ၸွမ်းၼင်ႇ ၽႅၼ်တိုၵ်း 1027 ၶၢဝ်းတၢင်း 70 ဝၼ်းပၢႆမႃးၼႆႉ သိုၵ်းၵဝ်ႈၵၢင်ႉ MNDAA ယိုတ်းလႆႈ ၼႃႈလိၼ်ၽွင်းငမ်း တူဝ်ၵဝ်ႇ ၶိုၼ်းမူတ်းယဝ်ႉ ဝႃႈၼႆ။

ဝၼ်းတီႈ 6/1/2024 ၼႆႉ ယူႇတီႈ တပ်ႉသိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇဝႃႈ ၼႂ်းၼႃႈလိၼ်ၽွင်းငမ်းတူဝ်ၵဝ်ႇ ၶွင် တပ်ႉသိုၵ်းၵဝ်ႈၵၢင်ႉ တင်းမူတ်းၼႆႉ ယၢမ်းလဵဝ် ၵုမ်းၵမ်လႆႈမူတ်းယဝ်ႉ မိူၼ်ၼင်ႇ – ၸႄႈဝဵင်းလၢဝ်ႇၵၢႆး၊ ဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) လႄႈဢိၵ်ႇထႅင်ႈ လၢႆၸႄႈဝဵင်း ၼႂ်းၸိုင်ႈတႆးပွတ်းႁွင်ႇ ၸိူဝ်းၼႆႉ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ – “ယူႇတီႈၸုမ်း Myanmar National Truth and Justice Party (MNTJP)  ဢွၼ်ၼမ်းသေ ယိုတ်းလႆႈ ၼႃႈလိၼ်ၽွင်းငမ်းတူဝ်ၵဝ်ႇၶိုၼ်းမူတ်းယဝ်ႉ။ လွင်ႈဢွင်ႇမၢၼ်ၸိူဝ်းၼႆႉ ဢိင်ၼိူဝ် ၽူႈၶဝ်ႈ ၸုမ်းပႃႇတီႇၶဝ်လႄႈ ၵူၼ်းဢၼ်တူင်ႉၼိုင် ၼႂ်းတပ်ႉၸုမ်းဢူၺ်းလီၶဝ် ၸိူဝ်းၼၼ်ႉသေ ၸင်ႇပဵၼ်မႃးယဝ်ႉ။ လွင်ႈဢွင်ႇ မၢၼ်ၼႆႉ လႆႈဝႃႈ ပဵၼ်လွင်ႈဢွင်ႇမၢၼ်ထွတ်ႈမျၢတ်ႈ တႃႇၼႃႈလိၼ်ၶိုၵ်ႉတွၼ်း မၢႆ (1) လႄႈ ပဵၼ်လွင်ႈဢွင်ႇမၢၼ် တႃႇ ၸၢဝ်းၶိူဝ်း ၸိူဝ်းဢၼ်ထုၵ်ႇပိူၼ်ႈပႅၼ်ပေႉၵိၼ်လူလၢႆ မႃးၼၼ်ႉယဝ်ႉ”- ဝႃႈၼႆ။

ၸွမ်းၼင်ႇ ၽႅၼ်တိုၵ်း 1027 ၶွင်ၸုမ်းဢူၺ်းလီ ပွတ်းႁွင်ႇ 3 ၸုမ်းၼႆႉသေ ၶၢဝ်းတၢင်း 70 ဝၼ်းပၢႆမႃးၼႆႉ ယိုတ်းလႆႈ တပ်ႉပၢင်သဝ်းသိုၵ်းမၢၼ်ႈ လၢႆတီႈ။ ၼႂ်းၼၼ်ႉ သိုၵ်းမၢၼ်ႈ ဢၼ်ပၵ်းတပ်ႉဝႆႉ ၼႂ်းၼႃႈလိၼ်ၽွင်းငမ်းတူဝ်ၵဝ်ႇ တပ်ႉသိုၵ်း ၵဝ်ႈၵၢင်ႉ ၸိူဝ်းၼႆႉၵေႃႈ ယွမ်းၵၢၼ်ႉသေ ထွႆပၼ်ၶိုၼ်းမူတ်းယဝ်ႉ ဝႃႈၼႆ။

“ၼႂ်းတပ်ႉမၢၼ်ႈၶဝ်ၼၼ်ႉ ပႃးၽူႈမီးၸၼ်ႉ 6 ၵေႃႉ၊ သိုၵ်းႁၢၼ် 2 ႁဵင်ပၢႆလႄႈ ၵူၼ်းၼႂ်းမုင်ႉႁေႃႁိူၼ်းၶဝ် ႁဵင်ပၢႆ ယွမ်းဝၢင်း ၶိူင်ႈသေ ထွႆပၼ်လီလီ။ ယဝ်ႉၵေႃႈ မီးလွင်ႈတူၵ်းလူင်းၵၼ်တင်းသွင်ၾၢႆႇထႅင်ႈ။ ယူႇတီႈ MNDAA ၸွႆႈၸတ်းပၼ် လွင်ႈ တေႃႉသူင်ႇ လုၵ်ႈလၢင်းၼၢင်းမေး ၵူၼ်းသိုၵ်းမၢၼ်ႈ ၸိူဝ်းၼၼ်ႉ ပွၵ်ႈၶိုၼ်းမိူဝ်း ၼႂ်းဝၼ်းတီႈ 4/1/2024 ယၢမ်းဝၢႆဝၼ်း 2 မူင်းၼၼ်ႉ ယဝ်ႉတူဝ်ႈလီငၢမ်းယဝ်ႉ”- ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉပႃး ၸိူင်ႉၼႆထႅင်ႈ။

မိူဝ်ႈဝၼ်းတီႈ 5/1/2024 ၼၼ်ႉၵေႃႈ သိုၵ်းမၢၼ်ႈ ဢဵၼ်ႁႅင်း 300 ပၢႆ ဢၼ်မီးဝႆႉတီႈလွႆ ၼၢၼ်းထိၼ်ႇမိၼ်တွင်ႇ ၸ ၶၢၼ်းၵူင်း (နန်ထင်မိန်တောင်စခန်းကုန်း) ၼၼ်ႉၵေႃႈ ယွမ်းၵၢၼ်ႉဝၢင်းၶိူင်ႈပၼ် MNDAA ၵႂႃႇ ဝႃႈၼႆ။

မိူဝ်ႈပူၼ်ႉမႃး ၶၢဝ်းတၢင်း 14 ပီၼၼ်ႉ ၾၢႆႇသိုၵ်းမၢၼ်ႈ ဢဝ်ၶေႃႈဢၢင်ႈဝႃႈ တႃႇၵူတ်ထတ်းယႃႈမဝ်းၵမ်လႄႈ ၶိူင်ႈၵွင်ႈၵၢင်ႇ ၼႆသေ ၶဝ်ႈမႃးထင်သဝ်း ၼႂ်းၼႃႈလိၼ်ၽွင်ႈငမ်းတူဝ်ၵဝ်ႇ တပ်ႉသိုၵ်းၵဝ်ႈၵၢင်ႉ MNDAA ၼႆႉ လူၺ်ႈဢမ်ႇၸွမ်းတြႃး။ မိူဝ်ႈလဵဝ် ၼႂ်းၼႃႈလိၼ်ၼႆႉ သိုၵ်းမၢၼ်ႈ ဢမ်ႇမီးသေၵေႃႉယဝ်ႉ လႆႈဝႃႈ ပဵၼ်လွင်ႈဢွင်ႇမၢၼ် ၵိုၵ်းပိုၼ်းၵႂႃႇယဝ်ႉ – ယူႇတီႈ တပ်ႉသိုၵ်းၵဝ်ႈၵၢင်ႉ ပိုၼ်ၽၢဝ်ႇ လၢတ်ႈပႃးၼင်ႇၼႆ။

ပၢင်တိုၵ်း ၸွမ်းလိၼ်လႅၼ်တႆး – ၶႄႇ ၼႂ်းၸိုင်ႈတႆးပွတ်းႁွင်ႇၼႆႉ ယူႇတီႈ တၢင်းၾၢႆႇမိူင်းၶႄႇ ၶႂ်ႈႁႂ်ႈၸဵဝ်းၵိုတ်းတိုၵ်း ၶၼ်ၽႂ်းသေ ၸင်ႇႁွင်ႉၽူႈတၢင်တူဝ်တင်းသွင်ၾၢႆႇ မႃးဢုပ်ႇၵၼ် တီႈဝဵင်းၶုၼ်ႊမိၼ် မိူင်းၶႄႇၼၼ်ႉ 2 ပွၵ်ႈယဝ်ႉ။ ယဝ်ႉၵေႃႈ ႁွင်ႉဝႆႉ ႁႂ်ႈၵႂႃႇႁူပ်ႉဢုပ်ႇၵၼ် ၼႂ်းဝၼ်းတီႈ 7 ထိုင် 9 လိူၼ်ၵျႅၼ်ႊၼိဝ်ႊရီႊၼႆႉထႅင်ႈ။