ၵူၼ်းပၢႆႈၽေးပၢင်ႇသၢႆး ယၢပ်ႇၽိုတ်ႇၸွမ်း ၼႂ်းၵႄႈသိုၵ်းသိူဝ်

ၵူၼ်းဝဵင်းပၢင်ႇသၢႆး ဢွၼ်ၵၼ်ထူပ်းတၢင်းယၢပ်ႇၽိုတ်ႇႁႅင်း မၢင်ၸိူဝ်းပၢႆႈႁွတ်ႈထိုင် ဝဵင်းမူႇၸေႊၵေႃႈ ဢမ်ႇၸၢင်ႈပွၵ်ႈ ၶိုၼ်း မၢင်ၸိူဝ်း ၽႅဝ်ႁိူၼ်းၶိုၼ်းယဝ်ႉ ဢမ်ႇၸၢင်ႈႁဵတ်းၵၢၼ်ႁႃၵိၼ်လဵင်ႉတွင်ႉ လႆႈထၢင်ႇႁၢင်ႈ။

တႄႇဢဝ် လိူၼ်ၼူဝ်ႊဝႅမ်ႊပိူဝ်ႊ 2023 ၼၼ်ႉမႃး သိုၵ်းမၢၼ်ႈတင်း သိုၵ်းၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းဝဵင်းပၢင်ႇသၢႆး ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇသေ ႁဵတ်းႁႂ်ႈၵူၼ်းမိူင်း ဢွၼ် ၵၼ် ပၢႆႈႁွတ်ႈထိုင်ဝဵင်းမူႇၸေႊလႄႈ ၼႂ်းမိူင်းၶႄႇ ၸိူဝ်းၼၼ်ႉ တေႃႇထိုင်ယၢမ်းလဵဝ် ပႆႇၸၢင်ႈပွၵ်ႈၶိုၼ်းႁိူၼ်းယေး၊ မၢင် ၸိူဝ်း ၵိုတ်းၶမ်ဝႆႉ ၼႂ်းပၢင်ႇသၢႆး ၸိူဝ်းၼႆႉၵေႃႈ ဢမ်ႇၸၢင်ႈဢွၵ်ႇမႃးႁဵတ်းၵၢၼ်ႁႃၵိၼ်လဵင်ႉတွင်ႉ လႆႈထၢင်ႇႁၢင်ႈ ယွၼ်ႉသိုၵ်း သွင်ၸုမ်းၼႆႉ ဢမ်ႇပၼ်ၵႂႃႇမႃး။

ၵူၼ်းပိုၼ်ႉတီႈ ဝဵင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းတႄႉ ယဵၼ်လူင်းယဝ်ႉ။ လွင်ႈၵႂႃႇမႃးတႄႉ ယၢပ်ႇဢေႃႈ။ ၵူၼ်းပၢင်ႇသၢႆး ၸိူဝ်းပၢႆႈၵႂႃႇမီးဝႆႉတီႈမူႇၸေႊၼၼ်ႉ တေပွၵ်ႈမႃးၶိုၼ်းၵေႃႈဢမ်ႇလႆႈ ယွၼ်ႉသိုၵ်းမၢၼ်ႈ ဢၼ်ပႂ်ႉဝႆႉတီႈၵဵၵ်ႉ ဢေႊသျႃႊဝေႃႊၼၼ်ႉ ဢမ်ႇပၼ်မႃး။ သိုၵ်းၵဝ်ႈၵၢင်ႉ ဢၼ်မီးဝႆႉတီႈဝဵင်းပၢင်ႇသၢႆးၼႆႉၵေႃႈ ဢမ်ႇပၼ်ၵူၼ်းမိူင်း ဢွၵ်ႇၵႂႃႇ ႁပ်ႉပီႈၼွင်ႉၽႂ်မၼ်းပွၵ်ႈမႃးၶိုၼ်း ထုၵ်ႇႁၢမ်ႈဝႆႉ ၸိူင်ႉၼႆၶႃႈဢေႃႈ”- ဝႃႈၼႆ။

ယွၼ်ႉသိုၵ်းသွင်ၸုမ်း ႁႄႉႁၢမ်ႈ ၵူၼ်းဝဵင်းပၢင်ႇသၢႆးၵႂႃႇမႃး ၸိူင်ႉၼႆၼႆႉ ၾၢႆႇၼိုင်ႈၵေႃႈ ၵူဝ်ၵူၼ်းမိူင်းထူပ်းတၢင်းယၢပ်ႇ၊ ၾၢႆႇ ၼိုင်ႈသမ်ႉ ၵူဝ်ၵူၼ်းမိူင်း တေႃႉၶဝ်ႈၼမ်ႉတၢင်းၵိၼ် သူင်ႇၸူးသိုၵ်းၼႂ်းဝဵင်း ၼႆယဝ်ႉ။

“ပေႃးၵူၼ်းပၢင်ႇသၢႆး တေမႃးမူႇၸေႊသမ်ႉ သိုၵ်းမၢၼ်ႈၵူဝ်ၵူၼ်းမိူင်းတေႃႉၶဝ်ႈၼမ်ႉတၢင်းၵိၼ်မႃးပၼ် သိုၵ်းၵဝ်ႈၵၢင်ႉ လႄႈ ၶဝ်ဢမ်ႇပၼ်ၶဝ်ႈဝဵင်း ယဝ်ႉၵေႃႈ ၵူဝ်သိုၵ်းၵဝ်ႈၵၢင်ႉၶဝ် မႃးၵဵပ်းသိုၵ်း။ သိုၵ်းၵဝ်ႈၵၢင်ႉသမ်ႉ ၵူဝ်ၵူၼ်းမိူင်းထူပ်းၽေး လႄႈ ဢမ်ႇပၼ်ဢွၵ်ႇဝဵင်း။ ၵွပ်ႈၼႆလႄႈ ၶဝ်ဢမ်ႇပၼ်ၵႂႃႇမႃး။ ၵူၼ်းမိူင်းတႄႉ ပဵၼ်ဢၼ် ယၢပ်ႇၽိုတ်ႇၼႂ်းၵႄႈၶဝ်ဝႆႉၶႃႈ ဢေႃႈ”- ၵူၼ်းပိုၼ်ႉတီႈ ဝဵင်းပၢင်ႇသၢႆး သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် ၵူၼ်းဝဵင်းပၢင်ႇသၢႆး ၵမ်ႈၼမ်တႄႉ ဢွၼ်ၵၼ်ပၢႆႈၵႂႃႇသွၼ်ႈဝႆႉ ႁိူၼ်းယေး ပီႈၼွင်ႉၽႂ်မၼ်း ၼႂ်းဝဵင်းမူႇၸေႊ ယဝ်ႉၵေႃႈ ၼႂ်းဝဵင်းၸေႊၵဝ်ႇလႄႈ မိူင်းမၢဝ်း ၼႂ်းၸိုင်ႈမိူင်းၶႄႇ ၸိူဝ်းၼၼ်ႉၼမ်။

ၵူၼ်းႁႃၸဝ်ႉၵိၼ်ၶမ်ႈ တီႈဝဵင်းပၢင်ႇသၢႆး လၢတ်ႈတီႈၽူႈတွႆႇႁွၵ်ႈဝႃႈ – “ၶူဝ်းၵုၼ်ႇ ၶွင်ၵိၼ်ယႅမ်ႉၼႆႉ ၵမ်ႈၼမ် တေဢဝ်မႃး တၢင်းမူႇၸေႊ။ ယၢမ်းလဵဝ် ဢမ်ႇၸၢင်ႈဢဝ်မႃးလႄႈ ၶူဝ်းၵုၼ်ႇ ဢၼ်ပိူၼ်ႈမီးၶၢႆပၼ်ႁဝ်းၼႆႉ မၼ်းၵႃႈႁႅင်းၼႃႇ။ ၵႃႈယူႇ သေတႃႉၵေႃႈ တိုၼ်းလႆႈသိုဝ်ႉၵိၼ်ယဝ်ႉ ဢမ်ႇၸၢင်ႈႁဵတ်းႁိုဝ်။ တႃႇမီးၵၢၼ်ႁဵတ်းၵေႃႈ လိူဝ်သေ ၵႂႃႇၵိၼ်ၸၢင်ႈတႅပ်းဢွႆႈ ပိူၼ်ႈၵူၺ်း ဢမ်ႇၸၢင်ႈႁဵတ်းသင်”- ဝႃႈၼႆ။

ဢွႆႈသမ်ႉ ၵမ်ႈၼမ် တေတေႃႉၶၢႆတၢင်းမိူင်းၵူဝ်းသေ သူင်ႇၶဝ်ႈၸူးတၢင်းမိူင်းၶႄႇ။ ၵူၺ်းၵႃႈ တၢင်းမူႇၸေႊလႄႈ ၼမ်ႉၶမ်း တႄႉ ဢမ်ႇၸၢင်ႈတေႃႉသူင်ႇၶၢႆ ၼႆယဝ်ႉ။

မိူဝ်ႈဝၼ်းတီႈ 28/11/2023 ပူၼ်ႉမႃးၼၼ်ႉ သိုၵ်းၵဝ်ႈၵၢင်ႉ ပိုၼ်ၽၢဝ်ႇ ၶွတ်ႇၽွတ်ႈ ၸုမ်းၾၢႆႇၽွင်းငမ်း ဝဵင်းပၢင်ႇသၢႆး၊ မိူင်းပေႃႈသေ ဝၢႆးၼၼ်ႉ သိုၵ်းၵဝ်ႈၵၢင်ႉ မၵ်းၶၢၼ်း ၵူၼ်းပိုၼ်ႉတီႈ ႁႂ်ႈႁုင်မိုဝ်ႉၶဝ်ႈၽၵ်းလဵင်ႉလုၵ်ႈသိုၵ်းၶဝ် ၵူႈဝၼ်း လိူဝ် ၼၼ်ႉ ပိုၼ်ၽၢဝ်ႇႁွင်ႉၵူၼ်းမိူင်း ႁဵတ်းသိုၵ်းထႅင်ႈ ၼႆယဝ်ႉ။