သိုၵ်းၵဝ်ႈၵၢင်ႉ MNDAA လၢတ်ႈဢွၵ်ႇဝႃႈ ၽႂ်ယူႇၼႂ်းၼႃႈလိၼ်ၵဝ်ႈၵၢင်ႉၵုမ်းၵမ် တၵ်းလႆႈၶဝ်ႈႁၢပ်ႇၵၢၼ်သိုၵ်း ဝႃႈၼႆ။
ၼႂ်းၶၢဝ်းတၢင်းၸုမ်းဢူၺ်းလီပွတ်းႁွင်ႇ တႄႇၽႅၼ်သိုၵ်း 1027 သေ လေႃႇတိုၵ်းသိုၵ်းမၢၼ်ႈမႃးၼႆႉ တင်းသွင်ၾၢႆႇ မီးလွင်ႈ တုမ်ႉတိူဝ်ႉလူႉသုမ်း ။ မိူဝ်ႈလဵဝ် တပ်ႉသိုၵ်းၵဝ်ႈၵၢင်ႉ MNDAA ပိုၼ်ၽၢဝ်ႇလၢတ်ႈဝႃႈ ၽႂ်ယူႇၼႂ်းၼႃႈလိၼ်ၵုမ်းၵမ်ၵေႃႈ တၵ်းလႆႈႁၢပ်ႇၵၢၼ်သိုၵ်း ၼႆယဝ်ႉ။
လီႇၵျႃးဝိၼ်း ၽူႈၶၢၼ်ပၢၵ်ႇတပ်ႉသိုၵ်းၵဝ်ႈၵၢင်ႉ လၢတ်ႈဝႃႈ – “ တႄႇဢဝ်ဢႃယု 16 ပီၶိုၼ်ႈၼိူဝ် ဢမ်ႇဝႃႈယိင်းဝႃႈၸၢႆး ၵူၺ်း၊ ပႃးၸဵမ်သင်ၶၸဝ်ႈ တေႁႂ်ႈႁၢပ်ႇၵၢၼ်သိုၵ်း ။ ၼႂ်းၼၼ်ႉပေႃးပဵၼ်ၼၢင်းယိင်းတႄႉ တေႁႂ်ႈႁဵတ်းၵၢၼ်ၼႂ်းလုမ်း ၊ ပေႃးပဵၼ်ၸၢႆး တေႁႂ်ႈႁၢပ်ႇၵၢၼ်သိုၵ်း ” – ဝႃႈၼႆ ။
ၵွပ်ႈၼႆ ၼႂ်းမုင်ႉႁေႃႁိူၼ်းၼိုင်ႈဢၼ် သင်ဝႃႈ မီးလုၵ်ႈၸၢႆး 2 ၵေႃႉၸိုင် တၵ်းလႆႈပၼ်တႃႇႁဵတ်းသိုၵ်း ၼိုင်ႈၵေႃႉ ။ ပေႃးပဵၼ်ၼၢင်းယိင်း လိူၵ်ႈလႆႈ ၶႂ်ႈႁဵတ်းၵၢၼ်ၾၢႆႇယူတ်းယႃႁိုဝ်ဢမ်ႇၼၼ် ၵၢၼ်လုမ်း။လွင်ႈၼႆႉ ဢမ်ႇလိူၵ်ႈၶိူဝ်းၵူၼ်းလႄႈၽႃႇသႃႇ တၵ်းလႆႈႁၢပ်ႈပုၼ်ႈၽွၼ်းၵူႈၵေႃႉဝႃႈၼႆ။
လီႇၵျႃးဝိၼ်း ၽူႈၶၢၼ်ပၢၵ်ႇတပ်ႉသိုၵ်းၵဝ်ႈၵၢင်ႉ လၢတ်ႈပႃးဝႃႈ – “ ၵူၼ်းၸၢႆးတီႈႁိူၼ်းပေႃးမီးသွင်ၵေႃႉ တၵ်းလႆႈၶဝ်ႈၼႂ်းသိုၵ်းၵေႃႉၼိုင်ႈ။ ပေႃးတဵမ် 16 ပီတႄႉ တိုၼ်းမီးပုၼ်ႈၽွၼ်း တႃႇႁၢပ်ႇၵၢၼ်သိုၵ်းၵူႈၵေႃႉ ။ ဢမ်ႇလိူၵ်ႈ ၵူၼ်းၸၢဝ်းၶိူဝ်း လႄႈ ၽႃႇသႃႇ ၶႃႈ ” – ဝႃႈၼႆ။
ၽွင်းပဵၼ်ပၢင်တိုၵ်းသိုၵ်းသိူဝ်ၼႆႉ တေလႆႈတူၺ်းထိုင် ႁေႉၵင်ႈပၼ်ၵူၼ်းမိူင်း ႁႂ်ႈလွတ်ႈၽေး ၼႆ ၸုမ်းၵျီႊၼီႊပိူဝ်ႊ ၶွၼ်ႊဝႅၼ်ႊသျိၼ်ႊ တူၵ်းလူင်းလႆႈၸႂ်ၵၼ် မိူဝ်ႈပီ 1949 ၼၼ်ႉမႃး။ ပဵၼ်ပိူင်ဢၼ် သိုၵ်းၼႂ်းတင်းပိုၵ်း တေလႆႈႁဵတ်းၸွမ်း။
မိူဝ်ႈလဵဝ်ၸုမ်းယိပ်းၵွင်ႈၵၢင်ႇ ၵမ်ႈၼမ်ၼႂ်းမိူင်းႁူမ်ႈတုမ်မၢၼ်ႈ ဢမ်ႇၸွမ်းပိူင်သိုၵ်းသေဢမ်ႇၵႃး တင်ႈၸႂ်ပေႉၵိၼ်လူလၢႆ ၵူၼ်းမိူင်းမႃး ၶိူဝ်းယႂ်း။
