ၼႂ်းလိူၼ်ၼူဝ်ႊဝိမ်ႊပိူဝ်ႊ ပီ 2023 ပူၼ်ႉမႃးၼႆႉ သိုၵ်းမၢၼ်ႈတင်းသိုၵ်းလုၵ်ႉၽိုၼ်ႉယၢင်းလႅင်ႁူမ်ႈလၢႆၸုမ်း ပိုတ်းယိုဝ်းၵၼ်ႁၢဝ်ႈႁႅင်းလႄႈ ၵူၼ်းမိူင်းလွႆၶေႃ လႄႈ လႅၼ်လိၼ်တႆး-ယၢင်းလႅင် ၊ ၵူၼ်းမိူင်းၵိုင်ႉၵၢင်ႉ လႆႈပၢႆႈၽေးသိုၵ်းဢမ်ႇတၼ်းလႆႈၶူဝ်းလဵင်းသင် ။ မိူဝ်ႈလဵဝ်ထိုင်ၶၢဝ်းၵတ်းယဝ်ႉလႄႈၵူၼ်းပၢႆႈၽေး လူဝ်ႇၽႃႈၽႅၼ်ႇသိူဝ်ႈၶူဝ်းဢုၼ်ႇ။
ၵူၼ်းပၢႆႈၽေးတီႈလႅၼ်လိၼ်တႆး-ယၢင်းလႅင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈပဵၼ်ပၢင်တိုၵ်းၵေႃႈ သဵၼ်ႈတၢင်းလူင်သမ်ႉ သိုၵ်းၶဝ်ပိၵ်ႉဝႆႉလႄႈ ရူတ်ႉၵႃးဢမ်ႇၸၢင်ႈၵႂႃႇမႃး ၊ ၵႃႈလႆႈဢဝ် ရူတ်ႉၶိူင်ႈသေ ပၢႆႈဢေႃႈ။ မၼ်းဢမ်ႇလႆႈ တေႃႉၶူဝ်းဢွၵ်ႇၼမ် ။ လႆႈဢဝ်တူဝ်ၸႂ်လွတ်ႈၵူၺ်း ။ မိူဝ်ႈလဵဝ် လုၵ်ႈဢွၼ်ႇလႄႈ ၵူၼ်းထဝ်ႈၶႃႈဢေႃႈ ဢၼ်လႆႈမႆၸႂ်။ယွၼ်ႉဢမ်ႇမီးၶူဝ်းဢုၼ်ႇၼုင်ႈၶၢဝ်းၵတ်း။ပွတ်းၼႆႉသမ်ႉ ၶၢဝ်းၵတ်းၼႆ ၵတ်းႁႅင်းဝႆႉဢေႃႈ။တီႈၼွၼ်းတီႈလိုဝ်ႈၶဝ်ၵေႃႈ ဢမ်ႇၸႂ်ႈဢၼ်ႁေႉဢၼ်ၵင်ႈလီလီလႄႈ ၶႅၼ်းၵတ်းႁႅင်းၶႃႈယဝ်ႉ ” – ဝႃႈၼႆ။
ၵူၼ်းပၢႆႈၽေး ၸိူဝ်းႁွတ်ႈဝႆႉတီႈသီႇသႅင်ႇၼႆႉ မိူဝ်ႈတႄႇသိုၵ်းမၢၼ်ႈယိုတ်းမိူင်းမႃး မီးႁူဝ်ၼပ်ႉၵူၼ်း မီး 2 မိုၼ်ႇၸမ် ထိုင်မိူဝ်ႈလဵဝ် မီးထိုင် 3 မိူၼ်ႇပၢႆယဝ်ႉ လိူဝ်သေယၢပ်ႇၽိုတ်ႇၶူဝ်းၼုင်ႈတၢင်းဝႆယဝ်ႉ မိူၼ်ၼင်ႇၶဝ်ႈၼမ်ႉတၢင်းၵိၼ်ၵေႃႈ ယၢပ်ႇၽိုတ်ႇဝႆႉ ဝႃႈၼႆ။
ယူႇတီႈ ၸုမ်း PNLO ယၢမ်ႈၵမ်ႉၸွႆႈပၼ် ၶဝ်ႈၼမ်ႉတၢင်းၵိၼ်ယူႇသေတႃႉ ၵူၼ်းပၢႆႈၽေးၼမ်ႁႅင်းလႄႈ ဢမ်ႇၵုမ်ႇထူၼ်ႈၵၼ်သဵင်ႈ။ထိုင်မိူဝ်ႈလဵဝ် ဢမ်ႇမီးၸုမ်းလႂ် ၶဝ်ႈၵမ်ႉၸွႆႈ။
မိူဝ်ႈလဵဝ် ၵူၼ်းပၢႆႈၽေးပွတ်းသီႇသႅင်ႇၼႆႉ ဢမ်ႇမီးၸုမ်းလႂ် ဢဝ်ပုၼ်ႈၽွၼ်းၵမ်ႉၸွႆႈတေႉတေႉဝႃႈဝႃႈလႄႈ ႁႂ်ႈၵူႈမူႇၵူႈၸုမ်း ႁၼ်ထိုင်ၵမ်ႉၸွႆႈပၼ်ၶဝ်ႈၼမ်ႉတၢင်းၵိၼ်လႄႈ ၶူဝ်းၼုင်ႈတၢင်းဝႆသေၵမ်းၼႆ ၵူၼ်းပၢႆႈၽေးၵမ်ႈၼမ်တုၵ်းယွၼ်းၼင်ႇၼႆ။
