႈၶႅင်ၵၢၼ် သိုၵ်းဝႆႉလႄႈ ႁဵတ်းႁႂ်ႈၵူၼ်းပၢႆႈၽေး ၵမ်ႈၽွင်ႈ ဢမ်ႇႁတ်းၶဝ်ႈဝၢၼ်ႈ ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “သဵင်ၵွင်ႈဢမ်ႇတႅၵ်ႇယဝ်ႉလႄႈ ၵူၼ်းပၢႆႈ ၽေး ဢွၼ်ၵၼ်ပွၵ်ႈ ၵမ်ႈၽွင်ႈ။ မၢင်ၸိူဝ်း ပွၵ်ႈမိူဝ်းႁၼ်ႁိူၼ်းၶဝ်လူႉလႅဝ် ဢမ်ႇမီးတီႈယူႇပွၵ်ႈမႃးၶိုၼ်း။ မၢင်ႁိူၼ်း ထုၵ်ႇၵူၼ်းသွၵ်ႈတဝ်ယႃၼႂ်းႁိူၼ်း ဢမ်ႇၵိုတ်းလိူဝ်သင်။ ယဝ်ႉၵေႃႈ ၸုမ်းယိပ်းၵွင်ႈၵၢင်ႇသမ်ႉ တိုၵ်ႉမီးၸွမ်းၼႂ်းဝၢၼ်ႈယူႇလႄႈ ႁဵတ်းႁႂ်ႈ ၵူၼ်းပၢႆႈၽေး ဢမ်ႇၸၢင်ႈၶဝ်ႈဝၢၼ်ႈ ၸိူဝ်းၼႆႉၵေႃႈမီး။ ၵူၼ်းပၢႆႈၽေး ၵမ်ႈၽွင်ႈ လမ်တိုၼ်လမ်တၼ်သေ ပွၵ်ႈမိူဝ်းလႄႈ ၽိူဝ်ႇၽႅဝ်တီႈဝၢၼ်ႈယဝ်ႉ ဢမ်ႇႁတ်းယူႇၼႂ်းဝၢၼ်ႈ ဢွၼ်ၵၼ်ပၢႆႈၵႂႃႇၼွၼ်းၸွမ်းထဵင်ၼႃး၊ ၸွမ်းၼႂ်းထိူၼ်ႇၼႂ်းၶိူဝ်း ၸိူဝ်းၼႆႉ ၵေႃႈမီး”- ဝႃႈၼႆ။
လိူဝ်ၼၼ်ႉ မၢင်ၸိူဝ်း သိုပ်ႇပၢႆႈၵႂႃႇတၢင်း ဝဵင်းၵႃလီႉ၊ မိူင်းယႆ ၸိူဝ်းၼၼ်ႉၵေႃႈမီး ယဝ်ႉၵေႃႈ ၵူၼ်းၼုမ်ႇ ပၢႆႈၵႂႃႇႁဵတ်း ၵၢၼ်တၢင်း မိူင်းထႆး – မိူင်းၶႄႇ ၸိူဝ်းၼၼ်ႉၵေႃႈ မီးထႅင်ႈတင်းၼမ်။
“ၵူၼ်းၼုမ်ႇၼႆႉ ၶႂ်ႈဝႃႈဢမ်ႇမီးယဝ်ႉ ဢွၼ်ၵၼ်ပၢႆႈၵႂႃႇတၢင်းမိူင်းထႆး – မိူင်းၶႄႇ ၼမ်ႁႅင်းၼႃႇလႄႈ မၢင်ၸိူဝ်း ပၢႆႈၵႂႃႇတင်းႁိူၼ်း တင်းယေး ဝၢၼ်ႈပေႃးယဵၼ်ၶႃႈဢေႃႈ တၢင်းဝဵင်းလႃႈသဵဝ်ႈႁဝ်းၶႃႈၼႆႉ ယွၼ်ႉပၢင်တိုၵ်းၼႆႉသေ မၢင်ၸိူဝ်းၵူဝ်လႆႈႁဵတ်းသိုၵ်း၊ မၢင်ၸိူဝ်းပၢႆႈၽေးသိုၵ်းသေ ထုၵ်ႇႁိူၼ်းယေးၾႆးမႆႈ ဢမ်ႇမီးတီႈယူႇ ၸိူဝ်းၼႆႉသေ သိုပ်ႇပၢႆႈထႅင်ႈ”- ၽူႈ ၸွႆႈထႅမ် ၵူၼ်းပၢႆႈ ၽေးသိုၵ်း ဝဵင်းလႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။
မိူၼ်ၼင်ႇ ၵူၼ်းပၢႆႈၽေးသိုၵ်း ဝၢၼ်ႈၵုင်းသႃႇ၊ ႁူဝ်ၼႃး၊ ပၢင်ၸူင်လႄႈ ပၢင်ႁုင်း ၸိူဝ်းၼႆႉသမ်ႉ ပွၵ်ႈၶိုၼ်းႁိူၼ်းယေးယဝ်ႉသေ တႃႉ ၵမ်ႈၼမ် ဢမ်ႇႁတ်းယူႇႁိူၼ်း မႆႈၸႂ် ၵူဝ်ပဵၼ်ပၢင်တိုၵ်းထႅင်ႈ ယွၼ်ႉမီးၸုမ်းယိပ်းၵွင်ႈၵၢင်ႇ တင်းသွင်ၾၢႆႇ တိုၵ်ႉၶဵင်ႈၶႅင် ၵၼ်ဝႆႉ ႁၢဝ်ႈႁႅင်း ၼႆယဝ်ႉ။
ယၢမ်းလဵဝ် ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈၼႆႉ တေမီးႁူဝ်ၵူၼ်း 2 ႁဵင်ပၢႆ ၸိူဝ်းသွၼ်ႈဝႆႉ ၸွမ်းဝတ်ႉမုၼ်ၸဝ်ႈလႄႈ ႁိူၼ်းယေးပီႈၼွင်ႉၽႂ်မၼ်း ယဝ်ႉၵေႃႈ တၢင်းဝဵင်းသႅၼ်ဝီလႄႈ လၢဝ်ႇၵၢႆး ၸိူဝ်းၼႆႉၵေႃႈ ပၢႆႈမႃးသွၼ်ႈဝႆႉထႅင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ