ယၢမ်းလဵဝ် ဢွင်ႈတီႈ ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈ တိူဝ်းၶိုၼ်ႈမႃး မီး 20 တီႈပၢႆယဝ်ႉ ႁူဝ်ၵူၼ်းပၢႆႈၽေး ဢမ်ႇယွမ်း 6 ႁဵင်ၵေႃႉ။
တႄႇဢဝ် ႁၢင်လိူၼ်ဢွၵ်ႊထိူဝ်ႊပိူဝ်ႊၼၼ်ႉမႃး တေႃႇထိုင် ဝၼ်းတီႈ 5/12/2023 ၼႆႉ ဢွင်ႈတီႈ ၵူၼ်းပၢႆႈၽေးသိုၵ်း တီႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ မီးၵႂႃႇ 20 တီႈပၢႆယဝ်ႉ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ၶွင်ႁႅင်ႈ၊ ယႃႈယႃ၊ ၶူဝ်းၼုင်ႈတင်းဝႂ်လႄႈ ၼမ်ႉမၼ်းၸၢၵ်ႈ (တီႇၸေႇ) ၸိူဝ်းၼႆႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸူဝ်ႈဝူင်ႈဝၢင်ႈၼႆႉ ငိုၼ်းၸွႆႈထႅမ် တီႈၶႃႈႁဝ်း လႆႈႁပ်ႉသေ ၸတ်းၵၢၼ်တူၺ်းထိုင်ၵူႈတီႈတီႈၼႆႉ ၶဝ်ႈဢေႇၼႃႇ။ ယူႇတီႈ ပၢင်သဝ်း ၵူၼ်းပၢႆႈၽေးႁဝ်းၶႃႈ တီႈလႂ်တီႈၼၼ်ႈ သေ ႁပ်ႉလူႇၶၢမ်ႇ တူၺ်းလူလွမ်ဢွင်ႈတီႈၽႂ်မၼ်းၵႂႃႇ ၸိူင်ႉၼၼ်ဝႆႉၶႃႈဢေႃႈ”- ဝႃႈၼႆ။
လိူဝ်ၼၼ်ႉ ပၢင်သဝ်း ဢၼ်ၵႆဝဵင်းၸိူဝ်းၼၼ်ႉၵေႃႈ ၼႂ်းၶၢဝ်းတၢင်းဝူင်ႈသွင်ဝူင်ႈမႃးၼႆႉ သိုၵ်းမၢၼ်ႈ ဢမ်ႇပၼ်ၶႂၢင်ႉ တေႃႉၶဝ်ႈ ၼမ်ႉတၢင်းၵိၼ် ၼႂ်းဝဵင်း မိူဝ်းသူင်ႇၸူးယဝ်ႉ ဝႃႈၼႆ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸိူဝ်းတီႈၵႆဝဵင်းၼၼ်ႉ တႃႇၶဝ်ႈၼမ်ႉတၢင်းၵိၼ် တေၵႂႃႇၽႅဝ် တီႈ ၼၼ်ႈ ယၢပ်ႇယဵၼ်းႁႅင်းၼႃႇယဝ်ႉ။ ယွၼ်ႉလၢၼ်ႇသိုၵ်းမၢၼ်ႈ ဢမ်ႇပၼ်ဢဝ်တေႃႉမိူဝ်းၸွႆႈၶႃႈဢေႃႈ။ တေႃႉတႄႉ ဢဝ်မိူဝ်း လႆႈဢိတ်းဢီႈၵူၺ်း။ ၼႆႉပဵၼ် တၢင်းယၢပ်ႇၽိုတ်ႇ ဢၼ်ၼိုင်ႈၶႃႈယဝ်ႉ တႃႇၵူၼ်းပၢႆႈၽေးႁဝ်းၶႃႈ ၸွမ်းသၢပ်ႇၼွၵ်ႈဝဵင်း၊ ထၢင်ႇ တႄႉ သိုၵ်းမၢၼ်ႈၶဝ် ၵူဝ်ၸုမ်းယိပ်းၵွင်ႈၵၢင်ႇ မႃးၽႄဢဝ်မိူဝ်းၵိၼ်မိူဝ်းၸႂ်ႉ ၸိူင်ႉၼၼ်ၶႃႈယူဝ်ႉ”- ဝႃႈၼႆ။
ယၢမ်းလဵဝ် ဢၼ်ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈ လူဝ်ႇႁႅင်းတီႈသုတ်းသမ်ႉ ပဵၼ်ၼမ်ႉၵိၼ်/ ၼမ်ႉၸႂ်ႉ။ ယွၼ်ႉဝႃႈ ဢမ်ႇ မီးၼမ်ႉမၼ်းၸၢၵ်ႈ တႃႇတေတေႃႉသူင်ႇပၼ် ၵူၼ်းပၢႆႈၽေးၼၼ်ႉယဝ်ႉ ဝႃႈၼႆ။
ဢွင်ႈတီႈ ၵူၼ်းပၢႆႈၽေးသိုၵ်း တီႈဝဵင်းလႃႈသဵဝ်ႈၼႆႉသမ်ႉ မိူၼ်ၼင်ႇ – တီႈၵျွင်းတေႃးယ ပွၵ်ႉ 10 မီးႁူဝ်ၵူၼ်း 330 ပၢႆ လႄႈ သင်ၶၸဝ်ႈ 50 တူၼ်၊ ၵျွင်းၵၢင်မိူင်း 300 ပၢႆ၊ ၵျွင်းထမ်ႈၶမ်း 100 ပၢႆ၊ ႁူင်းႁဵၼ်းၸိူဝ်ႉၸၢတ်ႈ မိူင်းယေႃ 174 ၵေႃႉ၊ ၵျွင်းႁူမ်ႈ ယဵၼ် 300 ပၢႆ၊ ၵျွင်းမိူင်းတဵမ် 200 ပၢႆ၊ ၵျွင်းဝၢၼ်ႈသူႈ 700 ပၢႆ၊ ၵျွင်းႁူဝ်ၼမ်ႉ 340 ၵေႃႉ၊ ၵျွင်းတႃႈပုင်ႇ 200 ပၢႆ၊ ၵျွင်းၵွင်း ၶၢမ် 100 ပၢႆ၊ ၵျွင်းပၢင်ၼႃး/ ၵုင်းသႃႇ 200 ပၢႆ၊ ၵျွင်းမၢၼ်ႈဢၢႆႇၼိူဝ် 200 ပၢႆ၊ ၵျွင်းႁူဝ်ပိုၵ်ႉ 280 ပၢႆ၊ ၵျွင်းၼႃးမူၼ်း 7 ၵေႃႉ၊ ၵျွင်းၶရိတ်ႉယၢၼ်ႇ ပွၵ်ႉ (7) 100 ပၢႆ၊
ယဝ်ႉၵေႃႈ ၵျွင်းမၢၵ်ႇၶီႈၼူ 200 ပၢႆ၊ ၵျွင်းပုင်းထုၼ် 170 ပၢႆ၊ ၵျွင်းၸေႊဢႅၼ်ႇၼႃး လၢင်း 140 ပၢႆ၊ ၵျွင်းႁိူၼ်းလွၼ်ႉ 200 ပၢႆ၊ ၵျွင်းမိူင်းယၢင်း ၼႆႉတႄႉ ပႆႇႁူႉႁူဝ်ၵူၼ်း၊ တီႈႁူင်းသဝ်း လႃးႁူႇ (ပေႃႇတႃႇသွင်ႇ) 700 ပၢႆ၊ လိူဝ်ၼၼ်ႉ ၸိူဝ်းယူႇ ၸွမ်းႁိူၼ်းယေး ပီႈ ၼွင်ႉၽႂ်မၼ်း ၼႂ်းပွၵ်ႉယွမ်ႇထႅင်ႈ ဢမ်ႇယွမ်း 800 ၵေႃႉလႄႈ တီႈၵျွင်းၶရိတ်ႉယၢၼ်ႇ ၶၢင် ၸိူဝ်း ၼႆႉထႅင်ႈ။
လိူဝ်ၼၼ်ႉ ယူႇတီႈ ၶွမ်ႊမတီႊ ၸွႆႈထႅမ် ၵူၼ်းပၢႆႈၽေး ပၼ်ၾၢင်ႉထိုင်ဝႃႈ ႁႂ်ႈၵူၼ်းပၢႆႈၽေး လိူၵ်ႈတီႈ ၵူၼ်းၶဝ်ႈဢွၵ်ႇ ၸွႆႈထႅမ် ထိုင်ငၢႆႈ၊ လိူၵ်ႈတီႈ ဢၼ်ဢမ်ႇၸမ်တပ်ႉသိုၵ်းၸုမ်းလႂ်၊ လိူၵ်ႈတီႈ ဢၼ်ပၢင်ႇလႅင်း ႁၼ်လႅင်းလီ ၸိူဝ်းၼၼ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ