ၵူၼ်းဝၢၼ်ႈတူင်ႈၶၢၼ်ႊတႂ်ႈ – ၼိူဝ် ပႆႇၸၢင်ႈပွၵ်ႈၸႂ်းႁိူၼ်း ယွၼ်ႉသိုၵ်းမၢၼ်ႈႁၢမ်ႈ

ၵူၼ်းဝၢၼ်ႈတူင်ႈၶၢၼ်ႊတႂ်ႈ – ၼိူဝ် ပၢႆႈၽေးမႃးသွၼ်ႈဝႆႉ ၼႂ်းဝဵင်းမူႇၸေႊ မီးၶၢဝ်းတၢင်း 10 ဝၼ်းပၢႆယဝ်ႉ ပႆႇၸၢင်ႈ ပွၵ်ႈၶိုၼ်း ႁိူၼ်းယေး ယွၼ်ႉသိုၵ်းမၢၼ်ႈ ႁႄႉႁၢမ်ႈဢမ်ႇပၼ်ၶဝ်ႈဝၢၼ်ႈ။

တႄႇဢဝ် ၵၢင်လိူၼ်ၻီႊသႅမ်ႊပိူဝ်ႊ 2023 ၼႆႉမႃး ၵူၼ်းဝၢၼ်ႈတူင်ႈၶၢၼ်ႊတႂ်ႈ – ၼိူဝ် ဢွၼ်ၵၼ်ပၢႆႈၶဝ်ႈဝဵင်းမူႇၸေႊ ၼႂ်း ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ယွၼ်ႉသိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ 3 ၸုမ်း ပိုတ်းယိုဝ်း ၵၼ် ႁၢဝ်ႈႁႅင်း ၼႆယဝ်ႉ။

ၵူၼ်းဝၢၼ်ႈတူင်ႈၶၢၼ်ႊတႂ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ဢၢၼ်းမိူဝ်းတူၺ်းႁိူၼ်း သိုၵ်းမၢၼ်ႈ ဢမ်ႇပၼ်မိူဝ်း ၶႃႈ ၵႂႃႇ ၽႅဝ်တီႈဢေႊသျိူဝ်ႊဝေႃႊၵေႃႈ ၶဝ်ပိၵ်ႉဝႆႉဢေႃႈ။ မၢင်ပွၵ်ႈမႃး ၶဝ်သမ်ႉပၼ်ၵႂႃႇ ၼိုင်ႈၵေႃႉ သွင်ၵေႃႉယူႇ။ မၢင်ပွၵ်ႈၵေႃႈ ဢမ်ႇ ပၼ်ၵႂႃႇ။ ဢၼ်ႁဝ်းၶႃႈ ပၢႆႈမႃးၼႆႉ မီး 10 ဝၼ်းပၢႆယဝ်ႉ။ ပၢင်တိုၵ်းၶဝ်ၼႆႉ ပဵၼ်ႁၢဝ်ႈႁႅင်းၶႃႈဢေႃႈ။ မၢၵ်ႇၼႆႉ တႅၵ်ႇတင်းၼမ်ၶႃႈ။ ႁိူၼ်းယေး ၵူၼ်းဝၢၼ်ႈ ဢၼ်ဢမ်ႇၺႃးမၢၵ်ႇၼႆႉ ၶႂ်ႈဝႃႈ မီးဢေႇၵူၺ်းၶႃႈ။ မၢၵ်ႇလူင်ဢိူဝ်ႈ ဢၼ်တူၵ်းသႂ်ႇၼႂ်းႁိူၼ်း၊ ယဝ်ႉၵေႃႈ ဢၼ်တူၵ်းၸွမ်းၼိူဝ်တၢင်း ဝၢၼ်ႈတူင်ႈၶၢၼ်ႊၼိူဝ် – တႂ်ႈ ၸိူဝ်းၼႆႉၵေႃႈ မီးဢေႃႈ ”- ဝႃႈၼႆ။

ၵူၼ်းဝၢၼ်ႈတူင်ႈၶၢၼ်ႊတႂ်ႈ – တူင်ႈၶၢၼ်ႊၼိူဝ် ဢၼ်လႆႈပၢႆႈၽေးသိုၵ်းမႃးၼႆႉ မီးၶၢဝ်းတၢင်း 10 ဝၼ်းပၢႆယဝ်ႉလႄႈ ၵူၼ်း ဝၢၼ်ႈ မႆႈၸႂ်တင်းႁိူၼ်းယေး ယွၼ်ႉမီးၵူၼ်းယႃႉသွၵ်ႈတဝ် ၼႂ်းႁိူၼ်းယေး ၼႆယဝ်ႉ။

“မႆႈၸႂ်ဢိူဝ်ႈ ၽႂ်ၵေႃႈမႆႈၸႂ်ၵူႈႁိူၼ်းယဝ်ႉ။ ပၢင်တိုၵ်းၵေႃႈ ပဵၼ်ယူႇတိၵ်းတိၵ်းၼၼ်ႉယဝ်ႉ ၽႂ်ၵေႃႈ ၶႂ်ႈမိူဝ်းတူၺ်းႁိူၼ်း ၽူႈလၵ်ႉ ၵေႃႈ ဢဝ်ၶူဝ်းႁိူၼ်းယေးၵႂႃႇ ႁၢႆလၢႆမူတ်းယဝ်ႉ မႆႈၸႂ်ႁိူၼ်းယေး ၶႂ်ႈမိူဝ်းႁိူၼ်းဢိူဝ်ႈ။ ႁဝ်းၶႃႈ ဢမ်ႇၵူဝ် ပေႃးလႆႈမိူဝ်းႁိူၼ်းတႄႉ ပေႃးပဵၼ်ပၢင်တိုၵ်းၼႆ ၸင်ႇတေပၢႆႈထႅင်ႈၶႃႈဢေႃႈ”- ၵူၼ်းဝၢၼ်ႈတူင်ႈၶၢၼ်ႊတႂ်ႈ သိုပ်ႇလၢတ်ႈ ၼႄၼင်ႇၼႆ။

မိူဝ်ႈဝႃး ဝၼ်းတီႈ 24 ၼႆႉ သိုၵ်းမၢၼ်ႈတင်း ၸုမ်းဢူၺ်းလီ ပွတ်းႁွင်ႇ 3 ၸုမ်း ပဵၼ်ပၢင်တိုၵ်းၵၼ် ႁၢဝ်ႈႁႅင်း တီႈဝၢၼ်ႈတူင်ႈ ၶၢၼ်ႊတႂ်ႈ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်တိုၵ်း မႃးပွႆႇမၢၵ်ႇပႃးလႄႈ ႁဵတ်းႁႂ်ႈတုမ်ႉတိူဝ်ႉႁိူၼ်းယေး ၵူၼ်းဝၢၼ်ႈ လူႉ ၵွႆၸွမ်းလၢႆ လင်။

ယွၼ်ႉသိုၵ်းမၢၼ်ႈ ဢမ်ႇပၼ် ၵူၼ်းမိူင်းၶဝ်ႈဝၢၼ်ႈလႄႈ တႃႇတေလုမ်းလႃး ႁိူၼ်းယေး လူႉၵွႆၸိူဝ်းၼႆႉ ၵူၼ်းဝၢၼ်ႈၶဝ် ဢွၼ် ၵၼ် ထူပ်းတၢင်းယၢပ်ႇၽိုတ်ႇဝႆႉ ဝႃႈၼႆ။