ၵူၼ်းမိူင်းမူႇၸေႊၺႃးၸုမ်းဢမ်ႇႁူႉၾၢႆႇၶဝ်ႈထိုင် ၼႂ်းႁိူၼ်းၼႂ်းယေးသေ ယိုဝ်းၵွင်ႈလွၵ်ႇငိုတ်ႈ မီးလွင်ႈတုမ်ႉတိူဝ်ႉ မၢတ်ႇၸဵပ်းၵေႃႉၼိုင်ႈ။
မိူဝ်ႈၼႆႉ ဝၼ်းတီႈ 20/12/2023 ယၢမ်းၸဝ်ႉ 6 မူင်းၶိုင်ႈၼႆႉ ၵူၼ်းမိူင်း ၼႂ်းပွၵ်ႉႁွင်ႇ သဵၼ်ႈတၢင်းတေႃႇယွတ်ႈ ၸႄႈဝဵင်းမူႇၸေႊ ၺႃးၸုမ်းဢမ်ႇႁူႉၾၢႆႇ ၶဝ်ႈထိုင်ၼႂ်းႁိူၼ်းယေးသေ ယိုဝ်းၵွင်ႈလွၵ်ႇငိုတ်ႈ ၸူၼ်ႁိမ်ဢဝ်ၶူဝ်းၶွင် ၵူၼ်းႁူမ်ႈႁိူၼ်း ၺႃးမတ်ႉ 4 ၵေႃႉ လႄႈ မီးလွင်ႈမၢတ်ႇၸဵပ်းၵေႃႉၼိုင်ႈ။
ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈ တီႈၽူႈတွႆႇႁွၵ်ႈဝႃႈ – “ ၶိင်ႇၼၼ်ႉၶဝ် တိုၵ်ႉပတ်းၽဵဝ်ႈႁိူၼ်းဝႆႉယူႇဢေႃႈၼၼ်ႉ ။ ၽၵ်းတူသမ်ႉပိုတ်ႇဝႆႉလႄႈ မီးၵူၼ်းဢမ်ႇႁူႉၾၢႆႇၶဝ်မႃး 3 ၵေႃႉ။ သွင်ၵေႃႉ ယိပ်းၵွင်ႈ ထႅင်ႈၵေႃႉၼိုင်ႈတႄႉ ယိပ်းမိတ်ႈ သေ ၶဝ်ႈမႃးဢေႃႈ။ ၶဝ်လွၵ်ႇငိုတ်ႈႁႂ်ႈၵူဝ်သေ မတ်ႉဝႆႉ ၵူၼ်းႁူမ်ႈႁိူၼ်း 4 ၵေႃႉ ၶင် ဝႆႉၼႂ်းႁွင်ႈၼွၼ်း ။ ဢၼ်ၺႃးမတ်ႉၼႆႉ တေပဵၼ်လုၵ်ႈဢွၼ်ႇ 3 ၵေႃႉလႄႈ မႄႈထဝ်ႈၶဝ်။ယဝ်ႉၵေႃႈ ၸုမ်းဢမ်ႇႁူႉၾၢႆႇၸိူဝ်းၼႆႉ ဢဝ်ၵွင်ႈ ယိုဝ်းၼႂ်း ႁိူၼ်း တိူဝ်ႉသႂ်ႇမၢၼ်ႇၽၵ်းတူ မၢၼ်ႇတႅၵ်ႇသဵၼ်တိူဝ်ႉသႂ်ႇ ပေႃႈၸဝ်ႈႁိူၼ်းလႄႈ မၢတ်ႇၸဵပ်းတီႈၶႃ မၼ်းၼၼ်ႉဢေႃႈ ” – ဝႃႈၼႆ။
ၸုမ်းဢမ်ႇႁူႉၾၢႆႇၸိူဝ်းၼႆႉ ထၢင်ႇဝႃႈ ႁိူၼ်းလင်ၼႆႉမီးၵွင်ႈမီးၵၢင်ႇလႄႈ ၶဝ်ႈသွၵ်ႈ ဢၢၼ်းယိုတ်းဢဝ် ၵူၼ်းမိူင်း တႄႉ ႁၼ်ထိုင်ၼင်ႇၼႆ။
လွင်ႈၼႆႉ ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၶဝ်လႅပ်ႈတေထၢင်ႇဝႃႈ ႁိူၼ်းၼႆႉ မီးၵွင်ႈၵၢင်ႇၼႆ လႄႈ ၶဝ်ႈသွၵ်ႈဢေႃႈ။ ယွၼ်ႉဝႃႈ ၶဝ်ထၢမ်လွင်ႈၵွင်ႈလွင်ႈၵၢင်ႇ။ ၵူၺ်းၵႃႈ ဢမ်ႇၸၢင်ႈဢဝ်သင် လႄႈ ၸင်ႇဝႃႈ ဢဝ် ၾူၼ်း ၵႂႃႇၼိုင်ႈလုၵ်ႈ ။ ငိုၼ်းတွင်းတႄႉ ဢမ်ႇပႃး။ ႁဵတ်းၼၼ်သေ ဢွၵ်ႇၵႂႃႇၵူၺ်း ” – ဝႃႈၼႆ။
ၼႂ်းၶၢဝ်းတၢင်း သိုၵ်းမၢၼ်ႈယိုတ်ႈမိူင်းမႃး ၸမ် 3 ပီၼႆႉ ၵူၼ်းမိူင်းၼႂ်းမူႇၸေႊ ၵႆႉမီး ၸုမ်းဢမ်ႇႁူႉၾၢႆႇၶဝ်ႈႁဵတ်းႁၢႆႉ ထိုင် ၼႂ်းႁိူၼ်းၼႂ်းယေး။ လွင်ႈတီႉၺွပ်းၵႂႃႇပဵၼ်တူဝ်ယိူဝ်ႇၵေႃႈ မီးမႃးၼမ် ။ မၢင်ပွၵ်ႈၺႃးၸုမ်းယိပ်းၵွင်ႈၵၢင်ႇ လွၵ်ႇငိုတ်ႈ ယွၼ်းငိုၼ်းလႄႈ ဢဝ်ရူတ်ႉၵႃးၸိူဝ်းၼႆႉၵႂႃႇၵေႃႈမီး။
ဝၼ်းတီႈ 29/11/2023 ၼၼ်ႉ သိုၵ်းမၢၼ်ႈ ယိုတ်းမိူင်း ၸႂ်ႉၵူၼ်းဝၢၼ်ႈတူင်ႉၶၢၼ်ႊၼိူဝ် ၸႄႈဝဵင်းမူႇ ၸႄႊ ၸိုင်ႈတႆးပွတ်းႁွင်ႇ ၶၢႆႉဢွၵ်ႇဝၢၼ်ႈသေ ယွၼ်ႉဢွင်ႈတီႈၼၼ်ႈသမ်ႉ မီးဝႆႉပၢင်သဝ်းၵူၼ်းပၢႆႈၽေးလႄႈ ၵူၼ်းဝၢၼ်ႈဢမ်ႇ ယွမ်းၶၢႆႉသေ ထုၵ်ႇသိုၵ်းမၢၼ်ႈ ဢဝ်ၵွင်ႈငႃ ၸူၼ်ၵူၼ်းဝၢၼ်ႈသေ ဢဝ်ပေႇႁူ၊ ရူတ်ႉၶိူင်ႈၵူၼ်းမိူင်းၵႂႃႇ ယဝ်ႉၵေႃႈ ပၢႆသွၵ်ႈတဝ် ၼႂ်းႁိူၼ်းယေး ၵူၼ်းဝၢၼ်ႈထႅင်ႈ။
