ၶၢဝ်းတၢင်းသွင်ဝၼ်း ၼႂ်းဝၼ်းတီႈ 9 လႄႈ ဝၼ်းတီႈ 10 လိူၼ်တီႊသႅမ်ႊပိူဝ်ႊ 2023 ၼႆ့ မၢၵ်ႇလူင် တူၵ်းသႂ်ႇ တီႈဝၢၼ်ႈလွႆသၢႆး ၸႄႈဝဵင်းၵူတ့်ၶၢႆ ၸိုင်ႈတႆးပွတ်းႁွင်ႇ လုၵ်ႈဢွၼ်ႇဢႃယု 9 ၶူပ်ႇၵေႃ့ၼိုင်ႈတၢႆ ၊ ၵူၼ်းမၢတ်ႇၸဵပ်းႁၢဝ်ႈႁႅင်းမီး 7 ၵေႃ့ၼႆ ယူႇတီႈၸုမ်းပရႁိတၼႂ်းပိုၼ့်တီႈ လႆႈႁူ့ၸွမ်းၼင်ႇၼႆ။
“ဝၼ်းတီႈ 9 မၢၵ်ႇလူင်တူၵ်းၼႂ်းဝၢၼ်ႈ ၊ ၵူၼ်းဝၢၼ်ႈမၢတ်ႇၸဵပ်း 5 ၵေႃႉ။ လုၵ်ႈဢွၼ်ႇဢႃယု 9 ၶူပ်ႇတၢႆၵေႃႉၼိုင်ႈ။ မိူဝ်ႈဝၼ်းတီႈ 11 သမ်ႉမၢၵ်ႇတူၵ်းသႂ်ႇထႅင်ႈ။ ၼၢင်းယိင်းၵေႃႉၼိုင်ႈ ဢႃယုမွၵ်ႈ 30 ပီ လႄႈ လုၵ်ႈဢွၼ်ႇလဵၵ်ႉဢႃယု 12 ပီ မၢတ်ႇၸဵပ်းထႅင်ႈၵေႃႉၼိုင်ႈ။ လႆႈသူင်ႇယူတ်းယႃတူဝ်ဝႆႉတီႈႁူင်းယႃလႃႈသဵဝ်ႈ။ လူဝ်ႇတၢင်းၸွႆႈထႅမ်တႃႇသိုပ်ႇၵႂႃႇၽႃႇတတ်းယူတ်းယႃတူဝ်ထႅင်ႈ ”- ၸုမ်းၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈၼင်ႇၼႆ။
ၼႂ်းဝၼ်းတီႈ 10 ၼႆ့သမ့် ၵူၼ်းၸၢႆးၼႂ်းပိုၼ့်တီႈၵေႃ့ၼိုင်ႈ ၵႂႃႇယဵပ်ႇၺႃးမၢၵ်ႇၾင်လိၼ် ႁိမ်းတပ့်ပၢင်သဝ်းသိုၵ်းမၢၼ်ႈ ၼႂ်းပွၵ့် 2 ၼမ့်ၽၵ်းၵႃ ၸႄႈဝဵင်းၵူတ့်ၶၢႆ ၊ တိၼ်ၾၢႆၶႂႃပုတ်းၶၢတ်ႇ မၢတ်ႇၸဵပ်းႁၢဝ်ႈႁႅင်း လႆႈႁၢမ်သူင်ႁူင်းယႃ ဝႃႈၼႆ။
“ယၢမ်းၼႆႉတီႈဝဵင်းၵူတ်ႉၶၢႆၼႆႉ သိုၵ်းၵေႃႈမီးၵူႈၸုမ်း၊ ဢၼ်ပဵၼ်ယူႇၼႆႉဢမ်ႇၸႂ်ႈယွၼ်ႉၸုမ်းလႂ်ၸုမ်းၼိုင်ႈ။ မၼ်းပဵၼ်ယွၼ်ႉၵူႈၸုမ်းယဝ်ႉ။ မၢၵ်ႇလူင်ၼႆႉပဵၼ်ၶွင်ၽႂ်ၶွင်ၽီ လုၵ်ႉၵလႂ် ၵလီမႃးဢမ်ႇႁူႉ တူၵ်းသႂ်ႇၼႂ်းဝၢၼ်ႈၼႂ်းဝဵင်းယူႇၵူႈဝၼ်းယဝ်ႉ။ ၵူၼ်းမိူင်းဢမ်ႇၸၢင်ႈဢွၵ်ႇၼွၵ်ႈ တၢင်းၵိၼ်တၢင်းယမ်ႉဢမ်ႇမီး။ ဢမ်ႇၵႃးတႅပ်း 4 တႅပ်း ။ မိူၼ်တႅပ်း 10 တႅပ်းဝႆႉယဝ်ႉၶႃႈ ။ ၵိၼ်းၸႂ်ၼႃႇယဝ်ႉ တီႈၵူတ်ႉၶၢႆၼႆႉ”- ၵူၼ်းမိူင်းၵူတ်ႉၶၢႆၵေႃႉၼိုင်ႈၵေႃႈလၢတ်ႈၼင်ႇၼႆ။
ၼႂ်းၸႄႈဝဵင်းၵူတ့်ၶၢႆၼႆ့ ဝၢႆးလင် ၸုမ်းဢူၺ်းလီပွတ်းႁွင်ႇ 3 ၸုမ်း ပိုၼ်ၽၢဝ်ႇၽႅၼ်ၵၢၼ်တိုၵ်း 1027 ၼႆ့ မၢၵ်ႇလူင်ၵႆ့တူၵ်းသႂ်ႇ၊ ၸၢၵ်ႇမၢၵ်ႇတိူဝ့် ၵူၼ်းပိုၼ့်တီႈ လႆႈမၢတ်ႇၸဵပ်းလူ့တၢႆလၢႆလၢႆၵေႃ့၊ ပဵၼ်မၢၵ်ႇၽႂ် ၸုမ်းလႂ်ယိုဝ်းသႂ်ႇ ဢမ်ႇယိုၼ်ယၼ်လႆႈ၊ ယွၼ့်ပိူဝ်ႈ ၼႂ်းပိုၼ့်တီႈၼႆ့ မီးဝႆ့ၸုမ်းသိုၵ်းမၢၼ်ႈ ဢိၵ်ႇပႃး ၸုမ်းယိပ်းၵွင်ႈၵၢင်ႇတၢင်းၼမ် တူင့်ၼိုင်ၵႂႃႇမႃးဝႆ့ၼႆ ၵူၼ်းၸၢႆးၼႂ်းပိုၼ့်တီႈၵေႃ့ၼိုင်ႈ လၢတ်ႈၼင်ႇၼႆ။
ၶၢဝ်းတၢင်း ၽႅၼ်ၵၢၼ်တိုၵ်း 1027 ႁိုင်မႃး လိူၼ်ပၢႆၽၢၵ်ႇၼႆ့ ၵူၼ်းမိူင်းၵူတ့်ၶၢႆ လူ့တၢႆ ၵႄႈပၢင်တိုၵ်း ဢမ်ႇယွမ်း 13 ၵေႃ့ ၊ လိူဝ်ၼၼ့် မၢတ်ႇၸဵပ်းထႅင်ႈ 20 ပၢႆ ၼႂ်းၼၼ့် ပႃးလုၵ်ႈဢွၼ်ႇလဵၵ့် တင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ