ၸုမ်းလူင်းလၢႆးမိုဝ်း NCA 7 ၸုမ်းတင်း တပ်ႉသိုၵ်းမၢၼ်ႈ ဢၼ်ၸွမ်သိုၵ်း ယႃႇပျေႉ ဢွၼ်ႁူဝ်ၼၼ်ႉ ႁူပ်ႉဢုပ်ႇၵၼ် တီႈ ၼေႇပျီႇတေႃႇ ပဵၼ်ပွၵ်ႈၵမ်းႁႅၵ်ႈ ၼႂ်းပီ 2024 ။
ဝၼ်းတီႈ 9/1/2024 ယၢမ်းၵၢင်ၼႂ် ၸုမ်းငမ်းယဵၼ် ၶွင်ႇသီႇသိုၵ်မၢၼ်ႈ NSPNC ဢၼ်ၸွမ်သိုၵ်း ယႃႇပျေႉ ဢွၼ်ႁူဝ် ၼၼ်ႉ ႁူပ်ႉထူပ်းဢုပ်ႇဢူဝ်းၵၼ်တင်း ၸုမ်းလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA 7 ၸုမ်း ဢၼ်ပဵၼ်ၶွင်ႇ သီႇဢဝ်ၶိုၼ်းၸိုင်ႈတႆး RCSS ၊ သိုၵ်းပဢူဝ်း PNLO ၊ သိုၵ်းလႃးႁူႇ LDU ၊ သိုၵ်းရၶႅင်ႇ ALP ၊ သိုၵ်းယၢင်းၽိူၵ်ႇ KNU/ KNLA-PC ၊ သိုၵ်းယၢင်းၽိူၵ်ႇၵမ့်ၸွႆႈတီႇမူဝ်ႇၶရေႇသီႇ DKBA လႄႈ ပႃႇတီႇမိူင်းမွၼ်းမႂ်ႇ NMSP ၸိူဝ်းၼႆႉ တီႈ ၼေႇပျီႇတေႃႇ။
ၸဝ်ႈသိုၵ်းလူင် ၶုၼ်ႇဢူၵ်းၵႃႇ ၼႃႇယၵ PNLO လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ႁူပ်ႉၵၼ် ဝၼ်းတီႈ 9 တႄႉ ပႆႇမီး လွင်ႈတူၵ်းလူင်းသင်ၵၼ်။ ဝၼ်းတီႈ 10 တႄႉ ၸင်ႇမီးတူဝ်တႅၼ်း ၶိုၵ်ႉတွၼ်းဢႃႊသီႊယၼ်ႊ ၸိုင်ႈမိူင်းလၢဝ်း Mr. Alounkeo Kittikhoun (မိသ်ႊတိူဝ်ႊ ၶိတ်ႊတီႊၶုၼ်ႊ) မႃးႁူပ်ႉထူပ်းဢုပ်ႇဢူဝ်းၸွမ်း။ ဝၢႆးၼၼ်ႉ ၸင်ႇဢုပ်ႇ လွင်ႈ ဢၼ်တင်းၸုမ်းႁဝ်းၶဝ်ၶႂ်ႈလၢတ်ႈၼၼ်ႉ” – ဝႃႈၼႆ။
ပၢင်ဢုပ်ႇဢူဝ်း တီႈၼေႇပျီႇတေႃႇ ပွၵ်ႈၵမ်းႁႅၵ်ႈ ၼႂ်းပီ 2024 ၼႆႉ ၸတ်းႁဵတ်းတႃႇၶၢဝ်းတၢင်း 2 ဝၼ်း ပဵၼ်ၼႂ်းဝၼ်းတီႈ 9 တင်း 10 ၼႆယဝ်ႉ။
ပူၼ်ႉမႃး ဝၼ်းတီႈ 26-28/6/2023 ၼၼ်ႉ ၸုမ်းဢွၼ်ႁူဝ်ၶၵ်ႉၵၢၼ်လွင်ႈငမ်းယဵၼ် PPST ၵႂႃႇဢုပ်ႇဢူဝ်း ၸုမ်းငမ်း ယဵၼ် ၶွင်ႇသီႇသိုၵ်းမၢၼ်ႈ NSPNC တီႈၼေႇပျီႇတေႃႇ တႃႇၶၢဝ်းတၢင်း 3 ဝၼ်းသေတႃႉ တင်း RCSS လႄႈ MNSP တႄႉ ဢမ်ႇၵႂႃႇဢုပ်ႇၸွမ်း လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ